Nızamnın' qaytalanıwı 12 bob

Sıyınıw ushın tek g'ana bir orın (1-28), Jalg'an qudaylarg'a tabınban'lar (29-32).

¹ «Ata-babaların'ızdın' Qudayı Jaratqan İye sizlerge mu'lik etip berip atırg'an elde o'mirin'iz dawamında usı qag'ıyda ha'm nızamlardı muqıyatlı tu'rde orınlan'lar.

² Sizler jerlerin iyeleytug'ın xalıqlardın' biyik tawlardag'ı, to'beshiklerdegi ha'm qoyıw japıraqlı tereklerdin' astındag'ı o'z qudaylarına tabınatug'ın orınların buzıp, pu'tkilley joq qılın'lar.

³ Olardın' qurbanlıq orınların buzın', kiyeli tasların sındırıp taslan', kiyeli ag'ashların jag'ıp jiberin' ha'm qudaylarının' mu'sinlerin maydalap taslan'. Solay etip, olardın' qudaylarının' atların ol jerden joq qılın'lar.

⁴ Sizler Qudayın'ız Jaratqan İyege sol xalıqlardın' tabıng'anınday etip sıyınban'lar.

⁵ Qudayın'ız Jaratqan İye O'z atın ornatıw ushın, urıwların'ız arasında bir jerdi tan'lap aladı. Sizler sol jerge barıp, Og'an sıyının'lar.

⁶ Sizler jandırılatug'ın qurbanlıqların'ızdı, basqa qurbanlıqların'ızdı, u'sirlerin'izdi, bag'ıshlag'an zatların'ızdı, wa'de etip atag'an ha'm ıqtıyarlı sadaqaların'ızdı, iri ha'm mayda malların'ızdın' birinshi to'llerin sol jerge alıp barın'lar.

⁷ Ol jerde sizler Qudayın'ız Jaratqan İyenin' aldında o'z shan'arag'ın'ız benen birge iship-jep, Onın' barlıq islerin'izge bereket bergeni ushın shadlanın'lar.

⁸ Bu'gin bizler usı jerde islep atırg'an islerimizdi sol jerde islemen'ler. Bul jerde ha'r kim o'zi qa'legenindey sıyınıp atır.

⁹ O'ytkeni sizler Qudayın'ız Jaratqan İyenin' mu'lik etip berip atırg'an, tınıshlıqqa eristiretug'ın jerine ele kirmedin'iz.

¹⁰ Degen menen, tez arada sizler İordan da'ryasınan o'tip, Qudayın'ız Jaratqan İye mu'lik etip, sizlerge beretug'ın jerge ornalasıp alasız. Jaratqan İye sizlerdi do'geregin'izdegi barlıq dushpanların'ızdan qorg'ap, tınıshlıqqa bo'leydi. Keyin sizler qa'wip-qa'tersiz o'mir su'resiz.

¹¹ Qudayın'ız Jaratqan İye O'z atın ornalastırıw ushın, bir jerdi tan'laydı. Sonda men sizlerge buyırg'an barlıq jandırılatug'ın qurbanlıqların'ızdı, basqa qurbanlıqların'ızdı, u'sirlerin'izdi, bag'ıshlag'an zatların'ızdı ha'm Jaratqan İyege wa'de etip atag'an en' jaqsı sadaqaların'ızdı sol jerge alıp barın'lar.

¹² Sol jerde ulların'ız, qızların'ız, qulların'ız ha'm shorıların'ız, ja'ne de, qalaların'ızda jasaytug'ın lebiyliler menen Qudayın'ız Jaratqan İyenin' aldında shadlanın'lar. O'ytkeni sizler sıyaqlı, lebiylilerdin' o'zlerine tiyisli jer u'lesi joq.

¹³ Jandırılatug'ın qurbanlıqların'ızdı dus kelgen jerde usınıwdan awlaq bolın'lar.

¹⁴ Bulardı tek Jaratqan İye urıwların'ız arasınan tan'lag'an orında g'ana usının'lar. Men sizlerge buyırg'anlardın' ha'mmesin sol jerde orınlan'lar.

¹⁵ Qudayın'ız Jaratqan İyenin' sizlerge bergen bereketine jarasa, jasap atırg'an ha'r bir qalan'ızda qa'legenin'izshe mal soyıp, go'shin jewin'izge boladı. Adam haram bolsın, pa'k bolsın, jeyran yamasa suwın go'shinen jegendey, bul go'shten jewine boladı.

¹⁶ Biraq sizler maldın' go'shin qanı menen birge jemen'ler, onın' qanın suwday etip, jerge ag'ızıp jiberin'ler.

