Biyler 12 bob
1 Efrayım urıwı jıynalıp, Safong'a qaray keship o'tti. Olar İftaxqa: – Ammonlar menen urısıwg'a ketkenin'de, bizlerdi ne ushın shaqırmadın'? Sonlıqtan bizler seni de, u'yin'di de jag'ıp jiberemiz, – dedi.
2 İftax olarg'a: – Xalqım ha'm men ammonlar menen qattı ja'njelleskenimizde, men sizlerdi shaqırg'an edim. Biraq sizler kelip, meni olardın' qolınan qutqarmadın'lar.
3 Meni qutqarmaytug'ının'ızg'a ko'zim jetkende, janımdı qa'wip astına qoyıp, ammonlarg'a qarsı hu'jim jasadım. Keyin Jaratqan İye olardı mag'an ta'slim qıldı. Ne ushın bu'gin menin' menen urısıwg'a keldin'ler? – dedi.
4 Efrayım urıwınan bolg'anlar giladlılarg'a: «Ha'y, Efrayım ha'm Menashshe urpaqları arasında jasaytug'ın giladlılar! Sizler Efrayımnın' qashqınlarısız», – degen edi. Sonda İftax pu'tkil Gilad xalqın jıynap, Efrayım urıwına qarsı sawashqa tu'sti ha'm olardı qıyrattı.
5 İordan da'ryasındag'ı Efrayım urıwının' jerine qaray o'tetug'ın o'tkellerdi qolg'a alg'an giladlılar o'tpekshi bolıp kelgen qashqınnan: «Efrayım urıwınanbısan'?» dep sorag'anda, ol: «Yaq» dese,
6 sonda olarg'a: «Shibolet dep ayt», – deytug'ın edi. Biraq olar: «Sibolet» deytug'ın edi. O'ytkeni olar «shibolet» so'zin durıs ayta almaytug'ın edi. Sol sebepli olardı uslap, İordan da'ryasının' o'tkellerinde o'ltiretug'ın edi. Sol waqıtta efrayımlılardan qırıq eki mın' adam o'ltirildi.
7 Giladlı İftax İzrailda altı jıl biylik qıldı. Sonnan keyin ol o'lip, Giladtın' bir qalasında jerlendi.
8 Keyin ala İzrail xalqına beytlehemli İbsan biylik etti. 9 İbsannın' otız ulı ha'm otız qızı boldı. Ol qızların basqa tiyrelerge uzatıp, ulların da basqa urıwlardan u'ylendirdi. İbsan İzrailda jeti jıl biylik etti.
9 İbsannın' otız ulı ha'm otız qızı boldı. Ol qızların basqa tiyrelerge uzatıp, ulların da basqa urıwlardan u'ylendirdi. İbsan İzrailda jeti jıl biylik etti.
10 Son'ınan ol o'lip, Beytlehemde jerlendi.
11 İbsannan keyin, İzrailda Zebulon urıwınan bolg'an Elon on jıl biylik etti.
12 Ol o'lip, Zebulon jerindegi Ayyalonda jerlendi.
13 Elonnan keyin, İzrailda Piratonnan bolg'an Hillel ulı Abdon biylik etti.
14 Abdonnın' jetpis eshekke minip ju'retug'ın qırıq ulı ha'm otız aqlıg'ı boldı. Abdon İzrailda segiz jıl biylik etti.
15 Piratonlı Hilleldin' ulı Abdon o'lip, Efrayım jerindegi, burın amaleklerge tiyisli bolg'an tawlı u'lkedegi Piratong'a jerlendi.
