Luka 2 bob
1 Sol ku'nleri Rim patshası Avgust pu'tkil Rim patshalıg'ının' turg'ınları dizimnen o'tiwi tiyis, degen pa'rman shıg'ardı.
2 Bul birinshi dizimnen o'tiw Kirini Siriyag'a ha'kimlik qılg'an zamanda boldı.
3 Ha'r bir adam dizimnen o'tiw ushın o'z qalasına bardı.
4 Yusup te Galiladag'ı Nasıra qalasınan jolg'a shıg'ıp, Yahudiyadag'ı Beytlehem dep atalg'an Dawıttın' qalasına keldi. O'ytkeni ol Dawıttın' urpag'ınan edi.
5 Dizimnen o'tiw ushın, onın' menen birge qalın'lıg'ı bolg'an ha'mledar Ma'riyam da bardı.
6 Olar sol jerde bolg'anda Ma'riyamnın' ayı-ku'ni tolıp,
7 tun'g'ısh Ulın tuwdı. Onı qundaqlap, bir aqırg'a jatqızdı, sebebi miymanxanada olarg'a orın joq edi.
8 Sol a'tirapta shopanlar bolıp, olar tu'nde o'z padasın dalada qarawıllaytug'ın edi.
9 Tosattan olardın' aldında Jaratqan İyemizdin' bir perishtesi payda bolıp, İyemizdin' saltanatı olardın' a'tirapın jarqıratıp jiberdi. Olar qattı qorqıp ketti.
10 Perishte olarg'a: – Qorqpan'lar! Men sizlerge ha'mme adamlardı sheksiz quwandıratug'ın xosh xabar ja'riyalayman.
11 Bu'gin Dawıttın' qalasında sizler ushın Qutqarıwshı tuwıldı. Ol – İyemiz Masix.
12 Sizler ushın onın' belgisi mınaday: sizler aqırda qundaqlawlı jatırg'an Na'resteni tabasızlar, – dedi.
13 Birden perishtenin' qasında aspandag'ı perishtelerdin' u'lken toparı payda boldı ha'm bılay dep Qudaydı alg'ısladı:
14 «Aspanda Quday alg'ıslansın, Qudayg'a unaytug'ın jerdegi adamlarg'a tınıshlıq bolsın!»
15 Perishteler aspang'a ko'terilgennen son', shopanlar bir-birine: – Ju'rin'ler, Beytlehemge barayıq. Jaratqan İyemiz bizlerge bildirgen, sol ju'z bergen waqıyanı ko'reyik, – desti.
16 Olar asıg'ıslıq penen kelip, Ma'riyam menen Yusuptı ha'm aqırda jatırg'an Na'resteni taptı.
17 Onı ko'rip, perishtelerden Na'reste haqqında esitkenlerin aytıp berdi.
18 Bunı esitken adamlardın' ha'mmesi shopanlardın' so'zlerine tan' qalıstı.
19 Al Ma'riyam bul so'zlerdi ju'reginde saqlap, oylap ju'rdi.
20 Shopanlar o'zlerine aytılg'anlardın' ha'mmesin esitip-ko'rgenleri ushın Qudaydı alg'ıslap, maqtaw aytıp, qaytıp ketti.
21 Aradan segiz ku'n o'tip, Na'resteni su'nnet etkende, Onın' atın İysa dep qoydı. Ma'riyam ha'mledar bolmasınan burın, perishte Og'an usı attı bergen edi.
22 Muwsanın' Nızamı boyınsha tazalanıw ku'nleri tamam bolg'anda, Yusup penen Ma'riyam İysanı Jaratqan İyemizge arnaw ushın, Onı Erusalimge alıp keldi.
23 O'ytkeni Jaratqan İyemizdin' Nızamında: «Tuwılg'an ha'r bir tun'g'ısh ul Jaratqan İyemizge arnalsın», – dep jazılg'an.
24 Ja'ne Jaratqan İyemizdin' Nızamında aytılg'anday, olar «jup qumırı yamasa kepterdin' eki palapanın» qurban etpekshi boldı.
25 Sol waqıtta Erusalimde Shimon atlı bir adam bar edi. Ol haq ha'm dinshil adam bolıp, İzraildın' ta'selle tabıwın intizarlıq penen ku'tip ju'r edi. Muxaddes Ruwx og'an yar edi
26 Jaratqan İyemiz jibergen Masixtı ko'rmegenshe o'lmeytug'ının og'an Muxaddes Ruwx aldın ala aytqan edi.
27 Shimon Muxaddes Ruwxtın' basqarıwında İbadatxanag'a keldi. İysanın' ata-anası Muxaddes Nızam boyınsha tiyisli u'rp-a'detlerdi orınlaw ushın Onı İbadatxanag'a alıp kelgende,
28 Shimon Onı qolına alıp, Qudaydı alg'ıslap bılay dedi:
29 «O, Qu'diretli İyem, O'zin' aytqanın'day, endi qulın'dı bul du'nyadan tınıshlıq penen jiberesen'.