¹⁷ Ja'ne de, da'nlerin'izdin', taza sharabın'ızdın', za'ytu'n mayın'ızdın' u'sirlerin, iri ha'm mayda malların'ızdın' birinshi to'llerin, wa'de etip atag'an ha'm ıqtıyarlı sadaqaların'ızdı ha'm bag'ıshlag'an sadaqaların'ızdı jasap atırg'an qalaların'ızda jemen'ler.

¹⁸ Al sizler bulardı ul-qızların'ız, qulların'ız, shorıların'ız ha'm qalaların'ızda jasap atırg'an lebiyliler menen birge Qudayın'ız Jaratqan İyenin' aldında, Onın' tan'lag'an jerinde jen'ler. Qudayın'ız Jaratqan İye sizlerdin' barlıq islerin'izge bereket bergenine shadlanıwın'ız kerek.

¹⁹ Elin'izde jasag'an waqtın'ızda, lebiylilerdi umıtıp ketiwden awlaq bolın'lar.

²⁰ Qudayın'ız Jaratqan İye sizlerge bergen wa'desi boyınsha shegaran'ızdı ken'eytkende, go'sh jewdi qa'lesen'iz, qa'legen waqtın'ızda go'sh jewin'izge boladı.

²¹ Qudayın'ız Jaratqan İye O'z atın ornatıw ushın tan'lag'an jer sizler turg'an jerden uzaq bolsa, men buyırg'anday, Jaratqan İye sizlerge bergen iri ha'm mayda malların'ızdan soyıp, o'z qalaların'ızda qa'legenin'izshe go'sh jewin'izge boladı.

²² Haram adam bolsa da, pa'k adam bolsa da, jeyran yamasa suwın go'shindey, sol go'shten jewine boladı.

²³ Biraq onın' go'shin qanı menen birge jemen'ler.

²⁴ Sebebi denege jan beretug'ın qandur. Go'sh penen birge jan jemen'ler, qandı suwday etip, jerge ag'ızıp jiberin'ler.

²⁵ Usılay islesen'iz o'zlerin'iz de, a'wladların'ız da abadan turmıs keshiresiz. Solay etip, sizler Jaratqan İyenin' na'zerinde durıs bolg'an isti qılg'an bolasız.

²⁶ Al muxaddes qurbanlıqların'ızdı ha'm usıg'an kiretug'ın wa'de etip atag'an qurbanlıqların'ızdı bolsa, Jaratqan İyenin' tan'laytug'ın jerine alıp barıwın'ız tiyis.

²⁷ Jandırılatug'ın qurbanlıqların'ızdı, olardın' go'shin ha'm qanın Qudayın'ız Jaratqan İyenin' qurbanlıq ornında usının'lar. Basqa qurbanlıqların'ızdın' qanı Qudayın'ız Jaratqan İyenin' qurbanlıq ornının' qasına to'gilsin, al olardın' go'shinen jewin'izge boladı.

²⁸ Men sizlerge berip atırg'an bul buyrıqlardın' birewin de qaldırmay orınlan'lar. Sonda o'zlerin'iz de, a'wladların'ız da ha'mme waqıtta abadan turmıs keshiredi. O'ytkeni Qudayın'ız Jaratqan İyenin' na'zerinde jaqsı ha'm durıs bolg'an isti islegen bolasız».

²⁹ «Qudayın'ız Jaratqan İye sizler jerlerin iyeleyin dep atırg'an xalıqlardı sizlerdin' aldın'ızdan quwıp, qırıp taslaydı. Keyin sizler olardın' jerlerin iyelep, sol jerlerde jaylasıp alasız.

³⁰ Sol xalıqlardı joq qılg'anın'ızdan keyin, olardın' diniy da'stu'rlerin islep, duzag'ına tu'siwden abaylı bolın'lar. Sizler: „Bul xalıqlar qudaylarına qalay tabıng'an eken? Bizler de sonday qılayıq“, – dep olardın' qudayları haqqında sorastırman'lar.

³¹ Sizler Qudayın'ız Jaratqan İyege olardın' tabıng'anınday etip, sıyınban'lar. Sebebi olar Jaratqan İye jek ko'retug'ın ha'r tu'rli jerkenishli islerdi isleydi. Ha'tteki, ol xalıqlar qudaylarına arnap, ul-qızların otta jandıradı.

³² Men sizlerge buyırg'anlarımnın' ha'mmesin muqıyatlı tu'rde orınlan'lar. Bul buyrıqlarg'a hesh na'rse qospan' da, alıp taslaman' da».