Yuxan 9 bob
1 İysa o'tip baratırg'anda, ishten soqır bolıp tuwılg'an bir adamdı ko'rdi.
2 Sha'kirtleri İysadan: – Ustaz! Bul adamnın' soqır bolıp tuwılıwı kimnin' gu'nası sebepli boldı, o'zinin' be yamasa ata-anasının' ba? – dep soradı.
3 İysa bılay dep juwap berdi: – Bul adamnın' o'zinin' de, ata-anasının' da gu'nası sebepli bolg'an joq. Qudaydın' isleri onın' o'mirinde ko'riniwi ushın, ol soqır bolıp tuwıldı.
4 Ele ku'ndiz eken, Meni Jibergennin' islerin islewimiz kerek. Tu'n keledi, sonda hesh kim isley almaydı.
5 Men du'nyada ekenmen, du'nyanın' nurıman.
6 İysa bul so'zlerdi aytıp bolıp, jerge tu'kirdi de, tu'kirikten ılay islep, onı soqırdın' ko'zlerine jaqtı.
7 ha'm og'an: – Barıp, Siloha ha'wizinde juwın, – dedi. Siloha – «Jiberilgen» degen ma'nisti bildiredi. Ol barıp juwındı ha'm ko'zleri ko'retug'ın bolıp, qaytıp keldi.
8 Sonda qon'sıları ha'm burın onın' tilenshilik etip otırg'anın ko'rgenler: – Bul – tilenshilik etip otıratug'ın sol adam emes pe? – dedi.
9 Birewleri: «Awa, sol», dese, basqaları: «Yaq, ol tek sog'an uqsaydı», desti. Al onın' o'zi: «Men sol adamman», dedi.
10 – Olay bolsa, ko'zlerin' qalay ashıldı? – dep soradı olar.
11 Ol juwap berip: – İysa degen Adam ılay islep, ko'zlerime jaqtı ha'm mag'an: «Siloha ha'wizine barıp, juwın», – dedi. Sonda men barıp, juwındım ha'm ko'zlerim ko'retug'ın boldı, – dedi.
12 Olar: – Ol qayaqta? – dep soradı. – Bilmeymen, – dedi ol.
13 Adamlar burın soqır bolg'an adamdı pariseylerdin' aldına alıp bardı.
14 İysanın' ılay islep, soqırdın' ko'zin ashqan ku'n dem alıs ku'ni edi.
15 Sonda pariseyler de onnan ko'zlerinin' qalay ko'retug'ın bolg'anın soradı. Sol adam olarg'a: – İysa menin' ko'zlerime ılay jaqtı. Men juwındım ha'm endi ko'retug'ın boldım, – dedi.
16 Sonda geybir pariseyler: – Bul Adam Qudaydan emes. O'ytkeni dem alıs ku'ni jumıs islep atır, – dedi. Biraq basqaları: – Gu'nakar adam bunday ka'ramatlardı qalay isley aladı? – dedi. Solay etip, olardın' arasında bo'liniw payda boldı
17 Olar ja'ne burın soqır bolg'an sol adamnan: – Ko'zlerin'di ashqan sol Adam haqqında sen ne aytasan'? – dep soradı. – Ol payg'ambar, – dedi ol.
18 Biraq yahudiy basshıları ko'zleri ashılg'an adamnın' ata-anasın shaqırtpag'ansha, onın' burın soqır bolg'anına ha'm endi ko'zlerinin' ko'retug'ınına isenbedi.
19 Olar onın' ata-anasınan: – İshten soqır bolıp tuwıldı, dep aytqan ulın'ız usı ma? Endi ol qalay ko'retug'ın boldı? – dep soradı.
20 Onın' ata-anası juwap berip: – Onın' bizlerdin' ulımız ekenin ha'm soqır bolıp tuwılg'anın bilemiz.
21 Biraq, endi qalay onın' ko'retug'ın bolg'anın ha'm onın' ko'zlerin kimnin' ashqanın bilmeymiz. O'zinen soran', ol erjetken, o'zi ushın o'zi so'ylesin, – dedi.