30 Sebebi ko'zlerim Senin'
31 ha'mme xalıqlar ushın tayarlap qoyg'an qutqarıwın'dı ko'rdi:
32 Ol basqa milletlerdin' ko'zin ashatug'ın nur bolıp, Senin' xalqın' İzrailg'a dan'q keltiredi».
33 Na'restenin' ata-anası Ol tuwralı aytılg'an so'zlerge tan' qalıstı.
34 Shimon olarg'a pa'tiyasın berip, Onın' anası Ma'riyamg'a: – Mine, bul Na'reste İzrailda ko'p adamlardın' qulawına ha'm qayta tikleniwine sebepshi boladı. Ol İyemizdin' belgisi bolıp, Ol sebepli ko'p talas-tartıslar kelip shıg'adı.
35 Sonda ko'p adamlardın' ju'reklerinin' tu'pkirindegi oy-qıyalları a'shkara bolıp, al senin' kewlin'e ha'siret qılıshı sug'ıladı, – dedi.
36 Sol jerde Asher urıwınan shıqqan Panueldin' qızı Anna atlı, ju'da' qartayg'an bir payg'ambar hayal da bar edi. Ol turmısqa shıqqannan son', ku'yewi menen jeti jıl jasadı.
37 Son'ınan seksen to'rt jasına deyin jesir bolıp, İbadatxanadan shıqpay oraza tutıp ha'm duwa etip, ku'ni-tu'ni Qudayg'a sıyınatug'ın edi.
38 Sol waqıtta ol da jaqınlap kelip, Qudayg'a shu'kirlik bildirdi ha'm Erusalimnin' qutqarılıw ku'nin ku'tkenlerdin' ha'mmesine Na'reste haqqında aytıp berdi.
39 Yusup penen Ma'riyam Jaratqan İyemizdin' Nızamı boyınsha barlıq tiyisli na'rselerdi orınlap bolg'annan son', Galiladag'ı o'z qalası Nasırag'a qaytıp keldi.
40 Na'reste o'sip, ku'sh penen aqıl-danalıqqa tolısıp bardı ha'm Qudaydın' miyrimi Onın' u'stinde edi.
41 İysanın' ata-anası ha'r jılı Qutqarılıw bayramında Erusalimge baratug'ın edi
42 İysa on eki jasqa tolg'anda, olar a'dettegidey Erusalimge bayramlawg'a keldi.
43 Bayram ku'nleri tamam bolg'annan son', olar u'yine qaray jolg'a shıqtı, al jas o'spirim İysa Erusalimde qalıp qoyg'an edi. Biraq bunı ata-anası bilmedi.
44 Olar İysanı basqalar menen kiyatır dep oylap, bir ku'nlik joldı basıp o'tkennen son', Onı ag'ayinleri menen tanıslarının' arasınan izledi.
45 Tappag'annan keyin, Onı izlep Erusalimge qaytıp bardı.
46 U'sh ku'nnen son', olar İysanı İbadatxanadan taptı. Ol diniy mug'allimlerdin' ortasında olardın' so'zlerin tın'lap, sorawlar berip otırg'an edi.
47 Tın'lap otırg'anlardın' ha'mmesi Onın' aqılına ha'm bergen juwaplarına hayran qalıstı.
48 Ata-anası İysanı ko'rip, an'-tan' boldı ha'm anası Og'an: – Balam, Sen nege bizlerge bunday isledin'? A'ken' menen ekewimiz qattı qayg'ırıp, Seni izledik, – dedi.
49 İysa olarg'a: – Meni izlewdin' nege keregi bar edi? A'kemnin' u'yinde bolıwım kerek ekenin bilmedin'iz be? – dedi.
50 Biraq olar İysanın' aytqan so'zlerin tu'sinbedi.
51 İysa olar menen birge Nasıra qalasına qaytıp kelip, olardın' tilin alıp ju'rdi. Al Onın' anası bolg'an waqıyalardın' ha'mmesin kewlinde saqladı.
52 İysanın' jası da, aqıl-danalıg'ı da o'sip, Qudaydın' ha'm adamlardın' su'yispenshiligine bo'lenip bardı.
