1 Patshalar 19 bob
1 Shaul ulı İonatang'a ha'm barlıq xızmetshilerine Dawıttı o'ltiriwdi buyırdı. Biraq Shauldın' ulı İonatan Dawıttı ju'da' jaqsı ko'retug'ın edi.
2 Ol Dawıtqa xabar jiberip: «A'kem Shaul seni o'ltirmekshi. Erten' azanda saq bol. Bir jerge jasırınıp, sol jerde otır.
3 Al men sen jasırıng'an atızg'a barıp, a'kemnin' janında turaman ha'm onın' menen sen tuwralı so'ylesemen. Bir na'rse bilsem, sag'an aytaman», – dedi.
4 İonatan a'kesi Shaulg'a Dawıttı maqtap bılay dedi: – Patsham, o'z qulın' Dawıtqa qarsı gu'na isleme. Sebebi ol sag'an qarsı hesh qanday gu'na islemedi ha'm ha'r bir isi arqalı sag'an u'lken payda keltirdi.
5 Ol janın qa'wip astına qoyıp, filistti o'ltirdi. Jaratqan İye pu'tkil İzraildı jen'iske eristirdi. Sen de bunı ko'rip quwandın'. Solay eken, nege Dawıttı sebepsiz o'ltirip, jazıqsız bir adamg'a nahaqlıq islep atırsan'?
6 Shaul İonatannın' so'zlerine qulaq salıp: – Tiri Jaratqan İye haqı ant ishemen, Dawıt o'ltirilmeydi, – dedi.
7 İonatan Dawıttı shaqırıp, og'an ha'mmesin aytıp berdi. Son'ınan Dawıttı Shauldın' qasına a'keldi. Dawıt ta aldıng'ıday patshanın' xızmetine kirdi.
8 Sawash ja'ne ha'wij aldı. Dawıt filistlerge qarsı urısqa shıg'ıp, olarg'a ku'shli soqqı berdi. Filistler Dawıttın' aldına tu'sip qashtı.
9 Bir ku'ni Shaul nayzasın qolına alıp, u'yinde otırg'an edi. Dawıt ta lira shertip otırg'an edi. Sol waqıtta Jaratqan İye jibergen jaman ruwx Shauldı biylep aldı.
10 Shaul nayzası menen Dawıttı diywalg'a qadamaqshı boldı. Biraq Dawıt ja'ne qashıp qalıp, Shauldın' nayzası diywalg'a qadaldı. Sol tu'ni Dawıt qashıp qutıldı.
11 Dawıttı gu'zetip, erten'ine azanda o'ltiriw ushın, Shaul Dawıttın' u'yine xızmetshilerin jiberdi. Biraq hayalı Mixal Dawıtqa: «Eger bu'gin tu'nde qashıp qutılmasan', azanda seni o'ltiredi», – dedi.
12 Son'ınan ol Dawıttı terezeden to'menge tu'sirip jiberdi. Solay etip, Dawıt qashıp qutıldı.
13 Mixal u'y butın alıp, onı to'sekke jatqızdı da, u'stine ko'rpe japtı. Al bas betine eshki ju'ninen islengen ko'pshik qoydı.
14 Shaul jibergen xızmetshiler Dawıttı tutıp alıp ketiwge kelgende, Mixal olarg'a: «Dawıt awırıp atır», – dedi.
15 Dawıttı ko'rip keliw ushın Shaul xızmetshilerin ja'ne jiberip atırıp: «Onı to'segi menen usı jerge alıp kelin'ler, o'ltireyin», – dep buyırdı.
16 Shauldın' xızmetshileri u'yge kirgende, to'sekte basına eshki ju'ninen ko'pshik qoyılg'an buttın' jatırg'anın ko'rdi.
17 Shaul Mixaldan: – Nege meni aldap, dushpanımdı qashırıp jiberdin'? – dep soradı. Mixal og'an: – Dawıt mag'an: «Eger meni bosatıp jibermesen', o'zin'di o'ltiremen», – dedi, – dep juwap berdi.
18 Qashıp qutılg'an Dawıt Ramada jasap atırg'an Samuelge bardı ha'm Shauldın' o'zine islegen barlıq isleri tuwralı aytıp berdi. Son'ınan Dawıt Samuel menen birge Nayotqa barıp, sol jerde qaldı.+
19 Dawıttın' Ramanın' Nayot degen jerinde ekenligi haqqında xabar Shaulg'a jetip bardı.
20 Sonda Shaul Dawıttı uslap keliw ushın xızmetshilerin sol jerge jiberdi. Olar Samueldin' basshılıg'ındag'ı bir payg'ambarlar toparının' payg'ambarshılıq etip ju'rgenin ko'rdi. Sol waqıtta Qudaydın' Ruwxı Shauldın' xızmetshilerine de tu'sip, olar da payg'ambarshılıq ete basladı.
21 Shaul bolıp o'tken waqıyanı esitkende, basqa xızmetshilerdi jiberdi. Olar da payg'ambarshılıq ete basladı. Shauldın' u'shinshi ret jibergen xızmetshileri de payg'ambarshılıq ete basladı.
22 Aqırı Shauldın' o'zi Rama qalasına qaray jolg'a shıqtı. Ol Sexudag'ı u'lken suw saqlag'ıshqa jetkende: – Samuel menen Dawıt qay jerde? – dep soradı. Bir adam og'an: – Ramanın' Nayot degen jerinde, – dep juwap berdi.
23 Shaul Ramadag'ı Nayotqa baratırg'anda, og'an da Qudaydın' Ruwxı tu'sti. Ol Nayotqa barg'ansha, jol boyı payg'ambarshılıq etti.
24 Ol kiyimlerin sheship taslap, Samueldin' aldında payg'ambarshılıq etti. Shaul pu'tkil ku'ni ha'm tu'ni boyı jalan'ash jattı. Sonlıqtan da, xalıqtın': «Shaul da payg'ambarlar arasında ma?» – degen so'zi usınnan qalg'an+.
