2 Patshalar 15 bob
1 Bunnan son', Abshalom o'zine bir sawash arbası, atlar ha'm aldında juwırıp ju'retug'ın eliw saqshı tayarladı.
2 Ol azanda erte turıp, qala da'rwazasına baratug'ın jol boyında turatug'ın edi. O'z arzın tın'latıp, hu'kim shıg'artıw ushın patshag'a kelgen ha'r bir adamdı shaqırıp alıp, onnan: «Qaysı qaladansan'?» – dep soraytug'ın edi. Sol adam İzraildın' qaysı urıwınan kelgenin aytatug'ın edi.
3 Sonda Abshalom sol adamg'a: «Qara, senin' dawa isin' tuwrı ha'm a'dil. Biraq patshanın' janında seni tın'law ushın tayınlang'an hesh kim joq», – deytug'ın edi.
4 Son'ınan: «Qa'nekey, endi meni elge qazı qılıp qoysa, o'z arzısı menen kelgen ha'r bir adamnın' isin a'dalatlıq penen shesher edim», – dep qosıp qoyatug'ın edi.
5 Eger birew Abshalomg'a ta'jim etiw ushın jaqınlassa, ol sol adamg'a qolın sozatug'ın ha'm onı qushaqlap, su'yetug'ın edi.
6 Abshalom patshag'a arız qılıp kelgen izraillılardın' ha'r birine usılay qatnas jasaytug'ın edi. Solay etip, ol izraillılardın' kewlin o'zine awdırıp aldı.
7 Aradan to'rt jıl o'tkennen son', Abshalom patshag'a bılay dedi: – Menin' Xebrong'a barıp, Jaratqan İyege bergen wa'demdi orınlap keliwime ruxsat bersen'iz.
8 Sebebi qulın'ız bolg'an men Aram u'lkesindegi Geshurda jasap atırg'anımda: «Eger Jaratqan İye meni Erusalimge qaytarsa, onda men Xebrong'a barıp, Og'an sıyınaman», – dep wa'de bergen edim.
9 Patsha og'an: – Aman-esen kete ber, – dedi. Ol ornınan turıp, Xebrong'a ketti.
10 Abshalom İzraildın' pu'tkil urıwlarına jasırın tu'rde xabarshılar jiberip, olarg'a: «Ka'rnay dawısın esitiwden-aq: „Abshalom Xebronda patsha boldı“, – dep aytın'lar», – dedi.
11 Erusalimnen mira't etilgen eki ju'z adam bolıp o'tken waqıyalardan biyxabar halda, jaqsı niyet penen Abshalomg'a erip ketti.
12 Abshalom qurbanlıq shalıp atırıp, Dawıttın' ma'sla'ha'tshisi gilolı Axitofeldi de Gilo qalasınan aldırttı. Usılayınsha qozg'alan' ku'sheye berdi. O'ytkeni Abshalomnın' izine ergenlerdin' sanı ko'beyip atırg'an edi.
13 Bir xabarshı Dawıtqa kelip: «İzraillılardın' kewli Abshalomg'a awıp ketti», – dedi.
14 Sonda Dawıt Erusalimde o'zi menen birge bolg'an barlıq xızmetshilerine: – Turın'lar, qashayıq! Bolmasa, Abshalomnan qashıp qutıla almaysız. Da'rhal ketip qalmasaq, Abshalom izimizden tez jetip alıp, ba'lege duwshar eter, qalanı da qılıshtan o'tkerer, – dedi.
15 Patshanın' xızmetshileri: – Taqsır, siz qanday qararg'a kelsen'iz, bizler orınlawg'a tayarmız, – dep juwap berdi.
16 Solay etip, patsha pu'tkil saray xalqın izine ertip, jolg'a shıqtı. Al sarayg'a qarap turıwı ushın, on toqalın sol jerde qaldırdı.
17 Patsha ha'm onın' izine ergen pu'tkil xalıq qalanın' en' shetindegi u'ydin' janına kelip, toqtadı.
18 Sol jerden baslap, barlıq xızmetshileri, keretler menen peletlerden alıng'an ta'n saqshılar ha'm Gattan o'zine erip kelgen gatlı altı ju'z a'sker patshanın' aldınan ju'rip o'tti.
19 Patsha gatlı İttayg'a bılay dedi: – Nege sen de bizler menen kiyatırsan'? İzin'e qaytıp, jan'a patsha menen qal. O'ytkeni sen watanın'nan quwılg'an bir jat ellisen'.
