1 Patshalar 16 bob
1 Jaratqan İye Samuelge: – Shauldın' İzrailg'a patsha bolıwınan Meni bas tarttı dep, qashang'a shekem ol ushın qayg'ırıp ju'resen'? May quyatug'ın shaqın'dı za'ytu'n mayına toltırıp jolg'a shıq. Seni beytlehemli İshaydın' u'yine jiberemen. Sebebi Men onın' ullarının' birin patsha etiw ushın tan'lap aldım, – dedi.
2 Samuel: – Qalay baraman? Shaul bunı esitse, meni o'ltiredi-g'o, – dedi. Sonda Jaratqan İye bılay dedi: – O'zin' menen birge bir qashardı al da: «Jaratqan İyege qurbanlıq beriw ushın keldim», – dep ayt.
3 İshaydı qurbanlıq asına mira't et. Sonda Men sag'an ne islewin' kerekligin bildiremen. Sag'an ko'rsetken adamımdı maylap, Menin' ushın patsha etip qoyasan'.
4 Samuel Jaratqan İyenin' aytqanın orınlap, Beytlehem qalasına bardı. Qala aqsaqalları onı qorqınısh penen ku'tip alıp: – Tınıshlıq pa? – dep soradı.
5 Samuel olarg'a: – Awa, tınıshlıq. Jaratqan İyege qurbanlıq beriw ushın keldim. O'zlerin'izdi pa'klep, menin' menen birge qurbanlıq asına ju'rin'ler, – dedi. Son'ınan ol İshaydı ha'm onın' ulların pa'klew ra'siminen o'tkerip, qurbanlıq asına mira't etti.
6 İshay ha'm onın' ulları kelgende, Samuel Eliabtı ko'rip: «Haqıyqattan da, Jaratqan İyenin' aldında turg'an mına adam – Onın' maylag'anı», – dep oyladı.
7 Biraq Jaratqan İye Samuelge: «Onın' shırayına, boyının' uzınlıg'ına qarama. Sebebi Men onı maqul ko'rmedim. Men adamlar sıyaqlı qaramayman. Adam sırtqı ko'rinisine qaraydı, al Men ju'rekke qarayman», – dedi.
8 İshay ulı Abinadabtı shaqırıp, Samueldin' aldınan o'tkerdi. Biraq Samuel: «Jaratqan İye bunı da tan'lamadı», – dedi.
9 Keyin İshay u'shinshi ulın, Shammanı alıp keldi. Biraq Samuel: «Jaratqan İye bunı da tan'lamadı», – dedi.
10 Solay etip, İshay o'zinin' jeti ulın da Samueldin' aldınan o'tkerdi. Biraq Samuel: «Jaratqan İye bulardın' hesh birin de tan'lap almadı», – dedi.
11 Son'ınan Samuel İshaydan: – Bular ulların'nın' ha'mmesi me? – dep soradı. İshay og'an: – En' kishkenesi bar. Ol qoy bag'ıp ju'r, – dep juwap berdi. Samuel İshayg'a: – Birewdi jiberip, onı shaqırt. Ol kelmegenshe, awqatqa otırmaymız, – dedi.
12 İshay birewdi jiberip, ulın aldırttı. Ol qızıl ju'zli, sımbatlı bolıp, ko'zleri janıp turg'an edi. Jaratqan İye Samuelge: «Ornın'nan turıp, onı mayla. Tan'lag'an adamım usı boladı», – dedi.
13 Samuel za'ytu'n mayı quyılg'an shaqtı alıp, ag'alarının' ko'z aldında jigittin' basına may quydı. Usı ku'nnen baslap, Jaratqan İyenin' Ruwxı Dawıttı biylep aldı. Son'ınan Samuel Ramag'a qaytıp ketti.
14 Sol arada Jaratqan İyenin' Ruwxı Shauldı ta'rk etti. Jaratqan İye jibergen jaman bir ruwx onı qıynaytug'ın edi.
15 Xızmetshileri Shaulg'a: – Qaran', Quday jibergen jaman ruwx sizdi qıynap atır.
16 Taqsır, xızmetshilerin'iz bolg'an bizlerge buyrıq berin'. Bizler liranı jaqsı shertetug'ın birewdi tawıp keleyik. Sonda Quday jibergen jaman ruwx sizge kelgende, ol adam lira shertedi ha'm siz jen'il tartasız, – dedi.
17 Shaul xızmetshilerine: – Yaqshı, liranı jaqsı shertetug'ın birewdi tawıp, mag'an alıp kelin'ler, – dep buyırdı.
18 Sonda xızmetshilerden biri: – Beytlehemli İshaydın' ullarının' birin ko'rgen edim. Ol liranı jaqsı shertedi eken. Bunın' u'stine, ol aqsu'yeklerden bolıp, ma'rt jawınger eken. Onın' so'zleri ma'nili, qa'ddi-qa'wmeti de kelisken. Jaratqan İye de onın' menen birge, – dedi.
19 Shaul İshayg'a: «Qoy bag'ıp ju'rgen ulın' Dawıttı mag'an jiber», – dep xabarshılar jo'netti.
20 İshay bir eshekke nan, bir mes sharap ha'm bir ılaqtı artıp, Dawıt penen qosa Shaulg'a jiberdi.
21 Dawıt Shaulg'a barıp, onın' xızmetine kirdi. Shaul Dawıttı ju'da' jaqsı ko'rdi ha'm onı o'zine no'ker etip aldı.
22 Shaul İshayg'a: «Dawıttın' xızmetimde qalıwına ruxsat ber. Og'an kewlim toldı», – degen xabar jiberdi.
23 Sol ku'nnen baslap, Quday jibergen jaman ruwx Shaulg'a kelgende, Dawıt lira shertetug'ın edi. Sonda Shaul o'zine kelip jaqsı bolatug'ın, jaman ruwx ta onı ta'rk etetug'ın edi.
