2 Jılnama 20 bob
1 Aradan biraz waqıt o'tkennen keyin, moablar, ammonlar ha'm maon xalqının' bir bo'legi Ehoshafatqa qarsı urıs ashıw ushın jolg'a shıqtı.
2 Sonda xabarshılar kelip Ehoshafatqa: «Edomnan, O'li ten'izdin' arg'ı ta'repinen sizge urıs ashıw ushın u'lken orda kiyatır. Olar ha'zir XasesonTamarg'a, yag'nıy En-Gediyge jetip qaldı», – dep xabarladı.
3 Qorqıp ketken Ehoshafat Jaratqan İyenin' erkin biliwge qarar etti ha'm pu'tkil Yahuda boylap oraza tutıwdı ja'riyaladı.
4 Sonda Jaratqan İyeden ja'rdem soraw ushın, Yahudanın' barlıq qalalarınan xalıq ag'ılıp kelip, Erusalimge jıynaldı.
5 Ehoshafat Yahuda ha'm Erusalim jıyınında, Jaratqan İyenin' İbadatxanasının' jan'a ha'wlisi aldında turıp,
6 bılay dep duwa etti: «Ha'y, ata-babalarımızdın' Qudayı Jaratqan İye! Ko'klerdegi Quday Sen emespisen'? Sen xalıqlardın' barlıq patshalıqlarına biylik etesen'. Ku'sh ha'm qu'diret Senin' qolın'da. Sag'an hesh kim de qarsı tura almaydı.
7 Qudayımız! Usı eldin' burıng'ı turg'ınların O'z xalqın' İzraildın' aldınan quwıp shıg'ıp, eldi O'z dostın' İbrayımnın' urpaqlarına ma'n'gige bergen Sen emespisen'?
8 Olar usı elde qonıs basıp, Senin' atın'a arnap Muxaddes orın qurdı ha'm bılay degen edi:
9 „Eger apat, yag'nıy qılıshtan jazalanıw, illet yamasa ashlıq basımızg'a tu'sse, O'zin' bar bolg'an usı İbadatxananın' aldına, Senin' aldın'a kelip, qıyınshılıq ishinde Sag'an jalbarınamız, Sen de bizlerdi esitip, qutqarasan'“.
10 Mine, Ammon, Moab ha'm tawlı Seir u'lkesinin' turg'ınlarının' ne islep atırg'anına qara! İzraillılar Mısırdan shıqqanda, Sen olarg'a sol xalıqlardın' jerlerine kiriwge ruxsat bermedin'. Sonlıqtan olardı aylanıp o'tip, olardı qırıp jibermegen edi.
11 Endi bolsa, bul xalıqlardın' bizge berip atırg'an sawg'asına qarap qoy! Sen bizlerge mu'lik etip bergen jerden olar bizlerdi quwıp shıg'arıwg'a kiyatır.
12 O Qudayımız, Sen olardı jazalay go'r! Sebebi bizlerde o'zimizge bastırıp kiyatırg'an bul u'lken ordag'a qarsılıq qılatug'ın ku'sh joq. Bizler ne qılıwdı bilmeymiz, biraq ko'z tigip, Sennen u'mit etemiz».
13 Sol waqıtta pu'tkil Yahuda erkekleri na'resteleri, hayalları ha'm balaları menen birge Jaratqan İyenin' aldında turg'an edi
14 Sonda jıyın ortasında turg'an Yaxazielge Jaratqan İyenin' Ruwxı tu'sti. Asaf urpag'ınan shıqqan lebiyli Yaxaziel Mattaniyanın' quwlıg'ı, Eieldin' shawlıg'ı, Benayanın' aqlıg'ı, Zexariyanın' ulı edi.
15 Yaxaziel til qatıp, bılay dedi: «Ha'y, pu'tkil Yahuda menen Erusalim turg'ınları ha'm patsha Ehoshafat, tın'lan'lar! Jaratqan İye sizlerge bılay deydi: „Bul san-sanaqsız la'shkerlerden qorqıp, qa'weterlenben'. Bul urıs sizlerdiki emes, Meniki, yag'nıy Qudaydiki.
16 Erten' olarg'a qarsı to'men qaray ju'risti baslan'. Olar Siske baratug'ın jol arqalı ko'terilip kiyatır. Sizler olardı Eruel sho'linin' aldındag'ı oyıpatlıqtın' aqırında ushıratasız.
17 Biraq sizler urıspaysız. Tek barıp, ornın'ızdı iyelep turıp, Jaratqan İyenin' qutqarıwın ko'resiz. Ha'y, Yahuda ha'm Erusalim xalqı! Qorqıp, qa'weterlenben'. Erten' olarg'a hu'jim qılın', Jaratqan İye bolg'an Men sizler menen birge bolaman“».
18 Ehoshafat bası jerge tiygenshe iyilip ta'jim etti. Pu'tkil Yahuda ha'm Erusalim xalqı da ta'jim etip, Jaratqan İyege sıyındı.
