1 Jılnama 29 bob

İbadatxananın' qurılısı ushın berilgen sawg'alar(1-9),Dawıttın' duwası(10-20),Sulaymannın' maylanıp, patsha bolıwı(21-25),Dawıttın' o'limi(26-30).

¹ Dawıt patsha pu'tkil ja'miyetke bılay dedi: «Quday tan'lap alg'an ulım Sulayman jas ha'm ta'jiriybesiz. Al qılınatug'ın is ju'da' u'lken. Sebebi bul imarat adam ushın emes, al Quday İye ushın salınadı.

² Qudayımnın' İbadatxanası ushın qolımnan kelgeninshe altın buyımlar ushın altın, gu'mis buyımlar ushın gu'mis, qola buyımlar ushın qola, temir buyımlar ushın temir, ag'ash buyımlar ushın ag'ash, ja'ne de, oniks, qasnaqqa qoyılatug'ın taslar, periwza, ha'r tu'rdegi ren'li taslar, sonday-aq, qımbatbaha taslar menen mramordın' ha'mme tu'rlerin jıynadım.

³ Bulardan tısqarı, Qudayımnın' İbadatxanasına bolg'an ıqlasım sebepli, o'zimnin' jeke qaznamdag'ı altın menen gu'misti de Qudayımnın' İbadatxanasına beremen. Olardı bul muxaddes İbadatxana ushın o'zim tayarladım.

⁴ Men berip atırg'an u'sh mın' talant Ofir altını menen jeti mın' talant sap gu'mis İbadatxananın' diywalların qaplaw,

⁵ barlıq altın ha'm gu'mis buyımlardı islew ushın ha'm o'nermentlerdin' barlıq islerinde qollanılsın. Ja'ne de, kim bu'gin o'zin Jaratqan İyege bag'ıshlap, Og'an o'z ıqtıyarı menen sadaqa beriwdi qa'leydi?»

⁶ Sonda a'wlad basshıları, İzraildın' urıw basshıları, mın'basılar, ju'zbasılar ha'm patshanın' islerin basqaratug'ın xızmetkerler ıqtıyarlı sadaqalar berdi.

⁷ Olar Qudaydın' İbadatxanasının' qurılısı ushın bes mın' talant altın menen on mın' darik altın, on mın' talant gu'mis, on segiz mın' talant qola ha'm ju'z mın' talant temir sawg'a qıldı.

⁸ Bahalı tasları bar adamlar olardı Jaratqan İyenin' İbadatxanasının' qaznasına, Gershonnın' urpag'ınan bolg'an Exieldin' qolına tapsırdı.

⁹ Xalıq o'z basshılarının' ıqtıyarlı tu'rde bergen sıyları ushın quwandı. O'ytkeni olar Jaratqan İyege shın ju'rekten ıqtıyarlı tu'rde sadaqalar berip atırg'an edi. Dawıt patsha da qattı quwandı.

¹⁰ Dawıt pu'tkil ja'miyettin' ko'z aldında Jaratqan İyeni alg'ıslap, bılay dedi: «Babamız İzraildın' Qudayı Jaratqan İye, Ma'n'gige Sag'an alg'ıslar bolsın.

¹¹ Jaratqan İye, ullılıq, qu'diret, dan'q, Jen'is ha'm saltanat Seniki. Aspanda ha'm jerde bolg'an ha'r bir na'rse Seniki. Patshalıq ta Seniki, Jaratqan İye! Sen ha'r bir na'rseden joqarısan'.

¹² Baylıq ha'm hu'rmet Sennen keler. Ha'mme na'rsege hu'kimdarsan'. Ku'sh ha'm qu'diret Senin' qolın'da. Birewdi joqarılatıw ha'm ku'shli qılıw, Senin' qolın'da.

¹³ Endi, Qudayımız, Seni ta'riyiplep, A'jayıp atın'a alg'ıs-maqtawlar aytamız.

¹⁴ Biraq Sag'an ıqtıyarlı sadaqalar bere alatug'ınday, men kimmen, xalqım kim bolıptı? Ha'r bir na'rse Sennen shıg'adı, bizler tek Senin' qolın'nan alg'anlarımızdı g'ana Sag'an berip atırmız.

¹⁵ Senin' aldın'da bizler ata-babalarımız sıyaqlı, jat jerli kelgindimiz. Jer ju'zindegi o'mirimiz ko'len'ke sıyaqlı o'tkinshi ha'm u'mitsiz.

