Amos 4 bob
1 Ha'y, Samariya tawındag'ı semiz sıyırlarday bolg'an hayallar, Qulaq salın' mına so'zlerge: Ka'mbag'allardı ezesiz, Jarlılarg'a ja'bir beresiz, Ku'yewlerin'izge: «İshimlik alıp kelin', ishemiz», – deysiz.
2 Quday İye O'z muxaddesligi haqı ant iship, bılay deydi: «Mine, sizlerdi shanıshqı menen ildirip, Qalg'anların'ızdı balıqtay qarmaq penen su'yrep ketetug'ın ku'nler keledi.
3 Ha'r birin'iz buzılg'an diywal jarıqlarınan alıp o'tilip, Harmong'a ılaqtırılasız». Bular Jaratqan İyenin' so'zleri.
4 «Beyt-Elge barıp, gu'na isley berin', Gilgalg'a ketip, gu'nan'ızdı ko'beytin'! Azanda qurbanlıqların'ızdı usının', Ha'r u'sh ku'nnen onnan birin'izdi alıp kelin'.
5 Ashıtqı salıng'an sho'rekti minnetdarshılıq sadaqası etip jandırın', Iqtıyarlı sadaqaların'ızdı ha'mmege ja'riya qılın'. Sebebi usınday qılıwdı xosh ko'resiz, ha'y İzrail xalqı», – deydi Quday İye.
6 «Sonın' ushın, barlıq qalaların'ızg'a ashlıq jiberdim, Jasap atırg'an ha'r bir jerin'izde nang'a zar qıldım, Sonda da, sizler Mag'an qaytıp kelmedin'iz», – deydi Jaratqan İye.
7 «Jıyın-terimge u'sh ay qalg'anda, Men sizlerge jawın jawdırmay qoydım. Bir qalag'a jawın jawdırdım, Ekinshisine jawdırmadım. Bir atızg'a jawın jawdı, Basqası jawın jawmag'anlıqtan quwrap qaldı.
8 Eki-u'sh qalanın' xalqı suw ishiw ushın, Basqa bir qalag'a su'yretilip barsa da, Olardın' sho'li qanbadı. Sonda da, sizler Mag'an qaytıp kelmedin'iz», – deydi Jaratqan İye.
9 «Qayta-qayta egisliklerin'izdi quwratıp, olarg'a kesellik jiberip jazaladım, Shegirtkeler bag'ların'ızdı, ju'zimzarların'ızdı, Ja'ne de, a'njir ha'm za'ytu'nlerin'izdi jedi. Sonda da, sizler Mag'an qaytıp kelmedin'iz», – deydi Jaratqan İye.
10 «Mısırda islegenim sıyaqlı, Aran'ızg'a oba keselligin jiberdim, Jigitlerin'izdi qılısh ju'zinen o'tkerdim, Atların'ızdı dushpanların'ızg'a berdim, Ordan'ızdag'ı o'lilerdin' iyisine murnın'ızdı toltırdım. Sonda da, sizler Mag'an qaytıp kelmedin'iz», – deydi Jaratqan İye.
11 «Qudayın'ız bolg'an Men Sodom ha'm Gomoranı qıyratqanımday, Sizlerdin' ayırımların'ızdı qıyrattım, Sizler ot ishinen shıg'arıp alıng'an shala jang'an ag'ashtay boldın'ız. Sonda da, sizler Mag'an qaytıp kelmedin'iz», – deydi Jaratqan İye.
12 «Sonlıqtan İzrail, seni jazalayman, Shınında, sag'an Men usını isleymen, Qudayın'nın' hu'kimine tayarlan, ha'y İzrail!»
13 O'ytkeni tawlardı qa'liplestirip, samaldı jaratqan, Oy-pikirlerin adamzatqa ashıp bergen, Tan' nurın qaran'g'ılıqqa aylandırg'an Ol, Du'nyanın' en' biyik jerlerin basıp ju'r, Onın' atı Jaratqan İye, A'lemnin' Qudayıdur.
