1 Jılnama 11 bob

Dawıttın' pu'tkil İzrailg'a patsha bolıwı (1-9), Dawıttın' batır a'skerleri (10-47).

¹ Pu'tkil izraillılar Xebrong'a, Dawıttın' janına jıynalıp bılay dedi: «Bizler sizin' o'z su'yegin'iz ha'm o'z etin'izbiz.

² Burın Shaul patsha bolg'an waqıtta da, sawashta İzraildı o'zin'iz baslap ju'retug'ın edin'iz. Qudayın'ız Jaratqan İye sizge: „Xalqım İzrailg'a sen shopanlıq etip, olarg'a hu'kimdar bolasan'“, – dep wa'de bergen edi».

³ Solay etip, İzraildın' barlıq aqsaqalları Xebrong'a, patsha Dawıttın' aldına kelgende, Dawıt Xebronda Jaratqan İyenin' aldında olar menen kelisim du'zdi. Olar da Jaratqan İyenin' Samuel arqalı bergen wa'desi boyınsha, Dawıttı maylap, İzrailg'a patsha etip qoydı.

⁴ Patsha Dawıt penen izraillılar Erusalimge ju'ris qıldı. Sol waqıtları bul qala Ebus dep atalıp, ol jerde ebuslılar jasaytug'ın edi.

⁵ Ebus xalqı Dawıtqa: «Sen bul jerge kire almaysan'», – degen edi. Degen menen, Dawıt Sion qorg'anın, keyin ala «Dawıttın' qalası» dep atalatug'ın qorg'andı qolg'a kirgizdi.

⁶ Dawıt: «Ebuslılarg'a birinshi bolıp hu'jim jasap, jen'gen adam sa'rka'rda ha'm basshı boladı», – dep wa'de bergen edi. Seruya ulı İoab birinshi bolıp hu'jim jasap, jen'ip shıqtı ha'm sa'rka'rda boldı.

⁷ Bunnan keyin, Dawıt qorg'an qalag'a ornalasıp aldı. Sol sebepli ol jerge «Dawıttın' qalası» degen at berildi.

⁸ Dawıt Millodan baslap qalanın' aynala diywalların qayta tikledi. Al İoab qalanın' qalg'an bo'leklerin qayta qurdı.

⁹ Dawıt ku'shke tolıp bara berdi. O'ytkeni A'lemnin' Jaratqan İyesi onın' menen birge edi.

¹⁰ Jaratqan İyenin' İzrailg'a wa'de etkenindey, Dawıttın' batır a'skerlerinin' a'skerbasıları pu'tkil İzrail xalqı menen birge Dawıttı patsha qıldı ha'm onın' patshalıg'ının' ku'shli bolıwın qollap-quwatladı.

¹¹ Dawıttın' batır a'skerlerinin' dizimi mınaw: u'sh batırdın' sa'rdarı Xaxmon ulı Yashobam. Ol u'sh ju'z adamg'a nayza menen qarsı shıg'ıp, bir hu'jim etkende, ha'mmesin o'ltirdi.

¹² Onnan keyingisi u'sh batırdın' biri axoxlı Dodonın' ulı Elazar.

¹³ Filistler urısıw ushın Pas-Dammimde jıynalg'anda, Elazar Dawıttın' qasında boldı. Ol jerde bir arpa atızı bar edi. Sonda izraillılar filistlerden qasha basladı.

¹⁴ Biraq Elazar menen Dawıt atızdın' ortasında turıp, ol jerdi qorg'adı ha'm filistlerdi qırıp tasladı. Jaratqan İye olarg'a ullı jen'is sıyladı.

¹⁵ Bir ku'ni filist a'skerleri Refaim oypatlıg'ına orda qurg'an waqıtta, otız basshıdan u'shewi Adullam u'n'girindegi jartastı panalap turg'an Dawıtqa keldi.

¹⁶ Sol waqıtta Dawıt qorg'an ishinde edi, al filistlerdin' saqshılar toparının' birewi Beytlehemde edi.

¹⁷ Dawıt qattı sho'llep: «Qa'nekey, Beytlehem da'rwazasının' janındag'ı suw saqlag'ıshtan birew mag'an suw a'kelip berse edi!» – dedi.

¹⁸ Sonda bul u'sh batır filistlerdin' ordasın jarıp o'tip, Beytlehem da'rwazasının' janındag'ı suw saqlag'ıshtan suw alıp, Dawıtqa a'kelip berdi. Biraq Dawıt onı ishiwden bas tarttı ha'm suwdı jerge to'gip, Jaratqan İyege usındı.

¹⁹ Ol: «Qudayım, bunı islewden meni saqlay go'r! Janların qa'wip astına qoyıp, suw alıp kelgen bul u'sh adamnın' qanın isheyin be?» – dep, Dawıt suwdı ishpedi. Bul u'sh batır usınday erlik ko'rsetken edi.

²⁰ İoabtın' inisi Abishay u'sh batırdın' basshısı edi. Ol nayzası menen u'sh ju'z adamdı o'ltirdi. Sol ta'rizde ol u'sh batır sıyaqlı dan'qqa eristi.

²¹ Onın' u'sh batırdan da dan'qı artıp, olardın' basshısı bolg'anı menen, u'sh batır qatarına kirmeytug'ın edi.

²² Ehoyada ulı qabseelli Benaya da ma'rt jawınger bolıp, ol da ullı isler isledi. Ol moablı eki ku'shli jawıngerdi, al qar jawg'an ku'ni bir shuqırg'a tu'sip, arıslandı o'ltirdi.

²³ Ja'ne de, ol boyı bes shıg'anaq bolg'an mısırlını da o'ltirdi. Mısırlının' qolında toqıw u'skenesinin' qadasınday juwan nayzası bar edi. Benaya tayaq penen onın' aldına shıqtı ha'm mısırlının' nayzasın qolınan tartıp alıp, onı o'z nayzası menen o'ltirdi.

²⁴ Ehoyada ulı Benayanın' islegen isleri mine usılar. Ol da sol u'sh batır sıyaqlı dan'q tarattı.

²⁵ Ol otız batırg'a qarag'anda ataqlıraq bolsa da, biraq sol u'sh batırdın' qatarına kirmedi. Dawıt onı o'zinin' ta'n saqshılarına basshı etip qoydı.

²⁶ Basqa batır a'skerler mınalar: İoabtın' inisi Asahel, beytlehemli Dodonın' ulı Elxanan,

²⁷ harorlı Shammot, pelonlı Xeles,

²⁸ teqoalı İkkeshtin' ulı İra, anatotlı Abiezer,

²⁹ xushalı Sibbexay, axoxlı İlay,

³⁰ netofalı Maharay ha'm netofalı Baananın' ulı Xeled,

³¹ Benyamin urıwınan gibalı Ribaydın' ulı İttay, piratonlı Benaya,

³² Gaash sayları aymag'ınan Xuray, arbalı Abiel,

³³ baxarumlı Azmawet, shaalbonlı Elyaxba,

³⁴ gizonlı Hashemnin' ulları, hararlı Shagenin' ulı İonatan,

³⁵ hararlı Sakardın' ulı Axiam, Urdın' ulı Elifal,