¹⁶ Qudayımız, Jaratqan İye, muxaddes atın'a arnap İbadatxana qurıw ushın bizler tayarlag'an mına ag'ıl-tegil baylıqtı Senin' qolın'nan alg'anbız, ha'mmesi Seniki.

¹⁷ Qudayım, men Senin' ju'rekti sınaytug'ının'dı ha'm hadallıqtı unatatug'ının'dı bilemen. Mına na'rselerdin' ha'mmesin men shın ju'rekten ıqtıyarlı tu'rde berdim. Ha'zir usı jerde turg'an xalqın'nın' da Sag'an ıqtıyarlı sadaqalar berip atırg'anın quwanısh penen ko'rip turman.

¹⁸ Jaratqan İye, babalarımız İbrayımnın', Isaqtın' ha'm İzraildın' Qudayı! Xalqın'nın' bul qa'lewin ma'n'gige olardın' ju'reginde saqlap, ju'reklerin O'zin'e sadıq qa'lpinde saqlap qala go'r!

¹⁹ Ulım Sulaymang'a da Senin' buyrıqların'a, qararların'a ha'm qag'ıydaların'a boysınıwı ushın, ja'ne de men kerekli zatlardı tayarlap qoyg'an İbadatxananı qurıwı ushın sadıq ju'rek bere go'r!»

²⁰ Son'ınan Dawıt pu'tkil ja'miyetke: «Qudayın'ız Jaratqan İyeni alg'ıslan'lar!» – dedi. Solay etip, ha'mmesi ata-babalarının' Qudayı Jaratqan İyeni alg'ısladı, Qudaydın' ha'm patshanın' aldında basların iyip, ta'jim etti.

²¹ Kelesi ku'ni xalıq Jaratqan İyege arnap, mın' bas bug'a, mın' bas qoshqar, mın' toqlı shalıp, jandırılatug'ın qurbanlıqlar berdi. Bularg'a qosa, ishimlik sadaqaların da usındı. Pu'tkil izraillılar ushın basqa da ko'p qurbanlıqlar berildi.

²² ol ku'ni izraillılar u'lken quwanısh penen Jaratqan İyenin' aldında iship-jedi. Keyin, Dawıttın' ulı Sulaymandı ekinshi ma'rte patsha dep tastıyıqladı. Sulaymandı Jaratqan İyenin' aldında maylap, hu'kimdar, al Sadoqtı maylap, ruwxaniy etip qoydı.

²³ Solay etip, Sulayman a'kesi Dawıttın' ornına patsha bolıp, Jaratqan İyenin' bergen taxtına otırdı. Ol tabıslı bolıp, pu'tkil İzrail og'an boysındı.

²⁴ Barlıq basshılar, batırlar ha'm Dawıttın' ulları patsha Sulaymang'a bag'ındı.

²⁵ Jaratqan İye pu'tkil İzraildın' ko'z aldında Sulaymandı ullı ma'rtebeli qıldı ha'm onı burıng'ı İzraildag'ı patshalardın' hesh biri erise almag'an saltanatqa bo'ledi.

²⁶ İshay ulı Dawıt pu'tkil İzrail u'stinen patshalıq etti.

²⁷ Onın' İzrail u'stinen patshalıq etken waqtı qırıq jıl bolıp, jeti jıl Xebronda, otız u'sh jıl Erusalimde patshalıq etti.

²⁸ Dawıt o'mirdin' ra'ha'tin ko'rip, baylıqqa ha'm izzet-hu'rmetke tolı ku'nlerdi bastan keshirdi ha'm mazmunlı uzaq o'mir su'rip, bul du'nyadan ko'z jumdı. Onın' ornına ulı Sulayman patsha boldı.

²⁹ Dawıt patshanın' patshalıq qurg'an da'wirindegi islegen isleri basınan ayag'ına shekem ko'zi ashıq Samueldin', payg'ambar Natannın', wa'liy Gadtın' qol jazbalarında jazılg'an.

³⁰ Bul jazbalar Dawıttın' patshalıg'ı da'wirindegi isler, onın' qu'direti, onın' basınan keshirgen waqıyaları, İzrailda ha'm do'gerektegi barlıq ellerde bolg'an waqıyalar tuwralı bayan etedi.