Sanlar 20 bob
1 Birinshi ayda İzrail xalqının' pu'tkil ja'miyeti Zin sho'line jetip barıp, Qadeshke ornalastı. Ma'riyam sol jerde qaytıs bolıp, jerlendi.
2 Ol jerde xalıq ushın ishetug'ın suw joq edi. Sol sebepli olar Muwsa menen Xarong'a qarsı jıynalıp,
3 Muwsa menen dawlasıp, bılay dedi: – Tuwısqanlarımız Jaratqan İyenin' aldında o'lgen waqıtta, bizler de olar menen birge o'lip ketkenimiz jaqsı edi!
4 Jaratqan İyenin' ja'miyetin bul sho'lge ne ushın alıp keldin'? Bizler haywanlarımız benen birge o'liwimiz ushın ba?
5 Ne ushın bizlerdi usı jaman jerge alıp keliw ushın Mısırdan alıp shıqtın'? Bul jerdin' egisligi de, a'njiri de, ju'zimi de, anarı da joq. Ha'tteki, ishetug'ın suwı da joq!
6 Muwsa menen Xaron ja'miyettin' aldınan ketip, Ushırasıw shatırının' aldına bardı da, ol jerde et betinen jerge jıg'ıldı. Sonda Jaratqan İyenin' saltanatı olarg'a ko'rindi.
7 Jaratqan İye Muwsag'a: – Tayag'ın'dı al. A'jag'an' Xaron menen birge ja'miyetti bir jerge jıynan'. Keyin ja'miyettin' ko'z aldında suw atlıg'ıp shıg'ıwı ushın, jartasqa buyrıq berin'.
8 Sonda sen jartastan suw shıg'arıp, olarg'a da, haywanlarına da suw beresen', – dedi.
9 Muwsa o'zine berilgen buyrıq boyınsha Jaratqan İyenin' da'rgayındag'ı tayaqtı alıp,
10 Xaron menen birge ja'miyetti jartastın' aldına jıynadı. Muwsa olarg'a: – Ha'y, ko'terilisshiler, mag'an qulaq salın'lar! Mına jartastan sizlerge suw shıg'arıp bereyik pe? – dedi
11 Sonnan keyin, Muwsa qolındag'ı tayag'ın ko'terip, jartasqa eki ma'rte urdı. Sonda jartastan suw atlıg'ıp shıqtı ha'm pu'tkil ja'miyet te, haywanları da onnan suw ishti.
12 Jaratqan İye Muwsa menen Xarong'a bılay dedi: – İzraillılardın' ko'z aldında Menin' muxaddesligime hu'rmet ko'rsetpey, Mag'an isenbedin'ler. Sonın' ushın, Men bul ja'miyetke beretug'ın elge olardı sizler alıp barmaysızlar.
13 İzrail xalqı Jaratqan İyege qarsı shıg'ıp, dawlasqan sol jer Meriba* suwları dep ataldı. Usı jerde Jaratqan İye olarg'a O'z muxaddesligin ko'rsetti.
14 Muwsa Qadeshten Edom patshasına elshiler arqalı mınaday xabar jiberdi: «Tuwısqanın' bolg'an İzrail xalqı bılay dep aytıp atır: Basımızg'a tu'sken barlıq qıyınshılıqlardan xabarın' bar.
15 Ata-babalarımız Mısır jerine barıp qonıs bastı ha'm sol jerde uzaq waqıt dawamında jasadıq. Mısırlılar ata-babalarımızg'a da, bizlerge de zulımlıq qıldı.
16 Biraq bizler Jaratqan İyege jalbarıng'anımızda, Ol perishtesin jiberip, bizlerdi Mısırdan alıp shıqtı. Mine, endi bizler senin' shegaran'a jaqın jerdegi Qadesh qalasında turıppız.
17 Bizlerge elin' arqalı o'tip ketiwimizge ruxsat bersen'iz. Sizlerdin' egin atızların'ızg'a, ju'zim bag'ların'ızg'a kirmeymiz ha'm qudıqların'ızdan suw ishpeymiz. Elin'iz arqalı o'tkende, on'g'a da, shepke de burılmay, tek g'ana Patsha jolı degen u'lken joldan ju'rip, jolımızdı dawam etemiz».
18 Biraq Edom patshası: «Elim arqalı o'tpeysizler! Bolmasa, sizlerge qarsı qılısh ko'teremiz», – dep juwap berdi.
19 Sonda izraillılar og'an: «Bizler u'lken joldan ju'rip, o'tip ketemiz. Eger bizler yamasa haywanlarımız suwın'nan ishsek, onın' haqısın to'leymiz. Bizler tek barı-jog'ı elin'iz arqalı o'tip ketemiz», – dep iltimas qıldı.
20 Degen menen, Edom patshası olarg'a ja'ne: «O'tpeysizler!» – dep juwap berdi. Sonnan keyin, edomlılar izraillılarg'a qarsı ju'ris qılıw ushın, ko'p sanlı ha'm ku'shli la'shkerleri menen jolg'a shıqtı.
21 Edom patshası elinen o'tiwine ruxsat bermegennen son', izraillılar artqa burılıp, aylanıp o'tiw ushın, onnan uzaqlastı.
22 Pu'tkil İzrail ja'miyeti Qadeshten shıg'ıp, Hor tawına keldi.
23 Jaratqan İye Edom shegarasındag'ı Hor tawında Muwsa menen Xarong'a bılay dedi:
24 – Xaron o'lip, o'z ata-babalarına qosıladı. Ol Men İzrail xalqına beretug'ın elge kirmeydi. O'ytkeni ekewin'iz Meriba suwları janında Menin' buyrıg'ıma qarsı shıqtın'lar.
25 Endi sen Xaron menen onın' ulı Elazardı Hor tawına alıp shıq.
26 Xaronnın' ruwxaniylik kiyimlerin sheship alıp, olardı ulı Elazarg'a kiygiz. Xaron ol jerde o'lip, ata-babalarına qosıladı.
27 Muwsa Jaratqan İyenin' buyırg'anınday qıldı. Olar u'shewi de pu'tkil ja'miyettin' ko'z aldında Hor tawına ko'terildi.
28 Muwsa Xaronnın' ruwxaniylik kiyimlerin u'stinen sheship aldı da, olardı ulı Elazarg'a kiygizdi. Xaron sol jerde, tawdın' joqarısında o'ldi. Keyin, Muwsa menen Elazar tawdan tu'sti.
29 Pu'tkil İzrail ja'miyeti Xaronnın' o'lgenin bilgende, ol ushın otız ku'n aza tuttı.
