Rimliler 11 bob
1 Olay bolsa, men mına na'rseni sorap atırman: Quday O'z xalqınan ju'z burdı ma? Hesh qashan! Men de İbrayımnın' urpag'ınan, Benamin urıwınan shıqqan izraillıman.
2 Quday O'zi burınnan tan'lag'an xalqınan ju'z burmadı. Muxaddes Jazıwdın' İliyas payg'ambar tuwralı jazılg'an jerinde ne aytılg'anın bilmeysizler me? İliyas İzrail u'stinen Qudayg'a shag'ım jasap bılay degen edi:
3 «İyem! Olar Senin' payg'ambarların'dı o'ltirdi, Sag'an qurbanlıq shalınatug'ın jerlerdi qıyrattı. Tek jalg'ız men g'ana qaldım. Olar meni de o'ltiriwge ha'reket etpekte» .
4 Og'an Quday ne dep juwap bergen edi? «Baaldın' *aldında dize bu'kpegen jeti mın' adamdı Men O'zim ushın ajıratıp aldım».
5 Sol sıyaqlı, ha'zirgi waqıtta da izraillılar arasında Qudaydın' miyrimi menen tan'lang'an az g'ana adamlar bar.
6 Olar sawap isleri sebepli emes, al Qudaydın' miyrimi menen tan'lap alındı. Eger olar sawap isleri sebepli tan'lap alıng'anda, miyrim miyrim bolmas edi.
7 Solay etip, ne ju'z berdi? İzrail xalqının' ko'pshilik bo'legi izlegen na'rsesin taba almadı. Tek olardın' arasınan tan'lap alıng'anlar g'ana taptı. Al qalg'anlarının' ju'rekleri tas etildi.
8 Muxaddes Jazıwda aytılg'anday: «Quday olarg'a O'zinin' so'zin tu'sinbewi ushın biypa'rwalıq ruwxın berdi. Sonlıqtan olar usı ku'nge deyin, Qo'zleri bolsa da, ko'rmeydi, Qulaqları bolsa da, esitpeydi».
9 Dawıt bılay deydi: «Olar dasturxan basında otırg'anda duzaqqa tu'sip, Qaqpang'a alınsın ha'm qulap, jazalansın.
10 Ko'zlerin qaran'g'ılıq basıp, ko'rmey qalsın. Belleri awırmanlıqtan ma'n'gige bu'gilip qalsın!»
11 Olay bolsa, men mınanı sorap atırman: izraillılar tolıq nabıt bolıw ushın su'rnikti me? Hesh qashan! Biraq, izraillılardın' gu'naları sebepli, Quday basqa milletlerge qutqarılıw berdi ha'm bul arqalı olarda qızg'anısh oyattı.
12 Eger izraillılardın' gu'na islep qulap qalg'anı du'nyadag'ı basqa milletlerge baylıq alıp kelip, olardı bayıtsa, onda pu'tkil izraillılardın' qutqarılıwı du'nyadag'ı basqa milletlerge qanshelli ko'p baylıq alıp keledi!
13 Basqa milletlerden bolg'an sizlerge aytıp atırman: basqa milletler ushın elshi bolıp tayınlang'an men o'z xızmetimdi ma'rtebeli dep esaplayman.
14 Usı xızmetim arqalı milletim bir bolg'an tuwısqanlarımda qızg'anısh oyansa ha'm olardın' ayırımları bolsa da qutqarılsa eken.
15 O'ytkeni olardın' Quday ta'repinen qabıl etilmegeni du'nyadag'ı basqa milletlerdin' Quday menen jarasıwına sebepshi bolg'an bolsa, onda olardın' Quday ta'repinen qabıl etiliwi du'nyadag'ı basqa milletlerdin' qutqarılıp, o'limnen o'mirge o'tiwine sebepshi bolmay ma.
16 Eger qamırdın' birinshi bo'legi Qudayg'a bag'ıshlanıp, muxaddes bolsa, onda pu'tkil qamır da muxaddes boladı. Eger terektin' tamırı muxaddes bolsa, onda shaqaları da muxaddes.
17 Biraq, eger za'ytu'n ag'ashının' ayırım shaqaları, yag'nıy yahudiylerdin' ayırımları kesilip taslanıp, jabayı za'ytu'n ag'ashının' shaqası bolg'an sen, yag'nıy basqa millet adamı olardın' ornına jalg'anıp, ag'ashtın' shireli tamırınan na'r alsan',
18 kesilgen shaqalar aldında maqtanıp ketpe! Eger maqtanıp ketsen', umıtpa, sen tamırg'a emes, al tamır sag'an na'r berip turıptı.
