Wazshı 8 bob
1 Haqıyqıy dana kimge uqsaydı? Ha'mme na'rsenin' ma'nisin kim tu'sine aladı? Danalıq adamnın' ju'zin jaynatadı, Onın' betindegi qatallıqtı jumsartadı.
2 Men bılay deymen: patshanın' aytqanlarına qulaq sal, sebebi Quday og'an ant ishken.
3 Patshanın' aldınan ketiwge asıqpa ha'm patshag'a qarsı til biriktiriwshilerge qosılma. Ol qa'legeninin' ha'mmesin isley aladı.
4 Patshanın' so'zinde qu'diret bar, hesh kim og'an: «Siz ne islep atırsız?» – dep aytpaydı.
5 Buyrıqtı orınlag'anlar zıyan ko'rmeydi. Dana adam durıs na'rseni islew waqtın da, jolın da biledi.
6 Ha'r bir istin' o'z waqtı ha'm qag'ıydası bar. Sonday bolsa da, adam ushın qıyınshılıqtı ko'teriw ju'da' awır.
7 Keleshekte ne bolatug'ının adam bilmeydi, Bunın' qalay bolatug'ının og'an kim ayta aladı?
8 Hesh kimnin' samaldı uslap alıp, og'an biylik etiwge ku'shi jetpegenligi sıyaqlı, O'lim ku'ni u'stinen biylik etiwge de hesh kimnin' ku'shi jetpeydi. Urıstan qashıwg'a bolmaytug'ınlıg'ı sıyaqlı, Jawızlıq ta jawızlıq islewshi adamdı ta'rk etpeydi.
9 Men bulardın' ha'mmesin ko'rdim ha'm quyash astında bolıp atırg'an ha'mme na'rsege dıqqat awdardım: adam adamg'a hu'kimdarlıq etken waqıtta, bir-birine zıyan keltirgenin ko'rdim.
10 Keyin jaman adamnın' qalay jerlengenin ko'rdim. Muxaddes orıng'a kelip-ketip ju'rgen sol adamlar o'zleri jamanlıq qılg'an qalada maqtaw aldı. Bul da biyhuda.
11 Jınayat ushın tez jaza berilmese, adam balasının' ju'regi jamanlıq islewge qumar boladı.
12 Gu'nakar ju'z ma'rte gu'na islep, uzaq o'mir su'rse de, Qudaydan qorqqanlardın' ha'm Onın' aldında hadal ju'rgenlerdin' jaqsılıq ko'retug'ının anıq bilemen.
13 Al jaman adam Qudaydan qorqpag'anı ushın jaqsılıq ko'rmeydi ha'm onın' sayag'a uqsag'an o'miri uzaq bolmaydı.
14 Jer betinde aqılg'a sıymaytug'ın mınaday na'rse de bar: geyde a'dil adamlar jaman adamlarg'a tiyisli bolg'an jazanı aladı, al a'dil adamlarg'a tiyisli hu'rmetti jaman adamlar aladı. Men: «Bul da biyhuda, tu'siniksiz na'rse», – deymen.
15 Sonlıqtan men kewil ko'teriwdi artıq ko'rdim. Quyash astında adam ushın iship-jep, kewil ko'teriwden artıq baxıt joq. Quyash astında Qudaydın' adamg'a bergen o'miri dawamında islegen miynetinen og'an qalatug'ını usı.
16 etinen og'an qalatug'ını usı+. 16Men o'zimdi danalıqtı biliwge ha'm jer betinde ku'ni-tu'ni uyqı ko'rmey islenip atırg'an islerdi tu'siniwge bag'ıshladım.
17 Sonda men Qudaydın' ha'mme islerine oy juwırttım. Hesh kim quyash astında bolıp atırg'an na'rselerge tu'sinbeydi. Ol qansha urınsa da, bug'an erise almaydı. Dana adam bunı biletug'ının aytsa da, ol bunın' tu'bine jete almaydı.
