1 Patshalar 31 bob
1 Sol waqıtta filistler izraillılar menen urısıp atırg'an edi. İzraillılar filistlerdin' aldına tu'sip qashıp, ko'pshiligi Gilboa tawında nabıt boldı.
2 Filistler Shaul menen onın' ullarının' izine tu'sip, Shauldın' ulları İonatandı, Abinadabtı ha'm Malkiy-Shuanı o'ltirdi.
3 Shauldın' a'tirapında sawash ha'wij alg'an edi. Sonda sadaqshılar ta'repinen atılg'an oq Shaulg'a tiyip, ol awır jaraqatlandı.
4 Shaul o'z no'kerine: «Qılıshın'dı suwırıp al da, meni o'ltir. Bolmasa, mına su'nnetsizler keledi de, qılıshın sug'ıp, meni xorlaydı», – dedi. Biraq no'ker qattı qorqıp, bunı islemedi. Sonlıqtan Shaul qılıshın qınınan suwırıp alıp, o'zin qılıshtın' u'stine tasladı.
5 Shauldın' o'lgenin ko'rgende, onın' no'keri de o'zin qılıshtın' u'stine taslap, Shaul menen birge o'ldi.
6 Solay etip, Shaul, onın' u'sh ulı, no'keri ha'm pu'tkil adamları bir ku'nde qaza taptı.
7 Oypatlıqtın' arg'ı ta'repinde ha'm İordan da'ryasının' arjag'ında jasaytug'ın izraillılar İzrail a'skerlerinin' qashıp, Shaul ha'm onın' ullarının' o'lgenin bilgende qalaların taslap, qasha basladı. Filistler kelip, sol qalalarg'a ornalastı.
8 Erten'ine filistler o'lgenlerdi tonaw ushın kelgende, Gilboa tawında Shaul ha'm onın' u'sh ulının' o'ligin ko'rdi.
9 Olar Shauldın' basın kesip, quralların aldı. Son'ınan bul xosh xabardı butxanalarına ha'm xalıq arasına taratıw ushın, filistlerdin' jerlerinin' ha'mmesine xabarshılar jiberdi.
10 Shauldın' qural-jarag'ın qudayı Ashtartanın' butxanasına qoydı, al denesin Beyt-Shan qalasının' diywalına asıp qoydı.
11 Yabesh-Gilad xalqı filistlerdin' Shaulg'a islegen isleri tuwralı esitti.
12 Qaladag'ı ma'rt jigitlerdin' ha'mmesi tu'ni menen jol ju'rip, Beyt-Shang'a bardı. Olar Shauldın' ha'm onın' ullarının' denelerin Beyt-Shan diywallarınan tu'sirip alıp, Yabeshke alıp keldi ha'm sol jerde jag'ıp jiberdi.
13 Son'ınan su'yeklerin jıynap alıp, Yabeshtegi tamarisk ag'ashının' astına ko'mdi ha'm jeti ku'n oraza tutıp, azaladı.
