Biyler 14 bob
1 Bir ku'ni Samson Timnag'a bardı. Ol jerde Samson filistli bir qızdı ko'rip qaldı.
2 Ol qaytıp kelip, ata-anasına: – Timnada filistli bir qızdı ko'rdim, onı mag'an hayallıqqa alıp berin', – dedi.
3 Ata-anası og'an: – Ag'ayin-tuwg'anlardın' yamasa xalqımızdın' arasında sag'an qız qurıp qalıp pa? Ne ushın su'nnetsiz filistlerden qız almaqshısan'? – dedi. Biraq Samson a'kesine: – Mag'an sol qızdı alıp ber, o'ytkeni ol mag'an unap qaldı, – dedi.
4 Samsonnın' ata-anası bunın' Jaratqan İyenin' erki ekenin bilmeytug'ın edi. Sebebi Jaratqan İye sol waqıtta izraillılarg'a hu'kimdarlıq etip atırg'an filistlerge qarsı qolaylı pursat izlep atırg'an edi.
5 Solay etip, Samson ata-anası menen birge Timnag'a ketti. Olar Timnadag'ı ju'zim bag'larına jaqınlasqanda, bir jas arıslan aqırıp, Samsonnın' qarsı aldınan shıqtı.
6 Sonda Samson u'stine tu'sken Jaratqan İyenin' Ruwxı menen ku'shke toldı ha'm ol qolında hesh na'rse bolmasa da, arıslandı ılaqtı bo'lgendey etip, bo'lip tasladı. Biraq ol bul isin ata-anasına bildirmedi.
7 Son'ınan Samson barıp, qız benen so'ylesti ha'm qız og'an unadı.
8 Bir neshe ku'nnen keyin, Samson qızg'a u'yleniw ushın ja'ne Timnag'a ketip baratırg'anda, ol arıslannın' o'ligin ko'riw ushın burıldı. Qarasa, arıslannın' o'liginde pal ha'rrelerinin' uyası ha'm pal bar eken.
9 Samson paldan bir qosuwıs alıp, jol-jo'nekey jep ketti. Ol ata-anasına kelip, olarg'a da paldan berdi, olar da jedi. Biraq paldı arıslannın' o'liginen alg'anın aytpadı.
10 Samsonnın' a'kesi qızdın' u'yine bardı ha'm Samson da ol jerde zıyapat berdi. Sebebi da'stu'r boyınsha ku'yew bala usılay isleytug'ın edi.
11 Filistler Samsong'a otız jas jigitti ku'yew jora qılıp jiberdi.
12 Sonda Samson olarg'a bılay dedi: – Men sizlerge bir jumbaq aytayın. Jumbag'ımdı zıyapattın' jeti ku'ni ishinde durıs tapsan'ız, onda sizlerge zıg'ırdan toqılg'an otız ko'ylek ha'm bahalı otız shapan beremen.
13 Biraq eger jumbaqtı taba almasan'lar, onda sizler mag'an zıg'ırdan tigilgen otız kiyim ha'm bahalı otız shapan beresizler. Olar Samsong'a: – Jumbag'ın'dı ayt, esiteyik, – dedi.
14 Samson olarg'a bılay dedi: «Jeytug'ınnan jelinetug'ın shıqtı, Ku'shliden mazalı shıqtı». Aradan u'sh ku'n o'tse de, filistler jumbaqtı taba almadı.
15 To'rtinshi ku'ni olar Samsonnın' hayalına: – Ku'yewin'di ko'ndirip, bizlerge jumbaqtın' sheshimin bilip ber. Bolmasa, bizler seni de, a'ken'nin' u'yin de jag'ıp jiberemiz. Bizlerdi ne bul jerge tonaw ushın shaqırdın'lar ma? – dedi.
16 Hayalı Samsong'a jılap: – Sen meni jek ko'resen', sen meni jaqsı ko'rmeysen'. O'ytkeni menin' xalqımnın' jigitlerine jumbaq ayttın', biraq onın' juwabın mag'an aytpadın', – dedi. Samson hayalına: – O'z ata-anama aytpag'anımdı ne ushın sag'an aytıwım kerek? – dedi.
17 Hayal jeti ku'n dawam etip atırg'an zıyapattın' qalg'an ku'ninde jılap qoymadı. Hayalı janına tiyip qoymag'anlıqtan, Samson og'an jetinshi ku'ni jumbaqtın' juwabın ayttı. Al hayal bolsa, juwaptı o'z xalqının' jigitlerine jetkizdi.
18 Jetinshi ku'ni ku'n batpastan burın, qalanın' jigitleri Samsong'a kelip, bılay dedi: «Paldan tatlı, Arıslannan ku'shli ne bar?» Samson olarg'a: – Eger menin' qasharım menen jer su'rmegenin'izde, jumbag'ımdı sheshe almas edin'ler, – dedi.
19 Sonda Samson u'stine tu'sken Jaratqan İyenin' Ruwxı menen ku'shke toldı. Samson Ashkelong'a ketti ha'm ol jerde otız adamdı o'ltirip, olardın' kiyim-kensheklerin sheship aldı da, olardı jumbaqtı sheshken adamlarg'a a'kelip berdi. Keyin ol sol g'a'zepleniwi menen a'kesinin' u'yine qaytıp ketti.
20 Al Samsonnın' hayalı bolsa, Samsonnın' ku'yew joralarının' birine uzatılıp jiberildi.