19 Sen: «Menin' jalg'anıwım ushın shaqalar kesilip taslandı», – dewin' mu'mkin.
20 Durıs. Olar isenbegenlikten kesilip taslandı. Al sen isenimin' sebepli jalg'anıp turıpsan'. Sen maqtanba, al qorq!
21 Sebebi Quday ta'biyg'ıy shaqalardı ayamag'an bolsa, onda seni de ayamaydı.
22 Solay etip, sen Qudaydın' miyrim-sha'pa'a'tin ha'm qatallıg'ın ko'rip qoy: Quday isenimnen qaytqanlarg'a qatal. Biraq sen Onın' miyrimsha'pa'a'tine sadıq qalsan', Ol da sag'an miyrim-sha'pa'a'tli. Olay bolmasa, sen de kesilip taslanasan'!
23 Degen menen, eger yahudiyler de isenbewshiligin qoysa, ag'ashqa ja'ne qayta jalg'anadı. O'ytkeni Quday olardı qaytadan jalg'ap qoyıwg'a qu'diretli.
24 Jabayı za'ytu'n ag'ashınan kesilip alıng'an shaqa bolg'an sen ta'biyatqa qarsı tu'rde jaqsı za'ytu'n ag'ashına jalg'andın'. Solay eken, ta'biyg'ıy shaqalardın' o'z ag'ashına qaytadan jalg'anıwı bunnan da an'satıraq!
25 Tuwısqanlarım, bilgishsinip ketpewin'iz ushın, sizlerdin' mına sırdan xabarsız qalıwın'ızdı qa'lemeymen: basqa milletlerden qutqarılatug'ınlardın' sanı tolmag'ansha, İzrail xalqının' bir bo'leginin' ju'regi tas bolıp qala beredi.
26 Biraq aqırında pu'tkil İzrail qutqarıladı. Muxaddes Jazıwda bılay delingen: «Quday İyemiz bılay deydi: „Qutqarıwshı Erusalimnen keledi, Ol Yaqıptın' urpag'ı bolg'an izraillılardı qudaysızlıqtan qutqaradı.
27 Olardın' gu'naların keshirgenimde, Menin' olar menen du'zgen kelisimim usı boladı“».Biraq aqırında pu'tkil İzrail qutqarıladı. Muxaddes Jazıwda bılay delingen: «Quday İyemiz bılay deydi: „Qutqarıwshı Erusalimnen keledi, Ol Yaqıptın' urpag'ı bolg'an izraillılardı qudaysızlıqtan qutqaradı.
28 Xosh Xabardı qabıl etpegeni sebepli, yahudiyler Qudayg'a dushpan boldı. Bul sizlerdin' paydan'ız ushın xızmet etpekte. Degen menen, Quday olardın' ata-babaların tan'lap alg'anlıqtan, olardı su'yedi.
29 Sebebi Quday O'zinin' sıyların qaytarıp alıp, shaqırıg'ın biykarlamaydı.
30 Sizler bir waqıtları Qudayg'a boysınbaytug'ın edin'ler, biraq endi yahudiyler boysınbag'anı sebepli, sizler Qudaydın' miyrim-sha'pa'a'tine eristin'ler.
31 Sol sıyaqlı, yahudiyler ha'zir boysınbay atırg'an bolsa da, sizlerdin' Qudaydın' miyrim-sha'pa'a'tine eriskenin'iz sebepli, olar da Qudaydın' miyrim-sha'pa'a'tine erisedi.
32 O'ytkeni Quday ha'mme adamlardı olardın' boysınbaytug'ın ta'biyatına tutqın qılıp, olarg'a O'z miyrim-sha'pa'a'tin ko'rsetti.
33 O, Qudaydın' baylıg'ı, danalıg'ı ha'm bilimi qanday teren'! Onın' sheshimlerine hesh kimnin' aqılı jetpeydi, jolların da hesh kim izertlep shıg'a almaydı!
34 «İyemizdin' oy-pikirlerin kim bile aladı? Kim Og'an ma'sla'ha'tshi bolg'an?».
35 «Qudaydan qaytarıp alıw ushın, Kim Og'an aldın ala bir na'rse bergen?».
36 Sebebi Quday pu'tkil barlıqtı jaratqan. Ha'mmesi Ol arqalı ha'm Ol ushın bar bolg'an. Og'an ma'n'gige dan'q bolsın! Awmiyin.
