Yuxan 5 bob
1 Bunnan son', yahudiylerdin' bir bayramı bolıp, İysa Erusalimge ketti.
2 Erusalimdegi Qoy da'rwazası qasında evreyshe Beytesta dep atalg'an bes aywanlı bir ha'wiz bar edi.
3 Bul jerde soqır, aqsaq ha'm,
4 la'n' bolg'an ju'da' ko'p kesel adamlar jatatug'ın edi.
5 Sol jerde otız segiz jıldan beri kesel bolg'an bir adam bar edi.
6 İysa onın' jatırg'anın ko'rgende, uzaq waqıttan beri usı awhalda ekenin bilip, onnan: – Ta'wir bolıwdı qa'leysen' be? – dep soradı.
7 Kesel adam Og'an: – Mırza, suw qozg'alg'anda, meni ha'wizge tu'siretug'ın hesh kimim joq. Men baraman degenshe, basqa adam mennen burın tu'sip aladı, – dedi.
8 İysa og'an: – Ornın'nan tur, to'segin'di al da, ju'r, – dedi.
9 Ol adam sol waqıtta-aq shıpa taptı ha'm to'segin alıp ju'rip ketti. Bul dem alıs ku'ni edi.
10 Sonlıqtan yahudiy basshıları shıpa tapqan adamg'a: – Bu'gin dem alıs ku'ni-g'o, to'segin'di alıp ju'riwge bolmaydı, – dedi.
11 Biraq, sol adam olarg'a bılay dep juwap berdi: – Mag'an shıpa bergen Adam: «To'segin'di al da, ju'r», – dedi.
12 – Sag'an: «To'segin'di al da, ju'r», – degen Adam kim? – dep soradı olar.
13 Al shıpa tapqan adam Onın' kim ekenin bilmeytug'ın edi. Sebebi İysa sol jerdegi xalıqtın' arasında ko'rinbey qalg'an edi.
14 Son'ınan İysa sol adamdı İbadatxanada ushıratıp qaldı ha'm og'an: – Mine, sen shıpa taptın'. Sag'an ja'ne de jamanıraq na'rse bolmawı ushın, bunnan bılay gu'na isleme, – dedi.
15 Sol adam barıp, o'zine shıpa bergen Adamnın' İysa ekenin yahudiy basshılarına aytıp berdi.
16 Sonlıqtan bunday islerdi dem alıs ku'ni islegeni ushın, yahudiy basshıları İysanı quwdalay basladı.
17 Biraq İysa olarg'a bılay dep juwap berdi: – A'kem usı ku'nge deyin miynet etip kiyatır, Men de miynet etip atırman.
18 Sol sebepli yahudiy basshıları Onı o'ltiriw ushın ja'ne de ko'birek ha'reket etti. O'ytkeni Ol tek dem alıs ku'nin buzıp g'ana qoymay, Qudaydı A'kem dep, O'zin Qudayg'a ten'lestirgen edi.
19 İysa yahudiylerge bılay dedi: – Sizlerge shının, haqıyqatın aytaman: Ul A'kenin' qılg'an islerin ko'rmegenshe, O'zliginen hesh na'rse isley almaydı. A'ke neni islese, Ulı da sonı isleydi.
20 Sebebi A'ke Ulın su'yedi ha'm islegenlerinin' ha'mmesin Og'an ko'rsetedi. Sizlerdi hayran qaldıratug'ın bulardan da ullıraq islerdi Og'an ko'rsetedi.
21 A'kenin' o'lilerdi tiriltip, olarg'a o'mir bergeni sıyaqlı, Ulı da qa'legen adamına o'mir beredi.
22 A'ke hesh kimdi hu'kim qılmaydı, Ol pu'tkil hu'kimdi Ulına tapsırg'an.
23 Solay etip, ha'mme adam A'keni hu'rmet etkeni sıyaqlı, Uldı da hu'rmet etsin. Uldı hu'rmet etpegen Onı jibergen A'keni de hu'rmet etpegen boladı.
24 Sizlerge shının, haqıyqatın aytaman: Menin' so'zlerimdi tın'lap, Meni Jibergenge isengen adamda ma'n'gilik o'mir bar. Ol hu'kim etilmey, o'limnen o'mirge o'tti.
