1 Petr 2 bob
1 Sonlıqtan ha'r qanday jamanlıqtı, ha'r qıylı o'tirikti ha'm eki ju'zlilikti, ku'nshillikti ha'm ha'r qanday o'sekti qoyın'lar!
2 Jan'a tuwılg'an na'restelerdin' ana su'tine qushtar bolg'anınday, sizler de ruwxıy taza su't bolg'an Qudaydın' so'zine qushtar bolın'lar. Sonda azıq alıp o'sip, qutqarılasızlar.
3 Sebebi sizler İyemizdin' jaqsılıg'ın tatıp ko'rdin'ler.
4 Adamlar kereksiz dep taslag'an, biraq Quday ta'repinen tan'lang'an biybaha tiri tasqa – İyemiz İysag'a kelin'ler.
5 Sizler de tiri taslar sıyaqlısızlar. Sonlıqtan Quday sizlerdi ruwxıy İbadatxana salıwda qollanıp, İysa Masix arqalı O'zine unaytug'ın ruwxıy qurbanlıq beriwin'iz ushın, muxaddes ruwxaniyler qılıp atır.
6 O'ytkeni Muxaddes Jazıwda bılay delingen: «Mine, Men O'zim tan'lag'an biybaha bir tastı, mu'yeshke qoyılatug'ın tiykarg'ı tastı Erusalimde ornataman.
7 İsenetug'ın sizler ushın bul tas qımbatlı. Al isenbeytug'ınlar ushın Ol: «Qurılısshılar kereksiz dep taslag'an tas, U'ydin' mu'yeshinin' tiykarg'ı tası boldı».
8 Ja'ne de, «Su'rniktiretug'ın ha'm qulatatug'ın jartas boldı» . İsenbeytug'ınlar Qudaydın' so'zin tın'lamag'anı ushın su'rnigedi. Bul olardın' ta'g'dirine jazılg'an.
9 Biraq sizler Quday ta'repinen tan'lang'an adamlar, Patshanın' ruwxaniyleri, muxaddes millet ha'm Qudayg'a tiyisli xalıqsız. Sizler o'zlerin'izdi qaran'g'ılıqtan O'zinin' a'jayıp nurına shaqırg'an Qudaydın' tan' qalarlıq islerin ja'riyalaw ushın tan'landın'lar.
10 Bir waqıtları Qudaydın' xalqı emes edin'ler. Biraq endi Qudaydın' xalqısız. Bir waqıtları Qudaydın' miyrim-sha'pa'a'tin bilmegen edin'ler, endi bolsa, Onın' miyrim-sha'pa'a'tin aldın'lar.
11 Su'yikli tuwısqanlarım, bul du'nyada jat jerli ha'm qonaq bolg'an sizlerge jalbarınaman, janın'ızg'a ha'r qashan qarsı turatug'ın denenin' jaman qa'lewlerinen qashın'lar.
12 İsenbeytug'ınlar arasında hadal o'mir su'rin'ler. Olar sizlerdi jamanlıq islewshiler, dep ayıplasa da, jaqsı islerin'izdi ko'rip, Quday keletug'ın ku'ni Onı alg'ıslaydı.
13 İyemiz İysa ushın, adamlar ornatqan ha'r qanday ha'kimshilikke boysının'lar. Joqarı biylikke iye patshag'a ha'm.
14 amanlıq islewshilerdi jazalaw, jaqsılıq islewshilerdi xoshametlew ushın patsha ta'repinen jiberilgen ha'kimlerge boysının'lar.
15 Sebebi Quday sizlerdin' jaqsı islerin'iz arqalı aqılsız adamlardın' o'sek so'zlerinin' toqtawın qa'leydi.
16 Al sizler azat adamlarsız. Biraq azatlıg'ın'ızdı jamanlıq islew ushın paydalanbay, Qudaydın' qulları bolıp jasan'lar.
17 Ha'mme adamlarg'a hu'rmet ko'rsetin'ler. İseniwshi tuwısqanların'ızdı su'yin'ler. Qudaydan qorqın'lar, patshanı sıylan'lar.
18 Ha'y qullar, xojayınların'ızg'a boysının'lar! Olardın' tek jaqsı ha'm miyrimlilerin g'ana emes, al qatalların da tolıq hu'rmet etip, boysının'lar.
19 Eger kim de kim nahaq azap shekkende Qudaydı oylap, azaplarg'a shıdasa, bul Qudayg'a unaydı.
20 Eger gu'na islegenin'iz ushın tayaq jegenin'izde shıdasan'ız, bul sizlerge abıray a'perer me eken? Biraq, jaqsılıq isley tura azap shekkenin'izde shıdasan'ız, bul Qudayg'a unaydı.
21 O'ytkeni Quday sizlerdi usı ushın shaqırdı. Masixtın' O'zi sizler ushın azap shegip, Onın' izinen ju'riwin'iz ushın o'rnek ko'rsetti.
22 «Ol gu'na islemedi, awzınan hesh jalg'an so'z de shıqpadı» .
23 Masqaralang'anda hesh kimge masqaralaw menen juwap qaytarmadı. Ol azap shekkende de hesh kimdi qorqıtpadı, al O'zin a'dillik penen hu'kim etiwshi Qudaydın' qolına tapsırdı.
24 Bizlerdin' gu'na ushın o'lip, haq bolıp jasawımız ushın, Ol gu'nalarımızdı atanaq ag'ashta O'z denesine ju'kledi. Onın' jaraqatları arqalı shıpa taptın'ız.
25 Burın adasqan qoylar sıyaqlı edin'iz, endi bolsa, janların'ızdın' Shopanına ha'm Bag'ıwshısına qaytıp keldin'ler.
