1 Korinfliler 12 bob
1 Endi ruwxıy sıylarg'a kelsek, tuwısqanlarım, sizlerdin' bul haqqında xabarsız qalıwın'ızdı qa'lemeymen.
2 Sizlerge ma'lim, butparaz bolg'an waqtın'ızda birew moynın'ızg'a jip salıp su'yregendey bolıp, tilsiz butlarg'a tabınatug'ın edin'ler.
3 onlıqtan mına na'rseni biliwin'izdi qa'leymen: Qudaydın' Ruwxının' basqarıwında so'yleytug'ın hesh bir adam: «İysag'a na'let jawsın», – dep aytpaydı. Ja'ne de, tek Muxaddes Ruwx basqaratug'ın adam g'ana: «İysa – menin' İyem», – dep ayta aladı.
4 Ha'r qıylı ruwxıy sıylar bar, biraq olardı beretug'ın Muxaddes Ruwx birew.
5 Ha'r tu'rli xızmetler bar, biraq bizler xızmet etetug'ın İyemiz jalg'ız.
6 Ha'r qıylı is-ha'reketler bar, biraq barlıq iseniwshi adamlardın' ha'r bir isinde ha'reket etiwshi Quday jalg'ız.
7 Pu'tkil iseniwshiler ja'ma'a'tinin' paydası ushın, Muxaddes Ruwx ha'r bir iseniwshige O'z sıyın beredi.
8 Muxaddes Ruwx birewge aqıl-danalıq so'zlerin, birewge bilim so'zlerin,
9 sol Muxaddes Ruwx birewge ayrıqsha isenim, birewge awırıwlarg'a shıpa beriw sıyın,
10 birewge ka'ramatlar ko'rsetiw ku'shin beredi. Ja'ne de, sol Muxaddes Ruwx birewge payg'ambarshılıq aytıw, birewge ruwxlardı ayırıp biliw, birewge basqa tillerde so'ylew, birewge basqa tillerdi tu'sindiriw sıyın beredi.
11 Bulardın' ha'mmesin iske asırıwshı bir ha'm anıq sol Muxaddes Ruwx. Muxaddes Ruwx bul sıylardı O'z qa'lewi boyınsha ha'r kimge bo'lip beredi.
12 Adamnın' denesi birew bolg'anı menen, denenin' ko'p mu'sheleri bar ha'm mu'sheler ko'p bolsa da, olar bir deneni quraydı. Masixtın' denesi bolg'an iseniwshiler ja'ma'a'ti de sonday.
13 Sebebi bizler kim bolıwımızg'a qaramay, yahudiy bolsaq ta, grek bolsaq ta, qul yamasa azat adam bolsaq ta, ha'mmemiz Masixtın' denesi bolıwımız ushın, bir Muxaddes Ruwx ta'repinen shomıldırıldıq. Quday bizlerdin' ha'mmemizge bir Muxaddes Ruwxtı berdi.
14 Dene bir emes, al ko'p mu'shelerge iye.
15 Eger ayaq: «Men qol bolmag'anım ushın, denege tiyisli emespen», – dese de, ol denege tiyisli emes bolıp qalmaydı.
16 Eger qulaq: «Ko'z bolmag'anım ushın, denege tiyisli emespen», – dese de, ol denege tiyisli emes bolıp qalmaydı.
17 Eger pu'tkil dene ko'z bolsa, onda qalay esitiwge boladı? Eger pu'tkil dene qulaq bolsa, onda qalay iyis seziwge boladı?
18 Sonlıqtan Quday ha'r bir mu'sheni denege O'z qa'lewi boyınsha jaylastırıp qoyıptı.
19 Eger mu'shelerdin' ha'mmesi birdey bolg'anda, onda dene qayaqta bolar edi?
20 Al haqıyqatında, mu'sheler ko'p bolsa da, dene birew.
21 Ko'z qolg'a: «Senin' mag'an keregin' joq!» yamasa bas ta ayaqlarg'a: «Sizler mag'an kerek emessiz!» – dey almaydı.
22 Kerisinshe, denenin' ha'lsizirek ko'ringen mu'sheleri anag'urlım a'hmiyetlirek boladı.
23 Denenin' itibarsızıraq dep sanalg'an mu'shelerine ko'birek g'amxorlıq ko'rsetemiz. Ko'riksiz mu'shelerimizge ko'birek sa'n beremiz.
24 Al ko'rikli mu'shelerimiz bug'an mu'ta'j emes. Solay etip, Quday a'hmiyetsiz bolg'an mu'shelerimizge a'hmiyet berip, denemizdin' birligin saqladı.
25 Bunı Ol denede bo'liniw bolmasın, al mu'sheler bir-birine g'amxorlıq ko'rsetsin dep isledi.
26 Eger bir mu'she azap shekse, pu'tkil mu'sheler birlikte azap shegedi. Bir mu'she ma'rtebege erisse, pu'tkil mu'sheler birlikte quwanadı.
27 Solay etip, sizler birlikte Masixtın' denesisiz, al ha'r birin'iz o'z aldın'ızg'a usı denenin' mu'shelerisiz.
28 Quday iseniwshiler ja'ma'a'tinde birinshiden elshilerdi, ekinshiden payg'ambarlardı*, u'shinshiden mug'allimlerdi, son'ınan ka'ramat ko'rsetetug'ınlardı, awırıwlarg'a shıpa beretug'ın sıyg'a iye bolg'anlardı, basqalarg'a ja'rdem beriwshilerdi, jaqsı sho'lkemlestiriwshilerdi ha'm basqa tillerde so'yleytug'ınlardı tayınladı.
29 Ha'mmesi elshi me? Ha'mmesi payg'ambar ma? Ha'mmesi mug'allim be? Ha'mmesi ka'ramat ko'rsetiwshi me?
30 Ha'mmesi awırıwlarg'a shıpa beretug'ın sıyg'a iye me? Ha'mmesi basqa tillerde so'yley me? Ha'mmesi basqa tillerdi tu'sindire me? Yaq, olay emes!
31 Biraq, sizler ullıraq sıylardı alıwg'a umtılın'lar. Endi men sizlerge en' jaqsı joldı ko'rsetemen:
