Biyler 9 bob
1 Erubbaaldın' ulı Abimelex dayılarının' janına, Shexem qalasına barıp, olarg'a ha'm anasının' tiyresinen bolg'an barlıq adamlarg'a bılay dedi:
2 – Shexem xalqınan: «Sizler ushın qaysısı jaqsıraq? Gideonnın' jetpis ulı sizlerge biylik etkeni me yamasa bir adamnın' biylik etkeni me?» – dep soran'lar. Menin' o'zlerin'iz benen su'yegi bir, qanlas ekenimdi umıtpan'lar.
3 Dayıları Abimelextin' aytqanların Shexem xalqına jetkerdi. Sonnan keyin, Abimelexke xalıqtın' kewli iyip: «Ol bizlerdin' tuwısqanımız boladı», – dedi.
4 Olar Abimelexke Baal-Berit butxanasınan jetpis shekel gu'mis berdi. Al Abimelex bul aqshag'a on'bag'an ha'm jaramas adamlardı izine ertti.
5 Son'ınan ol Ofrag'a, a'kesinin' u'yine ketip, tuwısqanların, yag'nıy Erubbaaldın' jetpis ulın bir tas u'stinde o'ltirdi. Tek g'ana Erubbaaldın' genje ulı İotam qashıp jasırıng'anı ushın aman qaldı.
6 Keyin pu'tkil Shexem ha'm Beyt-Millo xalıqları birge jıynalıp, Shexemdegi estelik tastın' janındag'ı terebinf ag'ashının' qasına bardı ha'm Abimelexti patsha etip tayınladı.
7 Bul xabar İotamg'a jetip barg'anda, ol Gerizzim tawının' to'besine shıg'ıp, ba'lent dawıs penen xalıqqa bılay dedi: «Ha'y, Shexem xalqı! Meni tın'lan'lar, sonda Quday da sizlerdi tın'laydı.
8 Bir ku'ni terekler o'zlerine patsha tan'lap, onı maylamaqshı bolıptı. Sonda olar za'ytu'n ag'ashına barıp: „Bizlerdin' patshamız bol“, – depti.
9 Za'ytu'n ag'ashı olarg'a: „Qudaylar ha'm adamlardı hu'rmetke eristiriw ushın qollanılatug'ın mayımdı taslap, tereklerdin' u'stinde shaqalarımdı terbeltip turayın ba?“ – dep juwap beripti.
10 Sonda terekler a'njir ag'ashına: „Kel, sen bizlerdin' patshamız bol“, – depti.
11 A'njir ag'ashı olarg'a: „Jaqsı ha'm mazalı miywemdi taslap, terekler u'stinen basshılıq eteyin be?“ – dep juwap beripti.
12 Son'ınan terekler ju'zim ag'ashına: „Kel, sen-aq bizlerdin' patshamız bol“, – depti.
13 Ju'zim ag'ashı olarg'a: „Qudaylardın' ha'm adamlardın' kewlin ko'teretug'ın sharabımdı taslap, terekler u'stinen basshılıq eteyin be?“ – depti.
14 Aqırı terekler shen'gelge kelip: „Kel, bizlerdin' patshamız bol“, – depti.
15 Shen'gel olarg'a: „Eger shınında da meni maylap, o'zlerin'izge patsha etip qoymaqshı bolsan'ız, onda kelin'ler, ko'len'kemde panalan'lar. Eger panalamasan'ız, tikenlerimnen shıqqan ot Lebanonnın' kedr ag'ashların jandırıp jiberedi“, – depti.
16 Minekey, sizler Abimelexti patsha etip saylap a'dil ha'm durıs isledik dep sanaysızlar ma? Erubbaal ha'm onın' shan'arag'ına jaqsılıq etkenin'iz usı ma? Bul mu'na'sibetin'iz a'keme ılayıq pa?
17 Al a'kem sizlerdi midyanlılardın' qolınan qutqarıw ushın o'z janın qa'wip astına qoyıp, sizler ushın urıstı.
18 Biraq bu'gin sizler a'kemnin' shan'arag'ına qarsı qol ko'terdin'ler, onın' jetpis ulın bir tastın' u'stinde o'ltirdin'ler. Onın' toqalınan tuwılg'an Abimelexti bolsa, o'z tuwısqanın'ız bolg'anı ushın Shexemge patsha qılıp qoydın'lar.
