4 Patshalar 1 bob
1 İzrail patshası Axabtın' o'liminen son', moablılar İzrailg'a qarsı bas ko'terdi.
2 İzrail patshası Axaziya Samariyadag'ı sarayının' joqarg'ı bo'lmesinin' balkonınan jıg'ılıp, jaraqatlandı. Sonda ol adamların jiberip, olarg'a: «Filistlerdin' Ekron qalasındag'ı qudayı Baal-Zebubqa barıp, onnan menin' ta'wir bolatug'ın yaki bolmaytug'ınımdı sorap bilin'ler», – dedi.
3 Biraq Jaratqan İyenin' perishtesi tishbeli İliyasqa bılay dedi: «Barıp, Samariya patshası jibergen adamlardın' aldınan shıg'ıp, olarg'a bılay dep ayt: „Ekron qudayı Baal-Zebubtan soraw ushın baratug'ınday, İzrailda Quday joq pa edi?
4 Sonlıqtan Jaratqan İye patshan'ızg'a bılay deydi: Jatqan to'segin'nen turmay, so'zsiz o'lesen'“». Solay etip, İliyas tapsırmanı orınlaw ushın ketti.
5 Adamlar patshanın' janına qaytıp keldi. Patsha olardan: – Nege bunsha tez qaytıp keldin'ler? – dep soradı.
6 Olar patshag'a bılay dep juwap berdi: – Bir adam aldımızdan shıg'ıp, bizlerge bılay dedi: «O'zlerin'izdi jibergen patshag'a qaytıp barıp, og'an bılay dep aytın'lar: Jaratqan İye bılay deydi: „Ekron qudayı Baal-Zebubtan soraw ushın adamların'dı jiberetug'ınday, İzrailda Quday joq pa edi? Usı isin' ushın jatqan to'segin'nen turmay, so'zsiz o'lesen'“».
7 Patsha o'zi jibergen adamlardan: – Sizlerdi qarsı alıp, usı so'zlerdi aytqan adamnın' tu'r-tu'si qanday edi? – dep soradı.
8 8Olar patshag'a: – Ol ju'nnen toqılg'an shapan kiyip, beline teri qayıs baylag'an edi, – dep juwap berdi. Patsha: – Bul tishbeli İliyas, – dedi.
9 Patsha bir eliwbasını eliw a'skeri menen birge İliyastı alıp keliwge jiberdi. Eliwbası bir to'beshiktin' basında otırg'an İliyastın' janına barıp, og'an: – Ha'y, Qudaydın' adamı, patsha seni to'menge tu'ssin, – dep atır, – dedi.
10 Biraq İliyas eliwbasıg'a: – Eger men Qudaydın' adamı bolsam, onda aspannan ot tu'sip, seni ha'm eliw adamın'dı jalmap ketsin, – dep juwap berdi. Sonda aspannan ot tu'sip, eliwbasını ha'm onın' eliw adamın jalmap ketti.
11 Keyin patsha basqa bir eliwbasını eliw a'skeri menen İliyasqa jiberdi. Eliwbası İliyasqa: – Ha'y, Qudaydın' adamı, patsha sag'an: «Tez to'menge tu's», – dep atır, – dedi.
12 İliyas og'an: – Eger men Qudaydın' adamı bolsam, onda aspannan ot tu'sip, seni ha'm eliw adamın'dı jalmap ketsin, – dep juwap berdi. Sonda aspannan Qudaydın' otı tu'sip, eliwbasını ha'm onın' eliw adamın jalmap ketti.
13 Patsha u'shinshi ret bir eliwbasını eliw adamı menen İliyasqa jiberdi. Bul eliwbası to'bege shıg'ıp, İliyastın' aldında diz sho'kti ha'm jalbarınıp bılay dedi: «Qudaydın' adamı, menin' ha'm mına eliw qulın'nın' janına rehimin'iz kelsin.
14 Aspannan ot tu'sip, mennen aldın kelgen eki eliwbasını ha'm olardın' ha'r birinin' eliw adamın jalmap ketken edi. Endi menin' janıma rehimin'iz kelsin».
15 Sonda Jaratqan İyenin' perishtesi İliyasqa: «Onın' menen birge to'menge tu's, onnan qorqpa», – dedi. İliyas ornınan turıp, eliwbası menen birge patshag'a ketti.
16 İliyas patshag'a bılay dedi: «Jaratqan İye bılay deydi: „Ekronnın' qudayı Baal-Zebubtan soraw ushın adamların'dı jiberetug'ınday, İzrailda Quday joq pa edi? Usılay islegenin' ushın jatqan to'segin'nen turmay, so'zsiz o'lesen'“».
17 Jaratqan İyenin' İliyas arqalı aytqan so'zi boyınsha, Axaziya o'ldi. Axaziyanın' ulı bolmag'anlıqtan, onın' ornına inisi İoram patsha boldı. Bul waqıya Yahuda patshası Ehoshafat ulı İoramnın' patshalıg'ının' ekinshi jılında boldı.
18 Axaziya islegen basqa isler İzrail patshalarının' jılnama kitabında jazılg'an.
