1 Jılnama 21 bob

Dawıttın' xalıqtı sanaqtan o'tkeriwi(1-30).

¹ Shaytan İzrailg'a qarsı shıg'ıp, Dawıttı İzrail xalqın sanaqtan o'tkeriwge iytermeledi.

² Sonda Dawıt İoabqa ha'm la'shkerbasılarg'a: – Barıp, Beer-Shebadan Dang'a deyingi izraillılardı sanaqtan o'tkizip, olardın' qansha ekenin biliwim ushın na'tiyjesin mag'an alıp kelin', – dedi.

³ Biraq İoab: – Jaratqan İye İzrail xalqın ha'zirgisinen ju'z ese qılıp ko'beytsin. Taqsır, olardın' ha'mmesi sizin' qulların'ız emes pe? Nege usılay islewdi qa'lep qaldın'ız? Ne ushın İzraildı gu'nag'a batırmaqshısız? – dedi.

⁴ Degen menen, patshanın' so'zi İoabtın' so'zinen u'stin keldi. Solay etip, İoab ketti ha'm pu'tkil İzraildı aralap shıg'ıp, Erusalimge qaytıp keldi.

⁵ İoab sanaq na'tiyjesin Dawıtqa bayan qıldı. Pu'tkil İzrailda urısqa jaramlı bir million bir ju'z mın', al Yahudada to'rt ju'z jetpis mın' adam bar eken.

⁶ İoab patshanın' buyrıg'ına narazı bolg'anlıg'ı sebepli, lebiyliler menen benyaminlilerdi esapqa kirgizbedi.

⁷ Bul buyrıq Qudayg'a da unamadı ha'm Ol İzrail xalqın jazaladı.

⁸ Sonda Dawıt Qudayg'a: «Bul isti islep, men u'lken gu'nag'a battım. Jalbarınaman, qulın'nın' ayıbın keshire go'r. Men qattı aqmaqlıq qıldım», – dedi.

⁹ Jaratqan İye Dawıttın' wa'liyi Gadqa bılay dedi:

¹⁰ «Barıp, Dawıtqa bılay dep ayt: „Jaratqan İye bılay deydi: Men sag'an u'sh jazanı usınaman. O'zin'e solardın' birewin tan'la, keyin sag'an sol jazanı beremen“».

¹¹ Gad Dawıtqa barıp bılay dedi: – Jaratqan İye bılay deydi: «Mınalardan birin tan'la:

¹² u'sh jıl ashlıq bolsın ba? U'sh ay dushpanların' quwdalap, seni qırsın ba? Yamasa Jaratqan İyenin' qılıshı bolg'an oba keselligi Onın' perishtesi arqalı pu'tkil İzrail elin qırg'ıng'a ushıratsın ba?» Endi jaqsılap oylap ko'rip, meni Jibergenge ne dep juwap beretug'ınımdı sheshin'.

¹³ Dawıt Gadqa: – Mag'an ju'da' qıyın. Adamnın' qolına tu'skenshe, Jaratqan İyenin' qolına tu'seyin. Sebebi Onın' rehimi ju'da' ku'shli, – dep juwap berdi.

¹⁴ Solay etip, Jaratqan İye İzrail xalqına oba keselin jiberdi ha'm xalıqtan jetpis mın' adam o'ldi.

¹⁵ Quday Erusalimdi joq etiw ushın bir perishtesin jiberdi. Biraq Qudaydın' perishtesi Erusalimdi qıra baslag'anda, Jaratqan İye bolıp atırg'an apattı ko'rip, ashınıp ketti ha'm xalıqtı qırg'an perishtege: «Jeter endi, qolın'dı tart», – dedi. Sol waqıtta Jaratqan İyenin' perishtesi ebus xalqınan bolg'an Ornannın'* qırman jerinde turg'an edi.

¹⁶ Dawıt basın ko'tergende, qolındag'ı jalan'ashlang'an qılıshın Erusalim ta'repke sozıp, jer menen aspan arasında turg'an Jaratqan İyenin' perishtesin ko'rdi. Sonda aza kiyimin kiygen Dawıt penen xalıq aqsaqalları et-betinen jerge jıg'ıldı.