19 Eger bu'gin Erubbaal ha'm onın' shan'arag'ına a'dil ha'm durıs is islegen bolsan'ız, onda Abimelex ushın quwanın', ol da sizler ushın quwansın!
20 Biraq olay bolmasa, Abimelexten ot shıg'ıp, Shexem ha'm Beyt-Millo xalqın jandırıp jibersin. Ya bolmasa, Shexem ha'm Beyt-Millo xalqınan ot shıg'ıp, Abimelexti jandırıp jibersin».
21 Son'ınan İotam tuwısqanı Abimelexten uzaqqa, Beerge qaray qashıp ketip, sol jerde jasadı.
22 Abimelex İzraildı u'sh jıl basqardı.
23 Keyin Quday Abimelex penen Shexem xalqının' arasına jaman ruwx jiberip, bir-birine qarsı qıldı ha'm xalıq Abimelexke boysınbay qoydı.
24 Sebebi Quday bunı o'z tuwısqanları bolg'an Erubbaaldın' jetpis ulın o'ltirgen Abimelexten ha'm onın' bul isin qollap-quwatlag'an Shexem xalqınan, olar to'kken qannın' qunın alıw ushın isledi.
25 Shexem xalqı Abimelexke qarsı taw baslarında buqqı jasadı ha'm ol jerden o'tkenlerdin' ha'mmesin tonadı. Bul haqqında Abimelexke xabar jetti.
26 Ebed ulı Gaal tuwısqanları menen birge kelip, Shexemge jaylastı. Ol Shexem xalqının' isenimine kirdi.
27 Olar bag'larg'a barıp, ju'zim jıynadı ha'm onı sıg'ıp, sharap islegennen keyin, bayramladı. Olar o'z qudayının' butxanasında iship-jep otırıp, Abimelexke mazaq so'zler ayttı.
28 Sonda Ebed ulı Gaal bılay dedi: «Bizler, yag'nıy Shexem xalqı Abimelexke xızmet etetug'ınday, ol kim bolıptı? Ol Erubbaaldın' ulı emes pe? Zebul da onın' on' qolı emes pe? Sizler shexemlilerdin' atası Xamordın' urpag'ınan bolg'anlarg'a xızmet qılın'lar. Abimelexke ne dep xızmet etemiz?
29 Qa'nekey, bul xalıqtı men basqarsam edi! Sonda Abimelexti o'zim quwıp jiberer edim ha'm og'an: „A'skerlerin'di ko'beytip, sawash maydanına shıq!“ – der edim».
30 Qalanın' basshısı bolg'an Zebul Ebed ulı Gaaldın' so'zlerin esitkende, g'a'zebi qaynadı.
31 Ol Abimelexke jasırın tu'rde xabarshılar jollap, olar arqalı mınalardı aytıp jiberdi: «Mine, Ebed ulı Gaal ha'm onın' tuwısqanları Shexemge keldi. Olar qalanı sag'an qarsı qoymaqta.
32 Endi sen tu'nde adamların' menen birge kelip, atızda buqqı taslap jat.
33 Azanda tan' atıwdan-aq ornın'nan turıp, qalag'a hu'jim jasa. Gaal ha'm onın' adamları sag'an qarsı shıqqanda, olarg'a qolın'nan kelgenin isle».
34 Solay etip, Abimelex ha'm onın' adamları tu'nde turıp, to'rt toparg'a bo'lindi de, Shexemge jaqın jerde buqqı taslap jattı.
35 Ebed ulı Gaal sırtqa shıg'ıp, qala da'rwazasının' awzında turg'anda, Abimelex ha'm onın' qasındag'ılar buqqıda jatırg'an jerinen shıqtı.
36 Kiyatırg'anlardı ko'rgen Gaal Zebulg'a: – Tawlardın' to'besinen tu'sip kiyatırg'anlarg'a qara! – dedi. Zebul og'an: – Adamlarg'a uqsatıp turg'anın' negizinde tawlardın' ko'len'kesi-g'o, – dedi.
