Jaratılıs 39 bob
1 İsmayıllılar Yusupti Mısırg'a alıp keldi. Faraon sarayının' xızmetshisi, saqshılardın' basshısı, mısırlı Potifar Yusupti ismayıllılardan satıp aldı+.
2 Jaratqan İye Yusup penen birge bolıp, onı tabıslı qıldı. Solay etip, Yusup mısırlı xojayınının' u'yinde jasadı.
3 Onın' xojayını Jaratqan İyenin' Yusup penen birge ekenin ha'm ol islegen ha'r bir isti tabıslı qılıp atırg'anın ko'rdi.
4 Yusup xojayınının' kewlinen shıqtı ha'm onın' jaqın xızmetshisine aylandı. Sonlıqtan onı u'yi ha'm barlıq mal-mu'lki u'stinen basqarıwshı etip qoydı.
5 Xojayını Yusupti u'yi ha'm pu'tkil mal-mu'lki u'stinen basqarıwshı etip tayınlag'annan baslap, Jaratqan İye Yusup sebepli Potifardın' u'yin jarılqadı. Onın' u'yine, atızına ha'm og'an tiyisli ha'r bir na'rsege bereket berdi.
6 Solay etip, Potifar o'zinin' pu'tkil malmu'lkin Yusuptin' ıqtıyarına tapsırıp, o'zi jeytug'ın tamag'ınan basqa hesh na'rse menen isi bolmadı. Yusup qa'ddi-qa'wmeti kelisken, shıraylı jigit edi.
7 Aradan bir qansha waqıt o'tkennen son', Potifardın' hayalının' Yusupke ıshqı ketip, og'an: – Menin' menen jat, – dedi.
8 Biraq Yusup qarsılıq ko'rsetip, xojayınının' hayalına bılay dedi: – Mine, xojayınım u'yindegi barlıq zatlardı menin' ıqtıyarıma tapsırıp, hesh bir iske aralaspaydı.
9 Bul xojalıqta mennen biyligi ku'shli adam joq. Ol sennen basqa hesh na'rseni mennen ayamadı. Sebebi sen onın' hayalısan'. Men qalayınsha bunday u'lken qılmıs islep, Qudayg'a qarsı gu'na qılaman?
10 Hayal Yusupke o'zi menen birge jatıwdı ha'm birge bolıwdı ha'r ku'ni usınıs etse de, Yusup onın' aytqanına ko'nbedi.
11 Bir ku'ni Yusup o'z islerin islew ushın u'yge kirdi. U'yde xızmetshilerden hesh kim joq edi.
12 Sonda Potifardın' hayalı Yusuptin' shapanınan uslap: – Menin' menen jat, – dedi. Biraq Yusup shapanın hayaldın' qolında qaldırıp, sırtqa qashıp shıqtı.
13 Hayal Yusuptin' shapanın taslap qashqanın ko'rgende,
14 u'y xızmetshilerin shaqırıp, olarg'a: – Qaran'lar, ku'yewim alıp kelgen mına evrey bizlerdi masqara qıldıg'o! Ol menin' menen jatıw ushın ishke kirdi. Biraq men qattı qıshqırdım.
15 Ol menin' qıshqırıp baqırg'anımdı esitkende, shapanın qasıma taslap, sırtqa qashıp ketti, – dedi.
16 Xojayını u'yge kelgenshe, hayal Yusuptin' shapanın saqlap qoydı.
17 Hayal ku'yewine de sol so'zlerdi aytıp: – Senin' bul jerge alıp kelgen evrey qulın' mag'an kelip, meni masqara qılmaqshı boldı.
18 Biraq men qıshqırıp baqırg'anımda, ol shapanın menin' qasıma taslap, sırtqa qashıp ketti, – dedi.
19 Yusuptin' xojayını hayalının': «Senin' qulın' mag'an usılay isledi», – degenin esitkende g'a'zepke mindi.
20 Ol Yusupti tutqıng'a alıp, patshanın' tutqınları qamalatug'ın qamaqxanag'a taslattı. Biraq Yusup qamaqta bolg'anda da,
21 Jaratqan İye onın' menen birge bolıp, og'an jaqsılıq isledi ha'm qamaqxana basshısına Yusupti unamlı etip ko'rsetti.
22 Ol qamaqxanadag'ı barlıq tutqınlardı Yusuptin' qaramag'ına tapsırdı. Ol jerdegi barlıq isler ushın Yusup juwapker boldı.
23 Qamaqxana basshısı Yusupke tapsırg'an jumıslardın' hesh birine aralaspadı. O'ytkeni Jaratqan İye Yusup penen birge bolıp, ol islegen ha'r bir isti tabıslı qıldı.