19 Qohat ha'm Qorax urpaqlarınan tarag'an lebiyliler orınlarınan turıp, ba'lent dawıs penen İzraildın' Qudayı Jaratqan İyege alg'ıs-maqtaw ayttı.
20 Ehoshafattın' la'shkerleri erten'ine azanda erte turıp, Teqoa sho'line atlandı. Olar jolg'a shıg'ıp baratırg'anda Ehoshafat toqtap olarg'a: «Ha'y Yahuda ha'm Erusalim turg'ınları, meni tın'lan'! Qudayın'ız Jaratqan İyege isenin', sonda biyqa'ter bolasız! Onın' payg'ambarlarına isenin', sonda tabısqa erisesiz» – dedi.
21 Ehoshafat xalıq penen ken'esip bolg'annan keyin, Jaratqan İyege arnap qosıq aytatug'ın ha'm Onın' muxaddes saltanatın ta'riyipleytug'ın qosıqshılardı tayınladı. Olar a'skerlerdin' aldında ju'rip: «Jaratqan İyeni ta'riyiplen', Onın' sadıqlıg'ı ma'n'gi dawam etedi», – dep qosıq aytıwı kerek edi.
22 Olar qosıq ha'm alg'ıs aytıp baslag'an waqıtta-aq, Jaratqan İye Yahudag'a urıs ashıw ushın kelgen ammon, moab xalıqlarına ha'm tawlı Seir u'lkesinin' turg'ınlarına duzaq qurdı ha'm olar qırıldı.
23 Sebebi ammon ha'm moab xalqı qırıp taslaw ushın, tawlı Seir u'lkesinin' turg'ınlarına bas saldı. Olardı qırıp bolg'annan keyin bolsa, Ammon ha'm moab xalqı bir-birin qıra basladı.
24 Yahuda xalqı sho'l daladag'ı gu'zetshi minarasına jetip, dushpan ordasına ko'z jibergende, olar tek jerde jatqan o'li denelerdi ko'rdi. Olardın' birewi de qashıp qutılmag'an eken.
25 Ehoshafat o'z adamları menen olardan qalg'an na'rselerdi oljalaw ushın kelgende, ju'da' ko'p qural-saymanlar, kiyim-kenshekler ha'm qımbatbaha na'rselerdi taptı. Olar ko'tere alg'andayın alıp ketti. Oljanın' ko'pligi sonsha, onı jıynawg'a u'sh ku'n ketti.
26 Al to'rtinshi ku'ni olar bir oypatlıqqa jıynalıp, Jaratqan İyeni alg'ısladı. Sonlıqtan ol jer bu'gin de Beraxa oypatlıg'ı dep ataladı.
27 Keyin pu'tkil Yahuda ha'm Erusalim xalqı Ehoshafattın' basshılıg'ında quwanısh penen Erusalimge qayttı. Sebebi Jaratqan İye olardı dushpanlarınan qutqarıp, quwanıshqa bo'legen edi.
28 Olar lira, arfa ha'm ka'rnay naması astında Erusalimge kirip, Jaratqan İyenin' İbadatxanasına bet aldı.
29 İzraildın' dushpanlarına qarsı Jaratqan İyenin' O'zinin' urısqanın esitkende, a'tiraptag'ı patshalar Qudaydan qorqıp qaldı.
30 Ehoshafattın' patshalıg'ında tınıshlıq hu'kim su'rdi. Onın' Qudayı og'an ha'r ta'repleme paraxatshılıq sıylag'an edi.
31 Solay etip, Ehoshafat Yahudag'a patshalıq etti. Ol otız bes jasında patsha bolıp, Erusalimde jigirma bes jıl patshalıq etti. Onın' anasının' atı Azuba bolıp, ol Shilxiydin' qızı edi.
32 Ehoshafat a'kesi Asanın' jolınan ju'rip, sol joldan shıqpay, Jaratqan İyenin' na'zerinde tuwrı bolg'an islerdi isledi.
33 Biraq sıyınıw orınların joq qılmadı. Sonlıqtan xalıq ele ata-babalarının' Qudayına tolıq ju'z burmadı.
34 Ehoshafattın' basqa isleri bastan aqırına deyin, İzrail patshalarının' jılnama kitabının' bir bo'limi bolg'an Xananiy ulı Ehu jazg'an jılnama kitabında bayan etilgen.
35 Keyinirek Yahuda patshası Ehoshafat jaman islerge ha'wes bolg'an İzrail patshası Axaziya menen tınıshlıq kelisimin du'zdi.
36 Olar Tarshishke jiberiw ushın keme soqtırıwg'a kelisip aldı. Kemeler Esion-Geberde sog'ıldı.
37 Sonda mareshalı Dodawahu ulı Eliezer Ehoshafatqa qarsı payg'ambarshılıq etip: «Sen Axaziya menen kelisim du'zgenin' ushın, Jaratqan İye senin' isin'di joq qıladı», – dedi. Kemeler apatqa ushırap, Tarshishke jete almadı.
