1 Jılnama 19 bob
1 Aradan bir qansha waqıt o'tkennen son', ammonlardın' patshası Naxash o'lip, onın' ornına ulı patsha boldı.
2 Sonda Dawıt: «A'kesi mag'an jaqsılıq etkeni ushın, men de Naxash ulı Xanung'a jaqsılıq eteyin», – dep oylap, a'kesinin' o'limine kewil bildiriw ushın Xanung'a elshilerin jiberdi. Dawıttın' xızmetshileri Xanung'a kewil bildiriw ushın ammonlardın' jerine barg'anda,
3 ammon basshıları Xanung'a: «Dawıt mına elshilerdi a'ken'izdin' hu'rmeti ushın, sizge kewil aytıwg'a jibergen dep oylaysız ba? Yaq, olar eldi ko'zden o'tkerip, bilip alıw ha'm qıyratıw ushın kelgen», – dedi.
4 Sonda Xanun Dawıttın' xızmetshilerin tutqıng'a alıp, saqalların qırqtırdı, shapanların jambasına deyin qıydırıp taslap, olardı izine qaytarıp jiberdi.
5 Solay etip, olar qaytıp ketti. Dawıt elshileri tuwralı esitkende, olardı ku'tip alıw ushın adam jiberdi. O'ytkeni elshiler qattı xorlang'an edi. Patsha olarg'a: «Saqalın'ız o'skenshe, Erixoda qalın'lar, son'ınan qaytıp kelesizler», – dedi.
6 Ammonlar Dawıttı o'zlerine qarsı o'shegistirip alg'anın tu'sindi. Sonlıqtan Xanun menen ammonlar Aram-Naharayım, Aram-Maaxa ha'm Sobadan sawash arbaları menen atlılardı jallap alıw ushın mın' talant gu'mis jiberdi.
7 Xanun otız eki mın' sawash arbasın ha'm Maaxa patshası menen onın' a'skerlerin jalladı. Maaxa patshası a'skerleri menen kelip, Medeba qalasının' aldına orda qurdı. Ammonlar da qalalarınan shıg'ıp, urısqa atlandı.
8 Dawıt bunı esitip, İoab basshılıg'ında ma'rt jawıngerlerden ibarat bolg'an pu'tkil ordasın olarg'a qarsı atlandırdı.
9 Ammonlar shıg'ıp, o'z qalasının' da'rwazası aldında sap tartıp turdı. Ja'rdemge kelgen patshalar dalada bo'lek sap tartıp turdı.
10 İoab aldıdan da, arttan da urısıwg'a tuwrı kelip turg'anın ko'rgende, İzraildın' ag'la a'skerlerinen bazıların tan'lap, aramlarg'a qarsı sapqa turg'ızdı.
11 Qalg'an toparlardı inisi Abishaydın' qolına tapsırdı. Olar ammonlarg'a qarsı sap tartıp turdı.
12 İoab: «Aramlar mennen basım kelse, ja'rdemge kelersen'. Al eger ammonlar sennen basım kelse, men sag'an ja'rdemge baraman.
13 Batır bol! Xalqımız ushın ha'm Qudayımızdın' qalaları ushın ma'rtlershe gu'res alıp barayıq! Jaratqan İye neni maqul tapsa, sonı islesin», – dedi.
14 İoab a'skerleri menen birge aramlarg'a ta'p bergende, aramlar olardın' aldına tu'sip qashtı.
15 Aramlardın' qashqanın ko'rgen ammonlar da İoabtın' inisi Abishaydan qashıp, qalag'a kirip ketti. Bunnan keyin, İoab Erusalimge qaytıp keldi.
16 Aramlar o'zlerinin' izraillılardan jen'ilgenin ko'rgende, Evfrat da'ryasının' arg'ı jag'asındag'ı aramlarg'a elshiler jiberip, Hadadezerdin' sa'rka'rdası Shofaxtın' qol astındag'ı aramlardı shaqırdı.
17 Bunnan xabar tapqan Dawıt pu'tkil İzrail ordasın topladı. Keyin İordan da'ryasın kesip o'tip, olarg'a qarsı a'skerlerin sapqa turg'ızdı. Dawıt aramlarg'a hu'jimge o'tip, olar menen urıstı.
18 Degen menen, aramlar izraillılardın' aldına tu'sip qashtı. Dawıt olardın' jeti mın' sawash arbasının' arbakeshleri menen qırıq mın' piyada a'skerin o'ltirdi. Ol olardın' ordasının' sa'rka'rdası Shofaxtı da o'ltirdi.
19 Hadadezerdin' qol astındag'ı patshalar o'zlerinin' izraillılardan jen'ilgenin ko'rgende, Dawıt penen tınıshlıq kelisimin du'zdi ha'm og'an bag'ınıshlı boldı. Sonnan keyin, aramlar ammonlarg'a ja'rdem beriwden bas tartatug'ın boldı.
