2 Jılnama 7 bob
1 Sulayman duwa etip bolıwdan-aq, aspannan ot tu'sip, jandırılatug'ın ha'm basqa qurbanlıqlardı jalmap ketti. Jaratqan İyenin' saltanatı İbadatxananı toltırdı.
2 Jaratqan İyenin' saltanatının' O'z İbadatxanasın toltırg'anı sonshelli, ruwxaniyler İbadatxanag'a kire almadı.
3 Pu'tkil İzrail xalqı aspannan tu'sken ottı ha'm İbadatxana u'stindegi Jaratqan İyenin' saltanatın ko'rgende, tas to'selgen alan'da et-betinen jerge jıg'ılıp, ta'jim etti ha'm: «Jaratqan İye iygilikli, Onın' sadıqlıg'ı ma'n'gilik», – dep ta'riyipledi.
4 Son'ınan patsha ha'm pu'tkil xalıq Jaratqan İyege arnap qurbanlıq shaldı.
5 Patsha Sulayman jigirma eki mın' bas bug'a ha'm bir ju'z jigirma mın' bas qoydı Jaratqan İyege arnap, qurbanlıqqa shaldı. Solay etip, patsha ha'm pu'tkil xalıq Qudaydın' İbadatxanasın bag'ıshladı.
6 Ruwxaniyler o'z xızmet orınların iyeledi. Lebiyliler de Jaratqan İyeni ta'riyiplew ushın patsha Dawıt soqtırg'an saz a'sbapların qollarına alıp turdı. Dawıttın' o'zi de: «Onın' sadıqlıg'ı ma'n'gi dawam etedi», – dep ta'riyiplegende, usı a'sbaplardan paydalang'an edi. Lebiylilerdin' qarsısında turg'an ruwxaniyler ka'rnayların shaldı, pu'tkil İzrail xalqı tik ayaqta turg'an edi.
7 Sulayman Jaratqan İyenin' İbadatxanasının' aldındag'ı ha'wlinin' ortang'ı bo'legin de muxaddes qılıp ayırıp, jandırılatug'ın qurbanlıqlardı ha'm tatıwlıq qurbanlıqlarının' mayların sol jerde berdi. O'ytkeni o'zi qoladan isletken qurbanlıq orıng'a jandırılatug'ın qurbanlıqlar menen g'a'lle sadaqaları ha'm de tatıwlıq qurbanlıqlarının' mayları sıymay ketti.
8 Sol waqıtta Sulayman ha'm u'lken ja'miyet – Lebo-Xamattan Mısır shegarasındag'ı sayg'a deyingi jerlerde jasaytug'ın pu'tkil İzrail xalqı Qos bayramın jeti ku'n nıshanladı.
9 Segizinshi ku'ni saltanatlı jıynalıs o'tkerdi. Olar jeti ku'n dawamında qurbanlıq orındı bag'ıshlaw ra'siminen o'tkergennen keyin, jeti ku'n bayramdı nıshanlag'an edi.
10 Jetinshi aydın' jigirma u'shinshi ku'ni Sulayman xalıqtı u'ylerine qaytardı. Jaratqan İyenin' Dawıtqa, Sulaymang'a ha'm O'z xalqı İzrailg'a islegen jaqsılıqlarına quwanıp, olardın' ju'rekleri tolıp-tastı.
11 Sulayman Jaratqan İyenin' İbadatxanasın ha'm o'zinin' sarayın salıp, niyetlegen isinin' ha'mmesin tabıslı tamamlag'annan son',
12 tu'nde Jaratqan İye og'an ja'ne ko'rinip, bılay dedi: «Men senin' duwaların'dı esittim ha'm bul jerdi O'zime qurbanlıq shalınatug'ın İbadatxana qılıp tan'ladım.
13 Eger Men jawın jawmasın dep aspandı jawıp taslasam, yaki shegirtkelerge jer betindegilerdi jep taslawdı buyırsam, yaki xalqıma oba jibersem,
14 sonda Menin' atım menen atalatug'ın xalqım Mag'an ta'wbe qılıp, duwa etse, Mag'an ju'z burıp, jaman jollarınan qaytsa, onda Men aspannan olarg'a qulaq salaman. Olardın' gu'naların keshirip, jerlerin shıpalayman.
15 Bunnan bılay, usı jerde qılınatug'ın duwalarg'a na'zerimdi salaman, qulaqlarım tu'riwli boladı.
16 Atımnın' ma'n'gige sol jerde bolıwı ushın, usı İbadatxananı tan'lap alıp, muxaddes qıldım. Menin' ko'zlerim ha'm ju'regim ba'rqulla sol jerde boladı.
17 Sag'an kelsek, Menin' aldımda a'ken' Dawıtqa uqsap ju'rsen', barlıq buyrıqlarımdı orınlap, qag'ıyda ha'm nızamlarıma boysınıp jasasan',
18 onda: „İzrail taxtınan senin' urpag'ın'nın' izi u'zilmeydi“ – dep a'ken' Dawıtqa bergen so'zimde turıp, patshalıq taxtın'dı ma'n'gige turatug'ın qılaman.
19 Biraq eger sizler jolımnan tayıp, bergen qag'ıyda ha'm buyrıqlarıma boysınbay, ketip qalsan'ız ha'm basqa qudaylarg'a xızmet etip, olarg'a tabınsan'ız,
20 onda Men İzraildı O'zim bergen jerden shıg'arıp taslayman ha'm O'z atım ushın muxaddes qılg'an mına İbadatxananı ta'rk etip, onı pu'tkil xalıqlar arasında a'psanag'a aylandırıp, ku'lkige qaldıraman.
21 Sonda ha'zir za'wlim bolıp turg'an mına İbadatxananın' janınan o'tip baratırg'an ha'r bir adam hayran qalıp, qorqınısh penen: „Jaratqan İye bul eldi ha'm mına İbadatxananı ne ushın bul awhalg'a saldı eken?“ – dep soraytug'ın boladı.
22 Keyin olar: „İzrail xalqı ata-babaların Mısırdan alıp shıqqan Qudayı Jaratqan İyeni ta'rk etip, basqa qudaylarg'a jabısıp aldı ha'm olarg'a tabınıp, xızmet etti. Sonlıqtan Jaratqan İye olardı usı apatshılıqqa duwshar etti“, – deydi».
