Yuxan 10 bob
1 Sizlerge shının, haqıyqatın aytaman: kim qoy qorag'a qapıdan kirmey, basqa jerden asırılıp tu'sse, ol – urı ha'm basqınshı.
2 Al qapıdan kirgen adam qoylardın' shopanı.
3 Qarawıl og'an qapını ashıp beredi. Qoylar shopannın' dawısına qulaq saladı, ol o'z qoyların atpa-at shaqırıp, olardı sırtqa alıp shıg'adı.
4 Ol o'z qoylarının' ha'mmesin sırtqa shıg'arg'annan son', olardın' aldında ju'redi. Qoylar da onın' izine eredi, o'ytkeni olar shopannın' dawısın tanıydı.
5 Olar jat adamnın' izine ermeydi, al onnan qashıp ketedi. Sebebi jat adamnın' dawısın tanımaydı.
6 İysa olarg'a usı tımsaldı aytıp berdi. Biraq olar İysanın' ne aytpaqshı bolg'anın tu'sinbedi.
7 Sonlıqtan İysa ja'ne bılay dedi: – Sizlerge shının, haqıyqatın aytaman: Men qoylar ushın qapıman.
8 Mennen burın kelgenlerdin' ha'mmesi urılar ha'm basqınshılar edi, qoylar olarg'a qulaq aspadı.
9 Men – qapıman. Kim de kim Men arqalı kirse, qutqarıladı. Ol kiredi, shıg'adı ha'm jaylaw tabadı.
10 Urı tek urlaw, o'ltiriw ha'm nabıt qılıw ushın keledi. Biraq Men olar o'mirge iye bolıwı ushın, da'wletli o'mirge iye bolıwı ushın keldim.
11 Men – jaqsı shopanman. Jaqsı shopan qoyları ushın janın beredi.
12 Al jallang'an adam qoylardın' shopanı ha'm iyesi emes. Sonlıqtan ol qasqırdın' kiyatırg'anın ko'rip, qoylardı taslap qashıp ketedi. Al qasqır qoylarg'a shabıwıl jasap, tarqatıp jiberedi.
13 O'ytkeni ol jallang'an adam bolg'anlıqtan, qoylardı qayg'ırmay qashıp ketedi.
14 Men – jaqsı shopanman. A'kemnin' Meni biletug'ını ha'm Menin' A'kemdi biletug'ınım sıyaqlı,
15 Men de qoylarımdı bilemen, olar da Meni biledi. Men qoylarım ushın janımdı beremen.
16 Menin' bul qoradan bolmag'an basqa da qoylarım bar. Olardı da alıp keliwim tiyis. Olar Menin' dawısımdı esitedi, sonda bir shopanı bar, bir su'riw boladı.
17 Men janımdı qaytıp alıw ushın beremen. Sonlıqtan A'kem Meni su'yedi.
18 Janımdı Mennen hesh kim tartıp ala almaydı. Biraq Men onı O'zim beremen. Mende onı beriwge de, qaytıp alıwg'a da biylik bar. Bul buyrıqtı Men A'kemnen aldım.
19 Usı so'zler sebepli, yahudiyler arasında ja'ne bo'liniw payda boldı.
20 Olardın' ko'bisi: – Onı jin urg'an, Onın' esi durıs emes. Nege Onı tın'lap tursızlar? – dedi.
21 Al basqaları: – Bul jinli adamnın' so'zleri emes. Jin soqırdın' ko'zlerin asha ala ma? – dedi.
22 Sol waqıtta Erusalimde İbadatxananı Bag'ıshlaw bayramı boldı. Qıs edi.
23 İysa İbadatxanada, Sulaymannın' aywanında ju'rgen edi.
24 Yahudiy basshıları Onın' a'tirapına jıynalıp: – Qashang'a deyin bizlerdi tu'sinbewshilikke salasan'? Eger Sen Masix bolsan', bizlerge ashıg'ın ayt, – dedi.
25 İysa olarg'a juwap berip bılay dedi: – Men sizlerge ayttım, biraq sizler isenbey atırsızlar. A'kemnin' atı menen qılg'an islerim Men tuwralı gu'walıq berip atır.
26 Biraq ta, sizler isenbey atırsızlar. Sebebi sizler Menin' qoylarım emessizler.
27 Menin' qoylarım dawısıma qulaq asadı. Men olardı bilemen, olar Menin' izime eredi.
28 Men olarg'a ma'n'gilik o'mir beremen ha'm olar hesh qashan nabıt bolmaydı. Hesh kim olardı Menin' qolımnan tartıp ala almaydı.
29 Olardı Mag'an bergen A'kem – ha'mmeden ullı. A'kemnin' qolınan olardı hesh kim tartıp ala almaydı.
30 Men ha'm A'kem birmiz.
31 Sonda yahudiy basshıları Og'an ılaqtırıw ushın, jerden ja'ne tas aldı.
32 İysa olardan: – Men sizlerge A'kem tapsırg'an ko'p jaqsı islerdi ko'rsettim. Olardın' qaysı biri ushın, Meni tas penen urajaqsızlar? – dep soradı.
33 Yahudiy basshıları İysag'a juwap berip: – Seni jaqsı islerin' ushın emes, al Qudayg'a til tiygizgenin' ushın, tas penen urajaqpız. Sen adam bola tura, O'zin'di «Qudayman», – dep atırsan', – dedi.
34 İysa olarg'a bılay dedi: – «Men: sizler qudaylarsız, dedim», – dep Muxaddes Nızamın'ızda jazılg'an emes pe?
35 Quday O'z so'zin jibergen adamlardı qudaylar dep atag'an-g'o. Muxaddes Jazıwdı biykarlawg'a bolmaydı.
36 A'kenin' O'zine ajıratıp alıp, du'nyag'a jibergen Meni «Qudaydın' Ulıman», – degenim ushın, nege «Qudayg'a til tiygizip atırsan'», – deysizler?
37 Eger A'kemnin' islerin qılmay atırg'an bolsam, Mag'an isenben'ler.
38 Biraq Onın' islerin qılıp atırg'an bolsam, Mag'an isenbesen'ler de, qılg'an islerime isenin'ler. Sonda A'kenin' Mende, Menin' A'kede ekenimdi tu'sinip, bilip alasızlar.
39 Sol waqıtta olar İysanı uslawg'a ja'ne ha'reket qıldı, biraq İysa olardın' qollarınan qutılıp qaldı.
40 İysa ja'ne İordan da'ryasının' arg'ı jag'asına, burın Yaqıyanın' adamlardı shomıldırıp ju'rgen jerine barıp, sol jerde qaldı.
41 Og'an ko'p adamlar kelip: – Yaqıya hesh qanday ka'ramat islemegen edi. Biraq onın' bul Adam haqqında aytqanlarının' ha'mmesi durıs shıqtı, – dedi.
42 Sol jerde ko'p adamlar İysag'a isendi.
