2 Jılnama 35 bob
1 İoshiya Erusalimde Jaratqan İyenin' hu'rmetine Qutqarılıw bayramın nıshanladı. Birinshi aydın' on to'rtinshi ku'ni qurbanlıq qozıları shalındı.
2 oshiya ruwxaniylerdi o'z xızmetlerine qoyıp, Jaratqan İyenin' İbadatxanasındag'ı xızmetin orınlaw ushın, olardı jigerlendirdi.
3 Ol pu'tkil İzrail xalqına ta'lim berip kelgen, Jaratqan İyege bag'ıshlang'an lebiylilerge bılay dedi: «Muxaddes sandıqtı İzrail patshası Dawıttın' ulı Sulayman qurdırg'an İbadatxanag'a qoyın'lar. Onı artıq iyinlerin'izde ko'terip ju'riwdin' ha'jeti joq. Endi Qudayın'ız Jaratqan İyege ha'm Onın' xalqı İzrailg'a xızmet etin'ler!
4 İzrail patshası Dawıttın' ha'm onın' ulı Sulaymannın' ko'rsetpelerine muwapıq, a'wladın'ız ha'm toparların'ız boyınsha xızmetke tayarlanın'lar.
5 Muxaddes orında tuwısqanların'ız bolg'an xalıqtın' ha'r bir a'wladına lebiylilerdin' bir tobı xızmet etiwge tayar tursın.
6 Qurbanlıq qozısın soyıp, o'zlerin'izdi pa'klen'ler ha'm Jaratqan İyenin' Muwsa arqalı buyırg'anınday, qozılardı tuwısqanların'ız ushın tayınlan'lar».
7 İoshiya sol jerdegi xalıqqa Qutqarılıw qurbanlıg'ı ushın, mayda maldan otız mın' bas toqlı ha'm ılaq, iri maldan u'sh mın' bas bug'a sıyladı. Bulardın' ha'mmesi patshanın' jeke mu'lkinen berilgen edi.
8 Patshanın' wa'zirleri de ıqtıyarlı tu'rde xalıqqa, ruwxaniylerge ha'm lebiylilerge qurbanlıqlar sıyladı. Qudaydın' İbadatxanasının' basqarıwshıları Xilkiya, Zexariya ha'm Exiel de bayramg'a arnap, ruwxaniylerge Qutqarılıw qurbanlıg'ı ushın eki mın' altı ju'z mayda mal ha'm u'sh ju'z iri mal berdi.
9 Sonday-aq, Kenaniya ha'm onın' tuwısqanları Shemaya menen Netanel, ja'ne de lebiylilerdin' ko'semleri Xashabiya, Eiel ha'm İozabad bayramda Qutqarılıw qurbanlıg'ına shalıw ushın lebiylilerge bes mın' bas mayda mal ha'm bes ju'z bas iri mal berdi.
10 Xızmet ushın ha'mmesi tayar bolg'anda, patsha buyırg'anınday, ruwxaniyler o'z orınlarında, al lebiyliler o'z toparları menen tayar turdı.
11 Qurbanlıq qozıları soyılıp, ruwxaniyler o'zlerine berilgen qandı qurbanlıq orıng'a septi. Lebiyliler mallardı teriden ayırdı.
12 Olar Muwsanın' kitabında jazılg'anlarg'a muwapıq, Jaratqan İyege usınıwı ushın, qurbanlıqqa jandırılatug'ın mallardı xalıqtın' ha'r bir a'wladına bo'lip berdi. İri mallardı da solay isledi.
13 Qag'ıyda boyınsha, Qutqarılıw bayramının' qurbanlıg'ın otta quwırdı, muxaddes qurbanlıqlardı ha'r tu'rli qazanlarda asıp, pu'tkil xalıqqa asıg'ıs u'lestirdi.
14 Keyin lebiyliler o'zleri ha'm ruwxaniyler ushın awqat tayarladı. Sebebi Xaronnın' urpaqlarınan bolg'an ruwxaniyler qas qarayg'ansha jandırılatug'ın qurbanlıqlardı ha'm maldın' mayın o'rtew menen ba'nt edi. Sonlıqtan lebiyliler o'zleri ha'm Xaronnın' urpaqlarınan bolg'an ruwxaniyler ushın awqattı keyin tayarladı.
