Ester 3 bob
1 Bul waqıyadan keyin patsha Axashwerosh Agag a'wladınan bolg'an Hammedata ulı Hamandı joqarı lawazımg'a tayınlap, onın' ma'rtebesin ko'terdi. Onı barlıq wa'zirlerden de joqarı biylikke iye qıldı.
2 Patshanın' buyrıg'ı boyınsha, patsha sarayındag'ı xızmetshilerdin' ha'mmesi Hamang'a ta'jim etip, jerge deyin iyiletug'ın edi. Biraq Mordoxay og'an ta'jim etpedi de, jerge deyin iyilmedi de.
3 Patsha sarayındag'ı xızmetshiler Mordoxaydan: «Sen ne ushın patshanın' buyrıg'ına boysınbay atırsan'?» – dep soradı.
4 Olar bul so'zdi ha'r ku'ni qaytalasa da, Mordoxay olardı tın'lamadı. Sonlıqtan olar bunı Hamang'a jetkizdi. Sebebi Mordoxay olarg'a o'zinin' yahudiy ekenin aytqan edi ha'm olar Mordoxaydın' usılay islewdi dawam etetug'ının yamasa etpeytug'ının ko'rgisi keldi.
5 Haman Mordoxaydın' o'zine ta'jim etip, jerge deyin iyilmegenin ko'rgende, ashıwdan tu'tep ketetug'ın edi.
6 Haman Mordoxaydın' tek bir o'zin o'ltiriwdi g'ana oylap qoymay, Mordoxaydın' qaysı xalıqtan ekenin bilgenlikten, Axashweroshtın' pu'tkil patshalıg'ındag'ı barlıq yahudiylerdi, yag'nıy Mordoxaydın' pu'tkil xalqın qırıp taslawg'a qarar etti.
7 Axashweroshtın' patshalıg'ının' on ekinshi jılının' birinshi ayında, Nisan ayında bul isti a'melge asıratug'ın ku'n ha'm aydı belgilew ushın Hamannın' aldında pur, yag'nıy shek taslandı. Shek on ekinshi ayg'a, Adar ayına tu'sti.
8 Son'ınan Haman patsha Axashweroshqa bılay dedi: – Patshalıg'ın'ızdag'ı barlıq wa'layatlardag'ı xalıqlar arasına jayılıp, tarap ketken bir xalıq bar. Olardın' nızamları basqa barlıq xalıqlardın' nızamlarınan o'zgeshe bolıp, olar patshamızdın' nızamlarına boysınbaydı. Olardı o'z bildiginshe qaldırıw patshamızdın' ma'rtebesine zıyan tiygizedi.
9 er patshamız maqul ko'rse, olardı qırıp taslaw ushın pa'rman shıg'arsın. Men bul isti orınlag'anlarg'a to'lew ushın patsha qaznasına on mın' talant gu'mis beremen.
10 Sonda patsha qolındag'ı mo'r ju'zigin sheship, pa'rmandı tastıyıqlaw ushın, yahudiylerdin' dushpanı, Agag a'wladınan bolg'an Hammedata ulı Hamang'a berdi.
11 Patsha og'an: – Gu'mis o'zin'de qalsın. Sol xalıqqa qa'legenin'di isle, – dedi.
12 Birinshi aydın' on u'shinshi ku'ni patshanın' xatkerleri shaqırıldı. Hamannın' ha'mme buyrıqları patshanın' nayıplarına, barlıq wa'layatlardın' ha'kimlerine, barlıq xalıqlardın' beklerine, ha'r bir wa'layatqa o'z jazıwında ha'm ha'r bir xalıqqa o'z tilinde patsha Axashweroshtın' atınan jazılıp, onın' mo'r ju'zigi menen tastıyıqlandı.
13 «Yahudiylerdin' ha'mmesi: jası ha'm g'arrısı, hayal ha'm bala-shag'ası on ekinshi aydın', Adar ayının' on u'shinshi ku'ni, bir ku'nde o'ltirilip, joq qılınsın, qırıp taslanıp, mal-mu'lki talan-taraj qılınsın», – degen patshanın' xatı patshalıqtın' pu'tkil wa'layatlarına shabarmanlar arqalı jiberildi.
14 Bul pa'rmannın' ko'shirmesi ha'r bir wa'layatta nızam sıpatında ja'riyalanıp, barlıq xalıqlarg'a bildiriliwi tiyis boldı. Sebebi ha'mme belgilengen sol ku'nge tayar bolıp turıwı kerek edi.
15 Shabarmanlar patshanın' buyrıg'ı menen asıg'ıs jolg'a shıqtı. Pa'rman Suza qalasında da ja'riyalandı. Qala xalqı albırasıp atırg'an waqıtta patsha menen Haman otırıp alıp, sharap ishti.
