1 Patshalar 26 bob
1 Zifliler Gibag'a, Shaulg'a kelip: «Dawıt Eshimong'a qaramaqarsı jaylasqan Xaxila to'beshiginde jasırınıp ju'r», – dedi.
2 Shaul İzraildın' u'sh mın' ag'la a'skerin alıp, Zif sho'line Dawıttı izlew ushın shıqtı.
3 Olar Eshimong'a qarama-qarsı jaylasqan Xaxila to'beshigindegi jol boyına orda qurdı. Sho'lde ju'rgen Dawıt Shauldın' o'zin izlep, sol jerge kelgenin bilgende,
4 tın'shılar jiberdi. Solay etip, ol Shauldın' sol jerge kelgenin anıq bilip aldı.
5 Sonlıqtan Dawıt Shauldın' orda qurg'an jerine barıp, Shaul menen sa'rka'rda Ner ulı Abnerdin' qay jerde jatırg'anın ko'rdi. Shaul ordanın' ortasında, al a'skerler onın' a'tirapında jatırg'an eken.
6 Sol waqıtta Dawıt xett xalqınan bolg'an Aximelexten ha'm İoabtın' a'jag'ası Seruyanın' ulı Abishaydan: – Kim menin' menen birge ordag'a, Shauldın' janına baradı? – dep soradı. Abishay: – Senin' menen men baraman, – dep juwap berdi.
7 Dawıt penen Abishay sol ku'ni keshte ordag'a kirdi. Shaul nayzasın bas ushına jerge shanshıp qoyıp, ordanın' ortasında uyıqlap atırg'an edi. Abner menen a'skerler de onın' a'tirapında uyıqlap atırg'an edi.
8 Sonda Abishay Dawıtqa: – Bu'gin Quday dushpanın'dı qolın'a tutıp berdi. Endi ruxsat ber, onı nayza menen bir urg'anda jerge qadap qoyayın. Ekinshi ret urıwıma ha'jet qalmaydı, – dedi.
9 Biraq Dawıt og'an bılay dedi: – Yaq, onı o'ltirme. Jaratqan İyenin' maylag'an adamına qol ko'tergen adam jazasız qalmaydı.
10 Tiri Jaratqan İye haqı ant ishemen: Shauldı Jaratqan İyenin' O'zi o'ltiredi. Ol ya o'miri tawısılıp o'ledi, ya urısta o'ledi.
11 Biraq Jaratqan İyenin' maylag'an adamına qarsı qol ko'teriwden Jaratqan İyenin' O'zi saqlasın! Onın' bas ushındag'ı nayzası menen gu'zesin alayıq ta, keteyik.
12 Solay etip, Dawıt Shauldın' bas ushındag'ı nayzası menen gu'zesin aldı da, sol jerden ketip qaldı. Olardı hesh kim ko'rmedi. Bolıp o'tken waqıyanı hesh kim bilmedi, hesh kim oyanbadı da. Olardın' ha'mmesi qattı uyıqlap atırg'an edi. O'ytkeni Jaratqan İye olarg'a teren' uyqı bergen edi.
13 Dawıt arg'ı ta'repke o'tip, uzag'ıraqtag'ı bir to'beshikke shıg'ıp turdı. Olardın' arası a'dewir qashıq edi.
14 Dawıt a'skerlerge ha'm Ner ulı Abnerge: – Ha'y Abner, mag'an juwap ber, – dedi. Abner og'an: – Baqırıp, patshanın' tınıshın alatug'ınday sen kimsen'? – dedi.
15 Dawıt og'an bılay dep juwap berdi: – Sen erkek emessen' be? İzrailda sag'an ten' keletug'ını bar ma? Solay eken, nege patshan'dı qorg'amadın'? Sebebi birew onı o'ltiriw ushın ordag'a kirdi.
16 Sen o'z xızmetin'di jaqsı orınlamadın'. Tiri Jaratqan İye haqı ant ishemen: ha'mmen'iz o'limge ılayıqlısız. O'ytkeni taqsırın'ızdı, Jaratqan İyenin' maylag'an adamın qorg'amadın'ız. Qarap ko'r, patshanın' bas ushındag'ı nayzası menen gu'zesi qayaqta?
17 Dawıttın' dawısın tanıg'an Shaul: – Dawıt, ulım, bul senin' dawısın' ba? – dep soradı. Dawıt og'an bılay dep juwap berdi: – Awa, taqsır, menin' dawısım.
18 Taqsır, qulın'ızdı nege quwdalay beresiz? Men ne qıldım? Jazıg'ım ne?
19 Taqsır! Qulın'ızdın' so'zine qulaq salsan'ız. Eger sizdi mag'an qarsı qayrag'an Jaratqan İye bolsa, onda bir qurbanlıq berip, Onı tınıshlandırın'. Eger bul isti adamlar islegen bolsa, olar Jaratqan İyenin' g'arg'ısına ushırasın. O'ytkeni olar: «Ket, basqa qudaylarg'a xızmet et», – dep, Jaratqan İyenin' jerinen, menin' u'lesime tiygen jerden meni quwıp jiberdi.
20 Qanım Jaratqan İyeden uzaq jerlerde to'gilmesin. İzrail patshası tawlarda keklik awlag'an an'shı sıyaqlı, bir bu'rgeni awlawg'a shıg'ıptı.
21 Sonda Shaul: – Gu'na isledim. Dawıt, ulım, izin'e qayt. Bu'gin menin' janımdı qa'dirli ko'rgenin' ushın, bunnan bılay, sag'an hesh bir jamanlıq islemeymen. Men aqılsızlıq penen is tutıp, ju'da' u'lken qa'tege jol qoydım, – dedi.
22 Dawıt og'an bılay dedi: – Mine, patshanın' nayzası. Adamların'ızdan biri kelip, onı alsın.
23 Jaratqan İye ha'r bir adamnın' a'dilligine ha'm sadıqlıg'ına qaray sıy beredi. Bu'gin Jaratqan İye sizdi qolıma tutıp berse de, men Jaratqan İyenin' maylag'an adamına qol ko'tergim kelmedi.
24 Bu'gin sizin' o'mirin'iz mag'an qa'dirli bolg'anınday, Jaratqan İye de menin' o'mirimdi qa'dirli ko'rsin ha'm meni ha'r qanday ba'leden qutqarsın.
25 Shaul Dawıtqa: – Dawıt, ulım, seni Jaratqan İye jarılqasın! Sen so'zsiz ullı isler isleysen' ha'm jen'iske erisesen', – dedi. Bunnan keyin, Dawıt o'z jolına tu'sti, al Shaul bolsa, u'yine qayttı.
