2 Jılnama 34 bob
1 İoshiya segiz jasında patsha bolıp, Erusalimde otız bir jıl patshalıq etti.
2 Ol Jaratqan İyenin' na'zerinde tuwrı bolg'an islerdi isledi ha'm on'g'a da solg'a da burılmay, babası Dawıttın' jolınan ju'rdi.
3 İoshiya o'z patshalıg'ının' segizinshi jılında, ele jas bolsa da, babası Dawıttın' Qudayın izley basladı. Al o'z patshalıg'ının' on ekinshi jılı Yahuda menen Erusalimdi sıyınıw orınlarınan, kiyeli ag'ashlardan, oyma ha'm quyma butlardın' mu'sinlerinen tazalay basladı.
4 Onın' basshılıg'ında Baallarg'a arnalg'an qurbanlıq orınlar buzıp taslandı, olardın' janındag'ı tu'tetki tu'tetiletug'ın orınlar qıyratıldı, kiyeli ag'ashlar menen oyma ha'm quyma butlardın' mu'sinleri maydalanıp, usı butlarg'a qurbanlıq bergenlerdin' qa'birleri u'stine shashıldı.
5 İoshiya butqa xızmet etetug'ın ruwxaniylerdin' su'yeklerin o'zlerinin' qurbanlıq orınlarının' u'stinde otqa jaqtı. Usılayınsha ol Yahuda menen Erusalimdi pa'kledi.
6 Keyin İoshiya Menashshe, Efrayım, Shimon urıwlarının' qalalarınan Naftaliy jerlerine deyin ha'm olardın' qıyrap qalg'an aymaqlarındag'ı.
7 qurbanlıq orınlardı, kiyeli ag'ashlardı kesti ha'm butlardı maydalap ezdi. Ol pu'tkil İzrail eli boylap tu'tetki tu'tetiletug'ın orınlardı qıyratıp, son'ınan Erusalimge qaytıp keldi.
8 O'z patshalıg'ının' on segizinshi jılında, eldi ha'm İbadatxananı pa'klegennen son', patsha İoshiya Asaliya ulı Shafandı, qala ha'kimi Maaseyanı ha'm jılnamashı Ehoaxaz ulı İoaxtı Qudayı Jaratqan İyenin' İbadatxanasın qayta tiklew ushın jiberdi.
9 Olar bas ruwxaniy Xilkiyag'a barıp, Qudaydın' İbadatxanasına alıp kelingen barlıq gu'mislerdi og'an berdi. Bosag'adag'ı qadag'alawshı ruwxaniyler bolg'an lebiyliler bul gu'mislerdi Menashshe ha'm Efrayım xalqınan, basqa barlıq izraillılardan, barlıq Yahuda ha'm Benyamin xalqınan, ja'ne Erusalim turg'ınlarınan jıynag'an edi.
10 Olar gu'mislerdi Jaratqan İyenin' İbadatxanasındag'ı islerdi baqlaw ushın tayınlang'an adamlarg'a berdi. Baqlawshılar bunı İbadatxananın' buzılg'an jerlerin du'zetip, qayta tiklep atırg'an jumısshılarg'a to'ledi.
11 Qarjının' bir bo'legi ustalar menen qurılısshılarg'a da berilip, olar sol gu'mislerge Yahuda patshaları qarawsız qaldırg'an imaratlardı on'law ushın, jonılg'an taslar ha'm bag'analar menen arqalıq ag'ashlar satıp aldı.
12 Bul adamlar jumısın hadal isledi. Olardın' u'stinen Merariy urpag'ınan lebiyli Yaxat penen Obadiyanı ha'm Qohat urpag'ınan lebiyli Zexariya menen Meshullamdı baqlawshı etip qoydı. Saz a'sbapların jaqsı shertetug'ın barlıq lebiyliler.
13 ju'k tasıwshılardı ha'm ha'r bir imarattag'ı ha'mme jumısshılardı baqlap ju'rdi. Lebiylilerden ayırımları xatkerler, qadag'alawshılar ha'm da'rwaza qarawılları xızmetin atqardı.
14 Jaratqan İyenin' İbadatxanasına a'kelingen gu'misti alıp shıg'ıp baratırıp, ruwxaniy Xilkiya Jaratqan İyenin' Muwsa arqalı bergen Nızam kitabın tawıp aldı.
15 Xilkiya xatker Shafang'a: «Men Jaratqan İyenin' İbadatxanasınan Nızam kitabın taptım», – dep, kitaptı Shafang'a berdi.
16 Shafan kitaptı patshag'a alıp kelip, og'an: «Qulların'ız o'zlerine tapsırılg'annın' ha'mmesin islep atır.
17 Olar Jaratqan İyenin' İbadatxanasındag'ı bar gu'mislerdi alıp, baqlawshılar menen jumısshılarg'a berdi», – dep xabar berdi.