22 Soqır adamnın' ata-anası yahudiy basshılarınan qorqqanlıqtan usılay dedi. Sebebi yahudiy basshıları: «Kim İysanın' Masix ekenin ta'n alsa, ol ma'jilisxanadan quwılsın», – dep til biriktirgen edi.
23 Sonlıqtan onın' ata-anası: «Ol erjetken, o'zinen soran'», – degen edi.
24 Solay etip, pariseyler soqır bolg'an adamdı ekinshi ma'rte shaqırıp, og'an: – Haqıyqatın aytıp, Qudaydı maqta! Bizler bul Adamnın' gu'nakar ekenin bilemiz, – dedi.
25 – Ol gu'nakar ma, gu'nakar emes pe, bilmeymen. Men tek bir na'rseni bilemen: soqır edim, endi ko'retug'ın boldım, – dep juwap berdi ol.
26 Olar ja'ne onnan: – Ol sag'an ne isledi? Ko'zlerin'di qalay ashtı? – dep soradı.
27 – Men sizlerge jan'a g'ana ayttım-g'o, biraq sizler tın'lamadın'lar. Ja'ne ne esitpekshisizler? Sizler de Onın' sha'kirtleri bolıwdı qa'leysizler me? – dep juwap berdi ol.
28 Sonda yahudiyler og'an jekirinip: – Sen Onın' sha'kirti! Al bizler Muwsanın' sha'kirtlerimiz!
29 Qudaydın' Muwsa menen so'yleskenin bilemiz. Biraq bul Adamnın' qayaqtan kelgenin bilmeymiz, – dedi.
30 Ko'zi ashılg'an adam olarg'a: – Tan' qalarlıg'ı sol-da'! Sizler Onın' qayaqtan kelgenin bilmeysizler, biraq Ol menin' ko'zlerimdi ashtı.
31 Bizler Qudaydın' gu'nakarlardı tın'lamaytug'ının bilemiz. Biraq kim de kim Qudaydı sıylap, Onın' erkin orınlasa, sonı tın'laydı.
32 Du'nya bar bolg'alı, ishten soqır bolıp tuwılg'an adamnın' ko'zin birewdin' ashıwı – hesh esitilmegen ga'p.
33 Eger bul Adam Qudaydan bolmag'anda, hesh na'rse isley almas edi, – dedi.
34 Yahudiyler og'an juwap berip: – O'zin' pu'tkilley gu'nag'a batıp tuwılg'ansan', sen be bizlerdi u'yretetug'ın? – dep, onı quwıp shıg'ardı.
35 Pariseylerdin' onı quwıp shıg'arg'anın esitken İysa onı tawıp: – Sen Adam Ulına isenesen' be? – dep onnan soradı.
36 Ol juwap berip: – Mırza, Ol kim? Mag'an ayt, men de Og'an iseneyin, – dedi.
37 İysa og'an: – Sen Onı ko'rdin'. Mine, senin' menen so'ylesip turg'an – Onın' O'zi, – dedi.
38 Sonda ol: – İyem, isenemen, – dep, İysag'a tabındı.
39 İysa: – Soqırlar ko'rsin, ko'retug'ınlar soqır bolsın dep, Men bul du'nyanı hu'kim etiwge keldim, – dedi.
40 İysanın' qasında bolg'an ayırım pariseyler bul so'zlerdi esitip, Og'an: – Ne, bizler de soqırmız ba? – dedi.
41 İysa olarg'a: – Eger sizler soqır bolg'anın'ızda, gu'nan'ız bolmas edi. Biraq: «Ko'zlerimiz ko'redi» degenin'iz ushın, gu'nan'ız moynın'ızda qaladı, – dedi.