15 Asaf urpag'ınan bolg'an qosıqshılar Dawıt, Asaf, Heman ha'm patshanın' wa'liyi Edutunnın' buyrıg'ı boyınsha belgilengen orınlarında turdı. Da'rwazalardag'ı da'rwaza qarawıllarına o'z orınların taslap ketiwdin' ha'jeti bolmadı, sebebi olardın' tuwısqanları bolg'an lebiyliler olar ushın ha'mmesin tayar qıldı.
16 Solay etip, sol ku'ni patsha İoshiyanın' buyrıg'ına muwapıq, Qutqarılıw bayramın o'tkeriw ha'm Jaratqan İyenin' qurbanlıq ornında jandırılatug'ın qurbanlıqlar beriwge baylanıslı Jaratqan İyege arnalg'an ha'mme xızmetler orınlandı.
17 Sol ku'ni sol jerde bolg'an barlıq izraillılar Qutqarılıw bayramın nıshanladı ha'm og'an qosa, jeti ku'n boyı Ashıtqısız nan bayramın bayramladı.
18 Payg'ambar Samueldin' ku'nlerinen beri, İzrailda Qutqarılıw bayramı bunday etip nıshanlanbag'an edi. İzrail patshalarının' hesh biri de İoshiyanın' nıshanlag'anı sıyaqlı, ruwxaniyler, lebiyliler, pu'tkil Yahuda xalqı, sol jerdegi izraillılar ha'm Erusalim turg'ınları menen birge Qutqarılıw bayramın bayramlamag'an edi.
19 Usı Qutqarılıw bayramı İoshiyanın' patshalıg'ının' on segizinshi jılında bolıp o'tti.
20 Bul waqıyalardan son', İoshiya İbadatxananı ta'rtipke keltirip bolg'anda, Mısır patshası Nexo urısıw ushın Evfrat da'ryası boyındag'ı Karkemish qalasına keldi. Patsha İoshiya da Nexog'a qarsı ju'ris qıldı.
21 Biraq Nexo İoshiyag'a elshileri arqalı mına xabardı jiberdi: «Ha'y, Yahuda patshası! Menin' menen ne jumısın' bar? Bu'gin sag'an qarsı emes, al o'zim menen urısatug'ın patshalıqqa qarsı urısqa shıqtım. Quday mag'an asıg'ıwdı buyırdı, Ol men ta'repte. Sonlıqtan Og'an qarsı shıqpa, bolmasa nabıt bolasan'».
22 Biraq İoshiya Nexo menen urısıwdan waz keshpey, kiyimlerin o'zgertti. Qudaydın' Nexo arqalı aytqan so'zlerine de qulaq salmay, Megiddo oypatlıg'ında Nexo menen urısqa kiristi.
23 Sol jerde sadaqshılardın' og'ı patsha İoshiyag'a tiyip, ol xızmetshilerine: «Meni alıp ketin'ler, men awır jaraqatlandım», – dedi.
24 Xızmetshileri İoshiyanı arbasınan aldı da, basqa arbag'a mingizip, Erusalimge alıp keldi ha'm ol sol jerde qaytıs boldı. Onı ata-babalarının' qa'birine jerledi. Pu'tkil Yahuda ha'm Erusalim xalqı ol ushın joqlaw aytıp jıladı.
25 Eremiya payg'ambar İoshiyag'a arnap joqlaw jırın shıg'ardı. Usı ku'nge deyin qosıqshılar İoshiyanı joqlaw jırları arqalı eske aladı. Bul joqlawlar İzrailda da'stu'rge aylanıp, olar Joqlawlar kitabına kirgizilgen.
26 İoshiyanın' basqa isleri, Jaratqan İyenin' Nızamında jazılg'anlarg'a say alıp barg'an iygilikli isleri,
27 ha'mme waqıyalar basınan ayag'ına shekem İzrail ha'm Yahuda patshalarının' jılnama kitabında jazılg'an