20 Sen keshe kelgensen'. Bu'gin qay jerge bararımdı o'zim bilmey turıp, seni de sergizdan qılayın ba? İzge qayt, a'skerlerin'di de o'zin' menen alıp qayt. Qudaydın' su'yispenshiligi ha'm sadıqlıg'ı sag'an yar bolsın!
21 Biraq İttay patshag'a: – Taqsır, tiri Jaratqan İye haqı aldın'ızda ant iship aytaman: o'lim ushın bolsa da, o'mir ushın bolsa da, siz qay jerde bolsan'ız, qulın'ız bolg'an men de sol jerde bolaman, – dep juwap berdi.
22 Dawıt İttayg'a: – Yaqshı, onda aldıg'a o'tip, ju're ber, – dedi. Solay etip, gatlı İttay ha'm onın' janındag'ı ha'mme adamlar balashag'aları menen birge jolın dawam etti.
23 Xalıq ketip baratırg'anda, a'tiraptag'ı pu'tkil el zar-zar jılastı. Patsha Kidron sayınan o'tti. Pu'tkil xalıq sho'listanlıqqa qaray jol aldı.
24 Ruwxaniy Sadoq penen Qudaydın' Kelisim sandıg'ın ko'tergen lebiyliler de sol jerde edi. Olar Qudaydın' sandıg'ın jerge qoydı. Pu'tkil xalıq qaladan shıg'ıp bolg'ansha, ruwxaniy Abiyatar to'beshikke ko'terilip, olardı ku'tip turdı.
25 Son'ınan patsha Sadoqqa bılay dedi: «Qudaydın' sandıg'ın qalag'a qaytarıp alıp bar. Eger Jaratqan İyenin' mag'an miyrimi tu'sken bolsa, Ol meni izime qaytarıp, sandıqtı ha'm sandıq turatug'ın orındı mag'an ko'rseter.
26 Eger Ol mag'an: „Sag'an kewlim tolmadı“, – dese, onda men tayarman. Ol mag'an maqul ko'rgenin islesin».
27 Patsha so'zin dawam etip, ruwxaniy Sadoqqa bılay dedi: «Jag'daydı ko'rip turg'an joqsan' ba? Ulın' Aximaastı ha'm Abiyatardın' ulı İonatandı janın'a al da, Abiyatar menen birge aman-esen qalag'a qayt.
28 Sizlerden anıq bir xabar almag'anımsha, men İordan tegisliginde, da'ryanın' o'tkelinde ku'tip turaman».
29 Solay etip, Sadoq penen Abiyatar Qudaydın' sandıg'ın Erusalimge qaytarıp aparıp, sol jerde qaldı.
30 Al Dawıt bolsa, jılap-en'irep Za'ytu'n tawına ko'terile berdi. Ol basın orap alıp, jalan' ayaq ketip baratır edi. Onın' janındag'ı adamlardın' ha'mmesi de basların orap alıp, jılap-en'irep tawg'a shıg'ıp baratır edi.
31 Sol arada birew Dawıtqa: «Axitofel de Abshalomnın' ta'repin alg'an til biriktiriwshiler arasında eken», – dep xabarladı. Sonda Dawıt: «Jaratqan İye, Axitofeldin' ken'esin joqqa shıg'ara go'r!» – dep duwa etti.
32 Dawıt Qudayg'a sıyınatug'ın tawdın' to'besine jetip barg'anda, Ark tiyresinen bolg'an Xushay kiyimi jırtılg'an, basına topıraq shashılg'an halda onı qarsı aldı.
33 Dawıt og'an bılay dedi: «Menin' menen birge ketsen', mag'an ju'k bolasan'.
34 Eger qalag'a qaytıp barsan', Abshalomg'a: „Ha'y patsha, sizin' qulın'ız bolmaqshıman. Burın a'ken'izge qanday xızmet etken bolsam, sizge de solay xızmet etemen“, – dep aytarsan'. Usılay sen Axitofeldin' ma'sla'ha'tin menin' ushın bosqa shıg'arasan'.
35 Ruwxaniyler Sadoq penen Abiyatar sol jerde senin' menen birge boladı. Patshanın' sarayında esitkenlerin'nin' ha'mmesinen olardı xabardar etip tur.
36 Sadoqtın' ulı Aximaas penen Abiyatardın' ulı İonatan da sol jerde. Esitkenlerin'nin' ha'mmesin olar arqalı mag'an jetkerip turasan'».
37 Solay etip, Dawıttın' dostısı Xushay Erusalimge ketti. Sol waqıtta Abshalom da Erusalimge kirip kiyatırg'an edi.