25 Sizlerge shının, haqıyqatın aytaman: o'lilerdin' Qudaydın' Ulının' dawısın esitetug'ın waqtı keledi ha'm ol ha'zir keldi de. Onın' dawısın esitkenler tiriledi.
26 O'ytkeni A'kenin' O'zi o'mirdin' tiykarı bolg'anı sıyaqlı, Uldın' O'zine de o'mirdin' tiykarı bolıwdı ruxsat etti.
27 Og'an hu'kim etiw biyligin de berdi. Sebebi Ol – Adam Ulı.
28 Bug'an hayran qalman'lar. Qa'birdegilerdin' ha'mmesinin' Onın' dawısın esitetug'ın waqtı kiyatır.
29 Olar qa'birlerden shıg'adı. Jaqsılıq qılg'anlar jasaw ushın, jamanlıq qılg'anlar hu'kim etiliw ushın qayta tiriledi.
30 Men O'zligimnen hesh na'rse isley almayman. Qalay esitsem, solay hu'kim qılaman ha'm Menin' hu'kimim a'dil. O'ytkeni Men O'z erkimdi emes, al Meni jibergen A'kemnin' erkin orınlawg'a tırısaman.
31 Eger Men O'zim tuwralı O'zim gu'walıq bersem, gu'walıg'ım haqıyqıy bolmaydı.
32 Biraq Men tuwralı gu'walıq beriwshi basqa Birew bar, Onın' Men tuwralı berip atırg'an gu'walıg'ının' haqıyqat ekenin bilemen.
33 Sizler Yaqıyag'a adamlardı jiberdin'ler, ol haqıyqat haqqında gu'walıq berdi.
34 Men adamnın' gu'walıg'ına mu'ta'j bolmasam da, bulardı sizlerdin' qutqarılıwın'ız ushın aytıp atırman.
35 Yaqıya – janıp, nur shashıp turg'an shıra edi. Sizler onın' nurında az waqıt quwanıwdı qa'ledin'ler.
36 Biraq Mende Yaqıyanikinen ullıraq gu'walıq bar. Sebebi A'kemnin' Mag'an orınlawım ushın tapsırg'an isleri, usı islep atırg'an islerimnin' o'zi Meni A'kemnin' jibergeni haqqında gu'walıq berip atır.
37 Meni jibergen A'kemnin' O'zi Men tuwralı gu'walıq berip tur. Sizler hesh qashan Onın' dawısın da esitpegensizler, ju'zin de ko'rmegensizler.
38 Onın' so'zleri de sizlerde jay almaydı, o'ytkeni sizler Onın' Jibergenine isenbey atırsızlar.
39 Sizler Muxaddes Jazıwlardı izertleysizler, sebebi olar arqalı ma'n'gilik o'mirge iye bolamız, dep oylaysızlar. Al olar Men tuwralı gu'walıq beredi.
40 Biraq sizler ma'n'gilik o'mirge iye bolıw ushın, Mag'an keliwdi qa'lemeysizler-g'o.
41 Men adamlardan maqtaw qabıl qılmayman.
42 Biraq sizlerdi bilemen, kewillerin'izde Qudaydın' su'yispenshiligi joq.
43 Men A'kemnin' atınan kelsem de, Meni qabıl etpey atırsızlar. Eger basqa birew o'z atı menen kelse, onı qabıl etesizler.
44 Sizler bir-birin'izden maqtaw esitiwdi jaqsı ko'resizler, biraq jalg'ız Qudaydın' maqtawına erisiwge umtılmaysızlar. Olay bolsa, Mag'an qalay isene alasızlar.
45 Meni A'kemnin' aldında sizlerdi ayıplaydı, dep oylaman'lar. Sizlerdi ayıplawshı o'zlerin'iz u'mit etetug'ın Muwsa boladı.
46 Muwsag'a isengenin'izde, Mag'an da isener edin'ler. O'ytkeni ol Men tuwralı jazg'an edi.
47 Biraq Muwsanın' Jazıwlarına isenbesen'ler, Menin' so'zlerime qalay isenesizler?