18 Son'ınan xatker Shafan: «Ruwxaniy Xilkiya mag'an bir kitap berdi», – dedi ha'm kitaptı patshag'a dawıslap oqıp berdi.
19 Patsha Nızam kitabındag'ı so'zlerdi esitkende, kiyimlerin jırttı.
20 Ol Xilkiyag'a, Shafan ulı Axiqamg'a, Mixa ulı Abdong'a, xatker Shafang'a ha'm o'z xızmetshisi Asayag'a bılay dep buyırdı:
21 «Barıp, tabılg'an bul kitaptın' so'zleri haqqında men ushın da, İzrail ha'm Yahuda xalqının' qalg'anları ushın da, Jaratqan İyenin' erkin soran'lar. Jaratqan İyenin' u'stimizge jawdıratug'ın g'a'zebi ullı, sebebi atababalarımız Jaratqan İyenin' so'zine a'mel qılmadı. Olar bul kitapta jazılg'anlarg'a say is tutpadı».
22 Ruwxaniy Xilkiya menen patsha jibergen adamlar barıp, Xasranın' aqlıg'ı Taqhattın' ulı bolg'an muxaddes kiyimlerge qarawshı Shallumnın' hayalı payg'ambar Xulda menen so'ylesti. Xulda Erusalimnin' taza bo'liminde jasaytug'ın edi.
23 Hayal olarg'a bılay dedi: «İzraildın' Qudayı Jaratqan İye bılay deydi: sizlerdi mag'an jibergen adamg'a bılay dep aytın'lar:
24 Jaratqan İye bılay deydi: „Yahuda patshasının' aldında oqılg'an kitapta jazılg'an barlıq na'letlerdi, yag'nıy apatshılıqlardı usı jerge ha'm ondag'ı xalıqqa jawdırmaqshıman.
25 Olar meni ta'rk etti ha'm basqa qudaylarg'a tu'tetki tu'tetip, pu'tkil isleri menen Menin' g'a'zebimdi keltirdi. Sonlıqtan bul jerge g'a'zebim to'giledi ha'm ol toqtamaydı“
26 Jaratqan İyenin' erkin biliw ushın sizlerdi jibergen Yahuda patshasına bılay dep aytın'lar: İzraildın' Qudayı Jaratqan İye sen esitken so'zler tuwralı bılay deydi:
27 „Bul jer ha'm ondag'ı xalıqqa qarsı aytqan so'zlerimdi esitkenin'de, ju'regin' ezildi ha'm Mag'an boysındın'. Sen Mag'an boysınıp, kiyimlerin'di jırtıp, Menin' aldımda jılag'anlıqtan, Men de seni esittim. Bul Jaratqan İyenin' so'zleri.
28 Sonlıqtan Men seni atababaların'a qosaman, tınıshlıq penen qa'birge qoyılasan'. Men bul jerge ha'm bul jerde jasaytug'ınlarg'a jawdıratug'ın hesh bir apatshılıqtı senin' ko'zin' ko'rmeydi“».Olar bul xabardı patshag'a jetkizdi.
29 Sonda patsha adam jiberip, Yahuda ha'm Erusalimnin' barlıq aqsaqalların jıynadı.
30 Ol Yahuda xalqın, Erusalim turg'ınların, ruwxaniylerdi, lebiylilerdi ha'm u'lkeninen kishkenesine deyingi pu'tkil xalıqtı ertip, Jaratqan İyenin' İbadatxanasına bardı. Keyin patsha olarg'a Jaratqan İyenin' İbadatxanasınan tabılg'an Kelisim kitabın basınan ayag'ına deyin dawıslap oqıp berdi.
31 Patsha o'zinin' arnawlı ornında turıp, Jaratqan İyenin' aldında kelisim du'zdi. Ol Jaratqan İyenin' jolı menen ju'rip, Onın' buyrıqların, qararların ha'm qag'ıydaların shın ju'rekten, jan-ta'ni menen orınlawg'a, usı kitapta jazılg'an kelisim so'zlerine a'mel qılıwg'a ant ishti.
32 Ol Erusalimde ha'm Benyamin jerinde jasaytug'ın adamlarg'a usı anttı tastıyıqlawdı buyırdı. Erusalim turg'ınları Qudaydın', ata-babalarının' Qudayının' kelisimine sadıq qaldı.
33 İoshiya İzrailg'a qaraslı barlıq aymaqlardag'ı jerkenishli butlardı alıp taslap, İzrailda jasaytug'ınlardın' ha'mmesine o'zlerinin' Qudayı Jaratqan İyege sıyınıwdı buyırdı. İoshiyanın' ko'zinin' tirisinde xalıq atababalarının' Qudayı Jaratqan İyenin' jolınan taymadı.
