Daniel 10 bob
1 Persiya patshası Kirdin' patshalıg'ının' u'shinshi jılında, Belteshassar dep atalg'an Danielge bir ayan bayan etildi. Keleshekte ju'z beretug'ın ku'shli sawashqa baylanıslı bolg'an bul xabar haqıyqat. Daniel bul xabardı ayan arqalı tu'sindi.
2 Sol waqıtta men, Daniel u'sh ha'pte aza tutıp ju'rdim.
3 U'sh ha'pte dawamında hesh qanday toyımlı awqat jemedim, go'sh penen sharaptı awzıma da almadım ha'm may su'rtpedim.
4 Birinshi aydın' jigirma to'rtinshi ku'ni men ullı da'ryanın', yag'nıy Tigr da'ryasının' boyında turg'an edim.
5 Sonda men u'stinde zıg'ırdan toqılg'an aq kiyimi, belinde taza altınnan islengen belbewi bar birewdi ko'rdim.
6 Onın' denesi sarı yaqıt sıyaqlı jarqırap, ju'zi shaqmaq jalınınday, ko'zleri shomday bolıp janıp turg'an edi. Onın' ayaq-qolları jıltır qoladay jıltırap, dawısı alaman xalıqtın' dawısınday jan'g'ırıp turatug'ın edi.
7 Ayandı jalg'ız men ko'rdim. Janımdag'ılar ayandı ko'rmese de, olardın' za'rreleri ushqanı sonshelli, olar qashıp, jasırınıp aldı.
8 Sonda men bir o'zim qaldım. Sol ullı ayandı ko'rip atırg'anımda, ha'lsizlenip, ju'zim quwarıp, din'kem de qalmag'an edi.
9 Sonda perishtenin' dawısın esittim. Dawıstı esitkenimde esimnen awıp, et-betimnen jerge jıg'ıldım.
10 Sonda bir qol mag'an tiyip, meni ko'terip, qol ha'm dizelerime turg'ızıp qoydı.
11 Sol perishte mag'an: – Ha'y, Daniel, sen Qudaydın' su'yikli bendesisen'. Qa'ne, tur! Sag'an aytatug'ın so'zlerime jaqsılap qulaq sal, o'ytkeni ha'zir men senin' aldın'a jiberilgenmen. Ol mag'an usı so'zlerdi aytıp atırg'anda, men qaltırap ornımnan turdım.
12 Ol so'zin dawam etip, bılay dedi: – Qorqpa, Daniel! Sen bul xabar haqqında tu'sinik alıwdı niyet etip, Qudayın'nın' aldında o'zin'di kishipeyil tutqan ku'nin'nen-aq senin' duwan' qabıl etildi. Duwaların'a juwap beriw ushın aldın'a keldim.
13 Biraq Persiya patshalıg'ının' hu'kimdarı jigirma bir ku'n dawamında mag'an qarsı turdı. Men Persiya patshalarının' ishinde jalg'ız qalg'anımda, bas perishtelerdin' biri Mixail mag'an ja'rdemge keldi.
14 Men sag'an keleshekte xalqın'nın' basına tu'setug'ın na'rselerdi tu'sindiriw ushın keldim. Bul ayan sol ku'nler haqqında.
15 Ol usı so'zlerdi aytıp atırg'anda, men basımdı iyip, u'nsiz turg'an edim.
16 Sonnan son' adam balasına uqsag'an birew erinlerime qolın tiygizdi. Sonda men de awzımdı ashıp, aldımda turg'ang'a bılay dedim: – Mırzam, bul ayan meni qattı qıynap jiberdi, din'kem qurıdı.
17 Mendey bir qulın' qalayınsha mırzam menen so'ylese aladı? Halım qalmag'an, demim tıg'ılıp, zorg'a dem alıp atırman.
18 Sonda adam ulına uqsag'an sol birew ja'ne bir ma'rte qolın tiygizip, mag'an ku'sh bag'ıshlap,
19 bılay dedi: – Ha'y, Qudaydın' su'yikli bendesi, qorqpa! Sag'an tınıshlıq bolsın! Ku'shli bol, awa, ku'shli bol! Ol mag'an so'ylep atırg'anda, mag'an ku'sh-quwat enip: – Mırzam, siz mag'an ku'sh-quwat berdin'iz, endi ayta berin', – dedim.
20 Ol mag'an: – Senin' aldın'a ne ushın kelgenimdi bilesen' be? Endi men Persiya patshalıg'ının' hu'kimdarı menen urısıwg'a qaytıp baraman. Biraq men ketkennen keyin, Grek patshalıg'ının' hu'kimdarı keledi.
21 Biraq da'slep haqıyqat kitabında ne jazılg'anın sag'an aytıp beremen. Olarg'a qarsı gu'reste mag'an sizlerdin' hu'kimdarın'ız Mixail perishteden basqa hesh kim ja'rdem bermeydi, – dedi.
