1 Korinfliler 3 bob
1 Tuwısqanlarım! Men sizlerge Muxaddes Ruwxqa boysınatug'ınlarg'a so'ylegendey, so'yley almadım. Men sizlerge gu'nakar ta'biyatqa boysınatug'ınlarg'a, yag'nıy Masix penen bolg'an qatnasta ele go'deklik da'rejesinde bolg'anlarg'a so'ylegendey, so'yledim.
2 Men sizlerge ku'shli awqat emes, al su't berdim. O'ytkeni sizler ele ku'shli awqattı jewge a'zzilik qılatug'ın edin'iz. Ha'tte, ha'zir de onı jewge a'zzilik qılasızlar.
3 Sebebi sizler ele de gu'nakar ta'biyatın'ızg'a boysınasızlar. Aran'ızda qızg'anshaqlıq ha'm tartıslardın' bolg'anı, sizlerdin' gu'nakar ta'biyatın'ızg'a boysınıp, isenbeytug'ın adamlar sıyaqlı jasap atırg'anın'ızdı ko'rsetpey me?
4 Birin'iz: «Men Pavelge tiyislimen», basqa birin'iz: «Men Apolosqa tiyislimen» dese, sizler isenbeytug'ın adamlar sıyaqlı bolıp qalmaysızlar ma?
5 Olay bolsa, Apolos kim? Pavel kim? Apolos ha'm men – sizlerdin' tek isenimge keliwin'iz ushın qoyılg'an Qudaydın' xızmetkerlerimiz g'ana. İyemiz ha'r birimizge xızmet tapsırg'an.
6 Tuqımdı men ektim, Apolos suwg'ardı. Biraq, egindi Quday o'sirdi.
7 Solay etip, ekken adam da, suwg'arg'an adam da a'hmiyetli emes, al egindi o'sirgen Quday a'hmiyetli.
8 Ekken adam menen suwg'arg'an adamnın' maqseti bir. Olardın' ha'r biri o'z miynetinin' haqısın aladı.
9 Bizler Quday menen birge isleymiz. Al sizler – Qudaydın' atızı ha'm imaratısız.
10 Qudaydın' o'zime bergen miyrimi menen, men usta qurıwshı sıyaqlı tiykar saldım. Basqaları usı tiykardın' u'stine imarat salmaqta. Biraq, ha'r bir adam qalay salıp atırg'anına dıqqat awdarsın.
11 O'ytkeni hesh bir adam salıng'an tiykardan basqa, yag'nıy İysa Masixtan basqa bir tiykar sala almaydı.
12 Usı tiykardın' u'stine adamlar altınnan, gu'misten, hasıl taslardan, ag'ashtan, pishennen yamasa sabannan imarat saladı.
13 Degen menen, ha'r bir adamnın' islegen isi aqırzamanda ashılıp, otta belgili boladı. Sebebi ha'r bir adamnın' isinin' qanday ekenligin ot sınap beredi
14 Kimnin' salg'anı otqa shıdasa, ol sıylıq aladı.
15 Al shıdamay janıp ketse, zıyan ko'redi. Onın' o'zi qutıladı, biraq ottın' ishinen qashqanday bolıp qutıladı.
16 O'zlerin'izdin' Qudaydın' ibadatxanası ekenin'izdi ha'm Qudaydın' Ruwxı ishin'izde jasap atırg'anın sizler haqıyqattan da bilmeysizler me?
17 Eger kim de kim Qudaydın' ibadatxanasın buzsa, onı Quday uradı. O'ytkeni Qudaydın' ibadatxanası – muxaddes ha'm sol ibadatxana sizlersiz.
18 Hesh bir adam o'zin o'zi aldamasın. Eger aran'ızdag'ı birin'iz o'zin bul du'nyanın' ko'z qarası boyınsha danaman dep esaplasa, Quday na'zerinde dana bolıw ushın, bul du'nyanın' ko'z qarası boyınsha «aqılsız» bolsın.
19 Sebebi bul du'nyanın' danalıg'ı Quday na'zerinde aqılsızlıq boladı. Muxaddes Jazıwda aytılg'anday: «Ol danalardı olardın' hiyleleri menen qolg'a tu'siredi».
20 Ja'ne de: «Danalardın' oy-pikirlerinin' push ekenligin İyemiz biledi» , – dep jazılg'an.
21 Sonlıqtan hesh bir adam adamlar menen maqtanbasın. O'ytkeni ha'mmesi sizlerge tiyisli:
22 Pavel de, Apolos ta, Kifa da, du'nya da, o'mir ha'm o'lim de, ha'zirgi ha'm keleshek zaman da, ha'mmesi sizlerge tiyisli.
23 Sizler Masixqa tiyislisiz, al Masix Qudayg'a tiyisli.