37 Biraq Gaal so'zin dawam etip: – Qara, u'lkemizdin' ortasındag'ı to'beshikten adamlar tu'sip kiyatır. Palkerler terebinfi ta'repten de bir topar kiyatır, – dedi.
38 Sonda Zebul Gaalg'a: – Endi senin': «Bizler Abimelexke xızmet etetug'ınday, ol kim bolıptı?» – degen so'zin' qayaqta? Sen mensinbegen xalıq usı emes pe? Qa'ne, endi shıg'ıp, olar menen o'zin' urıs, – dedi.
39 Gaal Shexem xalqın baslap, Abimelex penen urısıwg'a shıqtı.
40 Biraq ol jen'ilip qasha basladı ha'm Abimelex onın' izinen quwdı. Qalanın' kirer awzına deyingi aralıqta ko'p sanlı o'liler jayrap jattı.
41 Abimelex Arumada qaldı. Al Zebul Gaalg'a ha'm onın' tuwısqanlarına Shexemde jasawg'a ruxsat bermey, olardı qaladan quwıp jiberdi.
42 Erten'ine Abimelex shexemlilerdin' atızlarg'a shıqqanınan xabar taptı.
43 Ol adamların u'sh toparg'a bo'lip, atızlarda buqqı taslap jattı. Xalıqtın' qaladan shıqqanın ko'rgende hu'jim qılıp, olardı o'ltirdi.
44 Abimelex janındag'ı toparı menen jıldam tu'rde qalanın' kirer awzına barıp turg'anda, basqa eki toparı atızda bolg'anlarg'a hu'jim jasap, olardı o'ltirdi.
45 Abimelex ku'n boyı qalag'a qarsı urısıp, qalanı qolg'a kirgizdi ha'm xalqın qılıshtan o'tkizdi. Qalanı wayran etip, u'stine duz septi.
46 Shexem minarasındag'ı adamlar bolg'an waqıyalar haqqında esitkende, El-Berit butxanasının' qorg'anın panaladı.
47 Abimelex Shexem minarasında bolg'anlardın' sol jerge jıynalg'anınan xabar taptı.
48 Sonda ol qasındag'ı adamları menen birge Salmon tawına shıqtı. Qolına bir balta alıp, terektin' shaqasın shaptı da, onı iynine qoyıp, qasındag'ı xalıqqa: «Menin' ne islegenimdi ko'rdin'ler, da'rriw sizler de solay islen'ler», – dedi.
49 Solay etip, ha'mmesi bir shaqadan kesip alıp, Abimelextin' izine erdi. Olar shaqalardı qorg'annın' tu'bine u'yip, ot berdi. Solay etip, Shexem minarasında bolg'an mın'g'a jaqın erkek ha'm hayallar o'ldi.
50 Sonnan keyin, Abimelex Tebeske bardı da, qalanı qamal qılıp, onı qolg'a kirgizdi.
51 Qalanın' ortasında bekkem bir minara bar edi. Erkek ha'm hayallar, pu'tkil qala xalqı sol jerdi panaladı. Olar qapılardı ilip, minaranın' to'besine shıqtı.
52 Abimelex minarag'a kelip, og'an hu'jim qıldı. Biraq ol minarag'a ot beriw ushın qapısına jaqınlasqanda,
53 bir hayal digirmannın' u'stingi tasın Abimelextin' u'stine ılaqtırıp jiberip, basın jardı.
54 Abimelex da'rhal qural-jarag'ın alıp ju'retug'ın no'kerin shaqırıp aldı da, og'an: – Qılıshın'dı shıg'ar da, meni o'ltir. Hesh kim: «Abimelexti bir hayal o'ltirdi» dep aytıp ju'rmesin, – dedi. No'ker qılıshın Abimelexke sug'ıp, onı o'ltirdi.
55 Abimelextin' o'lgenin ko'rgende, izraillılar u'ylerine qayttı.
56 Solay etip, jetpis tuwısqanın o'ltirip, a'kesine qarsı jawızlıq qılg'anı ushın, Quday Abimelexti usılay jazaladı.
57 Quday Shexem xalqın da islegen barlıq jawızlıqları ushın jazaladı. Olar Erubbaaldın' ulı İotamnın' g'arg'ısına ushıradı.
