1 Jılnama 28 bob

Dawıttın' İbadatxana ushın jobası(1-21).

¹ Dawıt İzraildag'ı barlıq ha'meldarlardı – urıw basshıların, patshanın' xızmetindegi a'skeriy bo'limlerdin' basshıların, mın'basılardı, ju'zbasılardı, patshag'a ha'm onın' ullarına tiyisli mu'liklerdi ha'm su'riwlerdi qadag'alawshılardı, saray xızmetkerlerin, a'hmiyetli adamlardı ha'm barlıq ma'rt jawıngerlerdi Erusalimge jıynadı.

² Dawıt patsha ayaqqa turıp, olarg'a bılay dedi: «Tuwısqanlarım ha'm xalqım, meni tın'lan'lar! Qudaydın' ayaq qoyg'ıshı bolg'an Jaratqan İyenin' Kelisim sandıg'ı ushın turaqlı orın bolatug'ın bir İbadatxana qurmaqshı edim. Qurılıs ushın tayarlıq ta ko'rdim.

³ Biraq Quday mag'an: „Menin' atıma arnap İbadatxana qurmaysan'. Sebebi sen ko'p urısıp, qan to'kken adamsan'“, – dedi.

⁴ Degen menen, İzraildın' Qudayı Jaratqan İye menin' urpaqlarımnın' ma'n'gige İzrailda patsha bolıwı ushın, a'kemnin' pu'tkil na'sili arasınan meni tan'ladı. Ol Yahudanı basshı etip tan'ladı ha'm Yahuda urıwınan a'kemnin' shan'arag'ın, al a'kemnin' ulları arasınan meni tan'lap, pu'tkil İzraildın' patshası qılıwdı maqul taptı.

⁵ Jaratqan İye mag'an ko'p ullar berip, olardın' arasınan İzrail u'stinen Jaratqan İyenin' patshalıq taxtında otırıwı ushın ulım Sulaymandı tan'ladı.

⁶ Jaratqan İye mag'an bılay dedi: „Menin' İbadatxanamdı ha'm ha'wlilerimdi ulın' Sulayman quradı. O'ytkeni Men onı O'zime ul etip tan'ladım. Men de og'an A'ke bolaman.

⁷ Eger ol Menin' buyrıq ha'm nızamlarımdı ha'zirgidey buljıtpay orınlaytug'ın bolsa, onın' patshalıg'ın ma'n'gige bekkemleymen“.

⁸ Endi Qudayımızdın' aldında ha'm Jaratqan İyenin' ja'miyeti bolg'an İzrail xalqının' ko'zi aldında sizlerge tapsıraman: Qudayın'ız Jaratqan İyenin' barlıq buyrıqların muqıyatlı tu'rde orınlan'lar. Sonda sizler usı bereketli jerdi ma'n'gige iyelep, a'wladların'ızg'a ma'n'gige miyras etip beresizler

⁹ Al sen, ulım Sulayman, a'ken'nin' Qudayın tanıp bil ha'm shın ju'rekten, jan-ta'nin' menen Og'an xızmet et. Sebebi Jaratqan İye ha'r bir ju'rekti sınaydı ha'm barlıq oy-qıyallardı tu'sinedi. Eger Onı izlesen', sen Onı tabasan'. Biraq sen Onı ta'rk etsen', Ol sennen ma'n'gige ju'z buradı.

¹⁰ Qulaq sal! Muxaddes ma'kan bolg'an İbadatxananı qurıw ushın Jaratqan İye seni tan'lag'an eken, sen de ma'rt bolıp iske kiris!»

¹¹ Keyin Dawıt İbadatxananın' aywanının', onın' imaratlarının', zatlar saqlanatug'ın bo'lmelerinin', joqarg'ı qabatının', ishki bo'lmelerinin' ha'm gu'nadan pa'klenetug'ın orınnın' sızılmasın ulı Sulaymang'a berdi.

¹² Dawıt Muxaddes Ruwx arqalı o'zine ayan bolg'an barlıq sızılmalardı: Jaratqan İyenin' İbadatxanasının' ha'wlisi menen do'geregindegi barlıq bo'lmelerdin', Qudaydın' İbadatxanasının' g'a'ziynexanalarının', bag'ıshlang'an sawg'alar qoyılatug'ın bo'lmelerdin' sızılmalarının' barlıg'ın Sulaymang'a tapsırdı.

¹³ Dawıt Sulaymang'a ruwxaniyler menen lebiylilerdin' toparlarına, olardın' Jaratqan İyenin' İbadatxanasındag'ı barlıq xızmetlerine ha'm xızmette qollanılatug'ın barlıq buyımlarg'a baylanıslı ko'rsetpeler berdi.

¹⁴ Ol ha'r tu'rli xızmetlerde qollanılatug'ın altın ha'm gu'mis buyımlardı isletiwge kerek bolg'an altın ha'm gu'mistin' mug'darın da belgilep qoydı:

¹⁵ ha'r bir shıra ha'm ha'stenin' paydalanılatug'ın xızmetine qaray, ha'r bir altın ha'ste menen onın' shıraları ushın qansha altın, ha'r bir gu'mis ha'ste menen onın' shıraları ushın qansha gu'mis ketetug'ının ayttı.

¹⁶ Sonday-aq, usınılg'an nanlar qoyılatug'ın stollar ushın ketetug'ın altınnın', gu'mis stollar ushın ketetug'ın gu'mistin',

¹⁷ shanıshqı, qan sebetug'ın tabaqlar, gu'ze ushın ketetug'ın sap altınnın', ha'r bir altın tostag'an ushın jumsalatug'ın altınnın', ha'r bir gu'mis tostag'an ushın isletiletug'ın gu'mistin',

¹⁸ tu'tetki tu'tetiletug'ın orın ushın ketetug'ın sap altınnın' mo'lsherin bildirdi. Bunnan tısqarı, Dawıt og'an arbanın', yag'nıy qanatların jayıp, Jaratqan İyenin' Kelisim sandıg'ın jawıp turatug'ın altın kerublardın' sızılmasın da berdi.

¹⁹ Dawıt: «Bulardın' ha'mmesi Jaratqan İyenin' ko'rsetpesi boyınsha jazılıp, jobalastırıldı. Ol mag'an jobanı tolıq tu'siniwge qa'bilet berdi», – dedi.

²⁰ Keyin Dawıt ulı Sulaymang'a bılay dedi: «Ma'rt ha'm batır bolıp, iske kiris! Qorqpa, ruwxın' tu'spesin. Sebebi Quday İye, yag'nıy menin' Qudayım senin' menen birge. Jaratqan İyenin' İbadatxanasının' barlıq isleri tamam bolmag'ansha, Ol seni taslap ta qoymaydı, ta'rk te etpeydi.

²¹ Mine, ruwxaniyler menen lebiylilerdin' toparları Qudaydın' İbadatxanasındag'ı ha'r qanday jumıs ushın tayar tur. Ha'r tu'rli tarawdın' sheber o'nermentleri bolg'an qa'lewshiler sag'an ja'rdem beredi. Al basshılar menen pu'tkil xalıq senin' buyrıqların'a boysınadı».