1 Patshalar 29 bob
1 Filistler pu'tkil a'skerlerin Afekke topladı. İzraillılar bolsa, İzreeldegi bulaqtın' janına orda qurıp, jaylasıp alg'an edi.
2 Filist hu'kimdarları ju'z ha'm mın' adamlıq toparlar menen baratırg'an edi. Dawıt ha'm onın' adamları patsha Axish penen birge izde kiyatırg'an edi.
3 Filist a'skerbasıları: – Mına evreyler bul jerde ne qılıp ju'r? – dep sorag'anda, Axish olarg'a: – Bul adam İzrail patshası Shauldın' xızmetshisi Dawıt boladı. Bir jıldan aslam waqıttan beri, ol menin' janımda ju'r. Men ta'repke o'tkennen beri, onnan birde bir jamanlıq ko'rmedim, – dep juwap berdi.
4 Biraq filist a'skerbasıları Axishke ashıwlanıp bılay dedi: – Bul adamdı izine qaytarıp jiber. Ol senin' o'zine bergen jerine qaytsın. Bizler menen urısqa barmasın, bolmasa sawash waqtında bizge qarsı shıg'ıwı mu'mkin. Ol aldıng'ı mırzasına o'zin qalay jaqsı ko'rsete aladı? Og'an adamlarımızdın' basın alıp barıwdan basqa jaqsı jol bar ma?
5 Olardın' oyıng'a tu'sip: «Shaul mın'lag'anın, Al Dawıt on mın'lag'anın o'ltirdi», – dep qosıq aytıp ju'rgenleri usı Dawıt emes pe?
6 Sonda Axish Dawıttı shaqırıp alıp bılay dedi: – Tiri Jaratqan İye haqı ant ishemen: sen haq adamsan'. Menin' menen birge urısqa barıwın'dı qa'ler edim. Sen janıma kelgen ku'nnen beri, hesh bir jaman is islegenin'di ko'rmedim. Biraq sen filist hu'kimdarlarına jaqpadın'.
7 Endi aman-esen izin'e qayta ber. Ja'ne filist hu'kimdarlarına jaqpaytug'ın is islep qoyma.
8 Dawıt Axishke: – Biraq men ne qıldım? Janın'ızg'a kelgennen baslap, ha'zirge deyin mennen qanday ayıp taptın'ız? Taqsır, ne ushın men barıp, sizin' dushpanların'ızg'a qarsı urısa almayman? – dedi.
9 Axish og'an bılay dedi: – Bilemen, sen menin' na'zerimde Qudaydın' perishtesi sıyaqlı jaqsısan'. Degen menen, filist a'skerbasıları seni: «Bizler menen urısqa barmasın», – dep atır.
10 Endi sen ha'm senin' menen birge kelgen mırzan' Shauldın' qulları azanda erte turıp, tan' atar-atpastan ketin'ler.
11 Solay etip, Dawıt ha'm onın' adamları filistlerdin' jerine qaytıw ushın, azanda erte turdı. Al filistler bolsa, İzreelge ketti.
