Ayan 19 bob
1 Bunnan son', men aspanda ko'p sanlı alamannın' dawısına uqsag'an ba'lent dawıslardı esittim. Olar bılay dedi: «Haliluya! Qutqarıw, ullılıq ha'm qu'diret Qudayımızg'a tiyisli.
2 Sebebi Onın' hu'kimleri tuwrı ha'm a'dil. Ol jer ju'zin buzıqshılıg'ı menen haramlag'an Ullı buzıq hayaldı hu'kim etip, O'z xızmetshilerinin' qanı ushın onnan o'sh aldı».
3 Olar ja'ne dawıslap bılay dedi: «Haliluya! Buzıq hayaldın' jang'an otının' tu'tini Ma'n'gige burqırap turadı».
4 Sonda jigirma to'rt aqsaqal ha'm to'rt maqluq jerge jıg'ılıp: «Awmiyin! Haliluya!» – dedi de, taxt u'stinde otırg'an Qudayg'a tabındı.
5 Son'ınan taxttan shıqqan bir dawıs bılay dedi: «Ha'y, Qudayımızdın' barlıq xızmetshileri! Onnan qorqıwshı u'lken-kishi ha'mmen'iz, Onı alg'ıslan'lar!»
6 Son' men u'lken alamannın' dawısına, sarqırap aqqan suwlardın' shuwıldısına ha'm ku'shli gu'ldirmamanın' gu'rkiregenine uqsag'an dawıstı esittim. Sol dawıs bılay dedi: «Haliluya! O'ytkeni ha'mme na'rsege qu'diretli Quday İyemiz patshalıq etedi.
7 Shadlanıp, kewil ko'tereyik! Onı dan'qqa bo'leyik! Sebebi Qozının' neke toyı baslanajaq, Onın' qalın'lıg'ı o'zin tayarladı.
8 Og'an kiyiw ushın, Taza, jarqırag'an appaq ko'ylek berildi». Taza, appaq ko'ylek – muxaddeslerdin' haq islerin bildiredi.
9 Sonda perishte mag'an: – Bılay dep jaz: «Qozının' neke toyına shaqırılg'anlar qanday baxıtlı!» – dedi. Ol ja'ne: – Bul so'zler – Qudaydın' haqıyqat so'zleri, – dedi.
10 Men og'an tabınıw ushın, ayaqlarına jıg'ıldım. Biraq ol mag'an bılay dedi: – Bunday qıla go'rme! Men de sen ha'm İysanın' gu'walıg'ına iye tuwısqanların' sıyaqlı, Qudaydın' xızmetshisimen. Qudayg'a tabın! O'ytkeni İysanın' gu'walıg'ı – Muxaddes Ruwx ta'repinen ilhamlandırılg'an payg'ambarshılıq so'zlerinin' tiykarı, – dedi.
11 Bunnan son', men aspannın' ashılg'anın ko'rdim. Ol jerde bir aq at turg'an bolıp, atqa Mingennin' atı Sadıq ha'm Haqıyqat edi. Ol a'dillik penen hu'kim shıg'arıp, sawash ju'rgizedi.
12 Onın' ko'zleri lawlap jang'an otqa uqsag'an bolıp, al basında bolsa ko'p sanlı taj bar edi. Onda O'zinen basqa hesh kim bilmeytug'ın bir at jazılg'an edi.
13 Ol qang'a boyalg'an kiyim kiygen bolıp, Onın' atı – Qudaydın' So'zi edi.
14 Taza ha'm appaq kiyim kiygen aspan la'shkerleri aq atlarg'a minip, Onın' izinen kiyatır edi.
15 Onın' awzınan o'tkir qılısh shıg'ıp turg'an bolıp, Ol sol qılısh penen milletlerdi o'ltiredi. Olardı temir tayaq penen basqaradı ha'm ha'mme na'rsege qu'diretli Qudaydın' qa'ha'rli g'a'zebinin' sharabın sıg'ıp shıg'aratug'ın iskenjeni O'zi basadı.
16 Onın' kiyiminde ha'm sanında: «PATSHALAR PATSHASI HA'M HU'KİMDARLAR HU'KİMDARI», degen at jazılg'an edi.
17 Son'ınan men quyashta turg'an bir perishteni ko'rdim.
18 Ol ba'lent dawıs penen baqırıp, aspanda ushıp ju'rgen barlıq quslarg'a bılay dedi: «Patshalardın', a'skerbasılardın' ha'm ku'shli adamlardın', atlardın' ha'm atqa mingenlerdin', azat-qullardın', u'lken-kishi ha'mmenin' o'liginin' etin jew ushın bir jerge jıynalıp, Qudaydın' ullı zıyapatına kelin'ler».
19 Sonda men jırtqısh haywandı, du'nya patshaların ha'm olardın' la'shkerlerin ko'rdim. Olar atta Otırg'an menen ha'm Onın' la'shkerleri menen urısıw ushın bir jerge jıynalg'an edi.
20 Jırtqısh haywan ha'm onın' aldında ka'ramatlar islegen jalg'an payg'ambar qolg'a alındı. Jırtqısh haywannın' tamg'asın qabıl etip, onın' mu'sinine tabıng'anlardı o'z ka'ramatları menen azg'ırg'an – usı jalg'an payg'ambar edi. Olardın' ekewi de ku'kirt jang'an ot ko'line tiriley ılaqtırıldı.
21 Al qalg'anlar atta Otırg'annın' awzınan shıqqan qılısh penen o'ltirildi. Barlıq quslar olardın' o'liginin' etin jep toydı.