¹⁷ Dawıt Qudayg'a jalbarınıp: «Xalqın'dı sanaqtan o'tkeriwdi buyırg'an men emespen be? Gu'na islep, jawızlıq qılg'an men-g'o. Al mına qoylar ne qılıptı? Qudayım, Jaratqan İye! O'tinemen, jaqsısı, meni ha'm a'kemnin' xojalıg'ın jazala. Biraq xalqın'nın' oba keselliginen qırılıp ketiwine jol qoyma», – dedi.

¹⁸ Sonda Jaratqan İyenin' perishtesi payg'ambar Gadqa: «Ebus xalqınan bolg'an Ornannın' qırmanına barıp, sol jerde Jaratqan İyege arnap, qurbanlıq orın qursın», – degen xabardı Dawıtqa jetkeriwdi buyırdı.

¹⁹ Dawıt Jaratqan İyenin' Gad arqalı bergen buyrıg'ı boyınsha jolg'a shıqtı.

²⁰ Qırmanda biydayın aydatıp atırg'an Ornan artına qarag'anda, perishteni ko'rdi. Sonda onın' qasındag'ı to'rt ulı jasırınıp aldı.

²¹ Sol waqıtta Dawıt Ornang'a jaqınlap kiyatırg'an edi. Ornan Dawıttı ko'rgende, qırmannan shıqtı da, et-betinen jerge jıg'ılıp, Dawıtqa ta'jim etti.

²² Dawıt Ornang'a: – Mına qırman turg'an jerdi mag'an ber. Xalıqqa kelgen oba keselligi toqtaw ushın, men bul jerge Jaratqan İyege arnap qurbanlıq orın quraman. Qırman turg'an jerdi mag'an tolıq qunına sat, – dedi.

²³ Ornan Dawıtqa: – Ala berin'! Taqsır, neni maqul ko'rsen'iz, sonı islen'. Mine, o'gizlerdi jandırılatug'ın qurbanlıq ushın, tu'yek aydaytug'ın ag'ashtı otın ushın ha'm biydaydı g'a'lle sadaqası ushın beremen. Bulardın' ha'mmesin beremen, – dep juwap berdi.

²⁴ Biraq patsha Dawıt Ornang'a: – Yaq, bolmaydı! Bulardı tolıq qunın to'lep, satıp alaman. Sag'an tiyisli na'rselerdi Jaratqan İyege usınbayman. Tegin na'rseni jandırılatug'ın qurbanlıq etip usınbayman, – dedi.

²⁵ Solay etip, Dawıt bul jer ushın Ornang'a altı ju'z shekel altın to'ledi.

²⁶ Dawıt sol jerge Jaratqan İyege arnap qurbanlıq orın qurıp, jandırılatug'ın qurbanlıqlar ha'm tatıwlıq qurbanlıqların berdi. Ol Jaratqan İyege jalbarındı ha'm Jaratqan İye qurbanlıq orındag'ı jandırılatug'ın qurbanlıqqa aspannan ot jiberip, og'an juwap berdi

²⁷ Bunnan keyin, Jaratqan İye perishtege qılıshın qınabına salıp qoyıwdı buyırdı. Perishte buyrıqtı orınladı.

²⁸ Dawıt ebus xalqınan bolg'an Ornannın' qırmanında Jaratqan İyenin' o'zine juwap bergenin ko'rgende, ol jerde qurbanlıqlar shaldı.

²⁹ Sho'lde Jaratqan İyege arnap Muwsa qurdırg'an shatır ha'm jandırılatug'ın qurbanlıq beriletug'ın qurbanlıq orın sol waqıtta Gibondag'ı sıyınıw ornında edi.

³⁰ Biraq Dawıt Jaratqan İyenin' perishtesinin' qılıshınan qorqqanlıqtan, Qudaydın' erkin biliw ushın ol jerge bara almadı.