Eremiya 13 bob
1 Jaratqan İye mag'an: – Barıp, zıg'ır belbew satıp al. Onı belin'e bayla, biraq suwg'a tiygizbe, – dedi.
2 Jaratqan İyenin' so'zi boyınsha men belbew satıp alıp, onı belime bayladım.
3 Mag'an ja'ne Jaratqan İyeden so'z tu'sti:
4 – Belin'degi satıp alg'an belbewin'di al da, Parag'a barıp, onı sol jerdegi bir jartastın' jarıg'ına jasır.
5 Men Jaratqan İyenin' buyrıg'ı boyınsha barıp, belbewdi Paranın' boyına jasırdım.
6 Aradan ko'p ku'nler o'tkennen keyin, Jaratqan İye mag'an: – Tur, Parag'a bar da, jasırg'an belbewin'di al, – dedi.
7 Keyin men Parag'a kettim, jasırg'an jerimdi gewlep, belbewdi aldım. Biraq belbew shirip, hesh na'rsege jaramaytug'ın bolıp qalg'an edi.
8 Sonda mag'an Jaratqan İyeden mınaday so'z tu'sti:
9 «Jaratqan İye bılay deydi: Men Yahudanın' ta'kabbirligin ha'm Erusalimnin' asa menmenligin shiritemen.
10 Bul jawız xalıq qaysar ju'reginin' qa'lewin orınlap, Menin' so'zlerime qulaq salıwdan bas tarttı. Basqa qudaylarg'a erip, olarg'a xızmet etti, tabındı. Sonın' ushın, olar da usı belbew sıyaqlı hesh na'rsege jaramaytug'ın boladı.
11 Belbewdin' denege jabısıp turg'anı sıyaqlı, Men de pu'tkil İzrail ha'm Yahuda xalıqların O'zime jaqın tutqan edim, – deydi Jaratqan İye. – Mag'an ataq-abıray, alg'ıs ha'm dan'q keltiredi dep, olardın' O'z xalqım bolıwın qa'ledim. Biraq olar qulaq salmadı».
12 – Olarg'a mına so'zlerdi jetker: «İzraildın' Qudayı Jaratqan İye bılay deydi: Ha'mme mesler sharapqa toladı». Eger olar sag'an: «Ha'mme meslerdin' sharapqa tolatug'ının bizler ne bilmeymiz be?» – dese,
13 onda olarg'a bılay dep juwap ber: «Jaratqan İye bılay deydi: Bul jerde jasaytug'ınlardın' ha'mmesin – Dawıttın' taxtında otırg'an patshalardı, ruwxaniylerdi, payg'ambarlardı ha'm Erusalim turg'ınlarının' ha'mmesin ma's bolg'ansha sharapqa toydırama+.
14 Men olardı bir-birine, ataanaların balalarına qarsı qılıp qoyaman, – deydi Jaratqan İye. – Olardı joq qılg'anımda ayamayman, ashınbayman, rehim de etpeymen».
15 Ta'kabbirlik etpey qulaq salıp, tın'lan', Sebebi Jaratqan İye ayttı.
16 U'stin'izge qaran'g'ılıq jibermesten, Zulmat tawlarında ayag'ın'ız su'rnikpesten aldın, Qudayın'ız Jaratqan İyeni ullılan'. Bolmasa, Ol sizler ku'tip atırg'an jarıqlıqtı, Zulmatqa aylandırıp, Tas tu'nek qaran'g'ı qıladı.
17 Eger bul so'zlerge qulaq salmasan'ız, Onda ta'kabbirligin'iz ushın janım pinhamı jılaydı, Ko'zlerim ashshı-ashshı jas to'gedi. Sebebi Jaratqan İyenin' qoyları, Tutqın etip alıp ketiledi.
18 Patshag'a ha'm ana xanshag'a bılay dep ayt: «Taxtın'ızdan tu'sip, jerge otırın', O'ytkeni saltanatlı tajın'ız basın'ızdan tu'sip ketti».
19 Negebtin' qalaları jabıldı, Olardı ashatug'ın hesh kim joq. Pu'tkil Yahuda su'rgin etildi, Birde bir adam qalmay su'rgin etildi.
20 Erusalim, basın'dı ko'terip, Arqadan kiyatırg'anlarg'a qara. Sag'an berilgen su'riw, A'jayıp su'riw qayaqta?
21 O'zin'e awqamlas qılıp jetistirgen adamların'dı, Jaratqan İye senin' u'stin'nen basshı qılsa, ne der ekensen'? Sonda tolg'aq tutqan hayaldın' azabınday, Sen de azap shekpeysen' be?
22 İshin'nen: «Ne ushın bular menin' basıma tu'sti?» – dersen'. Ayıpların'nın' ko'pligi sebepli, Eteklerin' ashıldı, namısın'a tiyildi.
23 Xabashstanlı terisinin' ren'in, Qaplan u'stindegi daqların o'zgerte ala ma? Sol sıyaqlı, jawızlıq qılıp u'yrengen sizler de, Jaqsılıq qıla alasız ba?
24 Men sizlerdi sho'l samalı menen suwırılg'an, Qawıq sıyaqlı ushırıp jiberemen.
25 Senin' nesiyben', Men o'lshep beretug'ın payın' – usı, – deydi Jaratqan İye. – Sebebi sen Meni umıtıp, Jalg'ang'a u'mit bayladın'.
26 Shermendeligin'di ko'rsetiw ushın, Men de etegin'di betin'e deyin ko'teremen.
27 Dalalarda ha'm to'beshikler u'stinde, Sen qılg'an jerkenishli islerdi, Qıyanetin'di, esirkep kisnewin'di, Uyatsız buzıqshılıg'ın'dı ko'rdim. Ha'siret sag'an, Erusalim! Pa'kleniwin' ushın sag'an ja'ne qansha waqıt kerek?
