Eremiya 41 bob
1 Jetinshi ayda patsha a'wladınan ha'm patshanın' wa'zirlerinen biri bolg'an Elishamanın' aqlıg'ı Netaniya ulı İsmayıl on adamı menen Mispadag'ı Axiqam ulı Gedaliyag'a keldi. Olar Mispada birge ishipjep otırg'anda,
2 Netaniya ulı İsmayıl menen onın' janındag'ı on adam orınlarınan turdı da, Babiloniya patshası sol elge ha'kim qılıp qoyg'an Shafannın' aqlıg'ı Axiqam ulı Gedaliyanı qılısh penen shawıp tasladı.
3 İsmayıl Mispada Gedaliya menen birge bolg'an barlıq yahudiylerdi de, ol jerdegi kaldey a'skerlerin de o'ltirdi.
4 Erten'ine Gedaliyanın' o'ltirilgeni haqqında hesh kim bilmey turıp,
5 Shexemnen, Shilodan ha'm Samariyadan seksen adam keldi. Olar qayg'ıdan saqalların qırqqan, kiyimlerin jırtqan, denelerin tilgen bolıp, qollarında Jaratqan İyenin' İbadatxanasına alıp kiyatırg'an g'a'lle sadaqası menen xosh iyisli tu'tetkisi bar edi.
6 Olardı ku'tip alıw ushın Mispadan Netaniya ulı İsmayıl jolg'a shıqtı. Ol jılap ushırasıp, olarg'a: – Axiqam ulı Gedaliyag'a barın'lar, – dedi.
7 Endi qala ortasına kelgende, Netaniya ulı İsmayıl ha'm onın' janındag'ı adamlar olardı o'ltirip, suw saqlag'ıshqa tasladı.
8 Biraq olardın' arasınan on adam İsmayılg'a:– Bizlerdi o'ltirme, bizlerdin' atızda jasırıp qoyg'an biydayımız, arpamız, mayımız ha'm palımız bar, – dedi. Sonda ol o'zin tutıp, olardı qasındag'ıları menen birge o'ltirmey, aman qaldırdı.
9 İsmayıl Gedaliyag'a tiyisli o'lilerdin' denelerin taslag'an suw saqlag'ısh ju'da' u'lken bolıp, onı patsha Asa İzrail patshası Baashadan qorg'anıw ushın qazdırg'an edi. Nataniya ulı İsmayıl onı o'li denege toltırdı.
10 İsmayıl Mispadag'ı qalg'an pu'tkil xalıqtı – patshanın' qızların ha'm saqshılar baslıg'ı Nabuzaradan Axiqam ulı Gedaliyanın' ıqtıyarına tapsırg'an Mispada qalg'an pu'tkil xalıqtı tutqıng'a aldı. Netaniya ulı İsmayıl olardı aydap, ammonlar ta'repke o'tiw ushın jolg'a tu'sti.
11 Biraq Qareax ulı Yuxanan ha'm onın' janındag'ı pu'tkil a'skerbasılar Netaniya ulı İsmayıl islegen jınayatları haqqında esitkende,
12 adamlarının' ha'mmesin alıp, Netaniya ulı İsmayıl menen urısıw ushın jolg'a shıqtı. Olar Gibondag'ı mol suwlı ha'wiz janında İsmayıldın' izinen jetti.
13 İsmayıldın' qasındag'ı pu'tkil xalıq Qareax ulı Yuxanandı ha'm onın' qasındag'ı a'skerbasılardı ko'rgende, quwanıp ketti.
14 İsmayıl Mispada tutqıng'a alg'an adamlardın' ha'mmesi izge, Qareax ulı Yuxanang'a qaray juwırdı.
15 Biraq Netaniya ulı İsmayıl segiz adamı menen Yuxanannan qutılıp, ammonlarg'a qashıp ketti.
16 Qareax ulı Yuxanan ha'm onın' janındag'ı barlıq a'skerbasılar aman qalg'anlardın' ha'mmesin Axiqam ulı Gedaliyanı o'ltirgen Netaniya ulı İsmayıldan qutqarıp, ha'm Gibonnan izge qaytarıp alıp kelgen a'skerlerdi, hayallardı, balalardı, saray xızmetkerlerin Mispadan alıp shıqtı.
17 Olar jol ju'rip, Mısırg'a o'tiw ushın, Beytlehem jaqınındag'ı Gerut-Kimhamda toqtadı.
18 Babiloniya patshası el u'stinen ha'kim qılıp qoyg'an Axiqam ulı Gedaliyanı Netaniya ulı İsmayıl o'ltirgeni sebepli, olar kaldeylerden qorqtı.
