Matta 9 bob
1 Son'ınan İysa qayıqqa minip, ten'izdin' arg'ı jag'asına o'tti de, O'z qalasına qaytıp keldi.
2 Sonda adamlar to'seginde jatırg'an bir la'n' adamdı ko'terip, Og'an alıp keldi. İysa olardın' isenimin ko'rip, la'n' adamg'a: – Balam, jigerli bol, gu'naların' keshirildi! – dedi.
3 Sonda diniy mug'allimlerdin' geybirewleri ishlerinen: «Bul Qudayg'a til tiygizip tur-g'o!» – dedi.
4 İysa olardın' ne oylag'anın bilip, olarg'a: – İshlerin'izden nege jamanlıq oylap tursızlar?
5 Biraq, Adam Ulının' jer betinde gu'nalardı keshiriwge biyligi bar ekenin bilip qoyın'lar, – dedi de, la'n' adamg'a: – Ornın'nan turıp to'segin'di al da, u'yin'e bar! – dedi.
6 Biraq, Adam Ulının' jer betinde gu'nalardı keshiriwge biyligi bar ekenin bilip qoyın'lar, – dedi de, la'n' adamg'a: – Ornın'nan turıp to'segin'di al da, u'yin'e bar! – dedi.
7 La'n' adam ornınan turıp, u'yine ketti.
8 Bunı ko'rgen adamlardı qorqınısh biylep, adamlarg'a usınday biylik bergen Qudaydı maqtadı.
9 İysa sol jerden ketip baratırıp salıq ken'sesinde otırg'an Matta atlı adamdı ko'rdi de, og'an: – Menin' izime er, – dedi. Ol ornınan turıp, İysanın' izine erdi.
10 İysa onın' u'yinde dasturxan basında otırg'anda, ko'plegen salıqshılar menen gu'nakarlar kelip, Ol ha'm Onın' sha'kirtleri menen birge dasturxanlas boldı.
11 Pariseyler bunı ko'rip, Onın' sha'kirtlerinen: – Sizlerdin' Ustazın'ız nege salıqshılar ha'm gu'nakarlar menen birge as iship otır? – dep soradı.
12 Bunı esitken İysa olarg'a: – Shıpakerge deni sawlar emes, al awırıwlar mu'ta'j.
13 Sizler barıp: «Men qurbanlıq emes, al miyrim-sha'pa'a't tileymen», – degen so'zlerdin' ma'nisin bilip alın'lar. Sebebi Men haq adamlardı emes, al gu'nakarlardı shaqırıw ushın keldim, – dedi.
14 Sol waqıtta Yaqıyanın' sha'kirtleri kelip, İysadan: – Bizler de, pariseyler de jiyi-jiyi oraza tutamız, al Senin' sha'kirtlerin' nege oraza tutpaydı? – dep soradı.
15 İysa olarg'a: – Toyg'a kelgenler ku'yew olar menen birge bolg'an waqıtta qayg'ıra ala ma? Biraq, olardan ku'yewdi tartıp alıp ketiletug'ın ku'nler keledi, sonda olar oraza tutadı.
16 Hesh kim eski kiyimge jan'a tawardan jamaw jamamaydı, o'ytkeni jan'a jamaw eski kiyimnen jırtılıp qalıp, jırtıq burıng'ısınan beter boladı
17 Jan'a sharaptı da hesh kim eski meske quymaydı. Olay etse, mes jarılıp, sharap ta ag'ıp ketedi, mes te buzıladı. Jan'a sharap jan'a meske quyıladı, sonda ekewi de saqlanadı, – dedi.
18 İysa olarg'a usılardı aytıp turg'anda qasına bir ma'jilisxananın' basshısı kelip, Onın' ayag'ına jıg'ıldı da: – Menin' qızım jan'a g'ana o'ldi. Sen kelip og'an qolın'dı tiygiz, sonda ol tiriledi, – dedi.
19 İysa ornınan turıp, sha'kirtleri menen birge og'an erdi.
20 Sonda on eki jıl boyı qan ketip awırg'an bir hayal İysanın' artına jaqınlap kelip, Onın' kiyiminin' shetine qolın tiygizdi.
21 Sebebi hayal ishinen: «Onın' kiyimine g'ana qolımdı tiygizsem, shıpa tabaman», – degen edi.
22 İysa burılıp, onı ko'rdi de: – Qızım, jigerli bol, isenimin' seni qutqardı! – dedi. Hayal sol waqıtta-aq shıpa taptı.
23 İysa basshının' u'yine kelgende, sıbızg'ıshılardı ha'm tınıshsızlanıp turg'an adamlardı ko'rip,
24 olarg'a: – Shıg'ın'lar! Qız o'lgen joq, tek uyıqlap atır, – dedi. Olar İysanın' u'stinen ku'ldi.
25 Adamlar sırtqa shıg'arılg'annan keyin, İysa ishke kirip qızdın' qolın uslag'anda, qız ornınan turdı.
26 Bul waqıya tuwralı xabar pu'tkil do'gerekke jayıldı.
27 İysa sol jerden ketip baratırg'anda Onın' izine eki soqır adam erip, Og'an: – Dawıttın' Urpag'ı! Bizlerge rehim ete go'r! – dep baqırıstı.
28 Ol u'yge kirgende, Onın' qasına soqırlar da keldi. İysa olarg'a: – Menin' bunı isley alatug'ınıma isenesizler me? – dep soradı. Olar: – Awa, İyem, isenemiz, – dep juwap berdi.
29 Sonda İysa olardın' ko'zlerine qolın tiygizip: – Sizlerge isenimin'iz boyınsha bolsın, – degende,
30 olardın' ko'zleri ko're basladı. İysa olarg'a: – Abaylan', bunı hesh kim bilmesin! – dep qatan' tapsırdı.
31 Biraq olar sırtqa shıg'ıp, İysa tuwralı xabardı pu'tkil do'gerekke jaydı.
32 Olar shıg'ıp keteyin dep atırg'an waqıtta adamlar İysag'a jin urg'anı sebepli gu'n'elek bolg'an bir adamdı alıp keldi.
33 Jin quwıp shıg'arılg'annan keyin, gu'n'elek adam so'yley basladı. Adamlar tan' qalısıp: – Bunday waqıya İzrailda hesh qashan bolg'an emes edi, – desti.
34 Biraq pariseyler: – Ol jinlerdi jinlerdin' baslıg'ının' ku'shi menen quwıp shıg'arıp ju'r, – desti.
35 Sonnan son', İysa barlıq qala ha'm awıllardı aralap ju'rdi. Yahudiylerdin' ma'jilisxanalarında ta'lim berdi ha'm Aspan Patshalıg'ı tuwralı Xosh Xabardı ja'riyalap, barlıq awırıwlarg'a ha'm ha'mme ha'lsiz adamlarg'a shıpa berdi.
36 Ol ko'p xalıqtı ko'rip, olarg'a janı ashıdı, o'ytkeni olar shopansız qoylarg'a uqsap qıynalg'an ha'm pıtıran'qı edi.
37 Sonda Ol sha'kirtlerine: – Orılatug'ın egin ko'p, biraq jumısshılar az.
38 Sonlıqtan zu'ra'a'ttin' iyesi bolg'an İyemizden O'zinin' atızına egindi oratug'ın jumısshılar jiberiwin duwa etip soran'lar, – dedi.
