Jaratılıs 44 bob
1 Yusup o'zinin' u'y basqarıwshısına bılay dep buyırdı: – Bul adamlardın' qapların o'zleri ko'tere alg'ansha azıq-awqatqa toltır ha'm ha'r birinin' gu'misin qabının' awzına sal.
2 En' genjesinin' qabının' awzına g'a'lle ushın to'lengen gu'misine qosa, menin' gu'mis kesemdi de salıp qoy. U'y basqarıwshısı Yusuptin' aytqanınday etip isledi.
3 Erten'ine tan' atıwdan, sol adamlar eshekleri menen birge jolg'a atlandırıldı.
4 Olar qaladan uzaqlap ketpey turıp, Yusup o'zinin' u'y basqarıwshısına bılay dep buyırdı: – Bar, sol adamlardın' izinen quw. Jetip alg'anın'nan keyin, olarg'a bılay dep ayt: «Ne ushın sizler jaqsılıqqa jamanlıq qaytardın'ız?
5 Ne ushın xojayınımnın' gu'mis kesesin urlap kettin'iz? Xojayınım onnan iship, onı pal ashıw ushın qollanadı-g'o. Sizler jaman is isledin'ler».
6 U'y basqarıwshısı ag'alı-inililerdin' izinen quwıp jetip, olarg'a usı ga'plerdi ayttı.
7 Ag'alı-inililer og'an: – Mırzamız, ne ushın bunday so'zlerdi aytıp tursız? Sizin' qulların'ız bolg'an bizler bunday islerdi islewden awlaqpız.
8 Ha'tte, bizler qaplarımızdın' awzınan tapqan gu'misti Qanan jerinen sizge qaytarıp a'kelip bergen edik-g'o. Qalay bizler xojayının'ızdın' u'yinen gu'mis yamasa altın urlaymız?
9 Gu'mis kese qulların'ızdın' qaysı birinen tabılsa, sol o'ltirilsin, al qalg'anlarımız xojayınımızg'a qul bolayıq, – dedi.
10 U'y basqarıwshısı: – Meyli, sizler aytqanday bolsın. Kese kimnen tabılsa, sol menin' qulım boladı. Al qalg'anların'ız ayıpsız bolasız, – dedi.
11 Olar da'rhal qapların jerge tu'sirip, awızların ashtı.
12 U'y basqarıwshı u'lkeninen baslap, kishisine deyin, ha'mmesinin' qapların tekserip shıqtı. Kese Benyaminnin' qabınan tabıldı.
13 Tuwısqanlar qayg'ıdan kiyimlerin jırttı ha'm ju'klerin esheklerine artıp, qalag'a qaytıp bardı.
14 Yahuda ha'm tuwısqanları Yusuptin' u'yine kelgende, ol ele u'yde edi. Olar Yusuptin' aldında jerge jıg'ıldı
15 Yusup olarg'a: – Nege bunday isledin'iz? Mendey adamnın' pal ashıp, bilip alatug'ının bilmedin'iz be? – dedi.
16 Sonda Yahuda: – Mırzamızg'a bizler ne ayta alamız? Ne dep tu'sindire alamız? O'zlerimizdi qalay aqlay alamız? Quday qulların'ızdın' ayıbın a'shkara etti. Bizler de, kese tabılg'an adam da sizge qul bolamız, – dedi.
17 Yusup: – Yaq, men bunday islewden awlaqpan. Kese kimnen tabılg'an bolsa, tek sol mag'an qul boladı. Al sizler aman-esen a'ken'izdin' aldına qayta berin', – dedi.
18 Sonda Yahuda Yusupke jaqınıraq kelip bılay dedi: – Mırzam, mag'an bir so'z aytıwg'a ruxsat etin'. Siz faraon menen birdey biylikke iyesiz, qulın'ızg'a ashıwlanban.
19 Mırzam, siz qulların'ız bolg'an bizlerden: «A'ken'iz yamasa basqa tuwısqanın'ız bar ma?» – dep sorag'anın'ızda,
20 bizler sizge: «G'arrı a'kemiz ha'm onın' qartayg'anda ko'rgen genje ulı bar. Onın' tuwısqanı o'lip, anasınan jalg'ız qalg'an edi ha'm a'kemiz onı jaqsı ko'redi», – degen edik.
21 Sonda siz qulların'ız bolg'an bizlerge: «Onı mag'an alıp kelin', bir ko'reyin», – degen edin'iz.
22 Biraq bizler sizge: «Bala a'kesin taslap kete almaydı. Eger a'kesi onnan ayırılsa, o'lip qaladı», – degen edik.
23 Siz qulların'ız bolg'an bizlerge: «Eger genje inin'iz sizler menen birge kelmese, ko'zime ko'rinben'», – degen edin'iz.
24 Bizler sizin' qulın'ız bolg'an a'kemizge qaytıp barg'anımızda, sizin' so'zlerin'izdi og'an aytıp berdik.
25 A'kemiz: «Ja'ne barıp, bizlerge azmaz azıq-awqat satıp alın'lar», – degende,
26 bizler og'an: «Bara almaymız, eger genje inimiz bizler menen birge barsa g'ana, baramız. Genje inimiz bizler menen birge bolmasa, ol adamnın' ju'zin ko're almaymız», – dedik.
27 Sonda qulın'ız bolg'an a'kemiz bizlerge: «Hayalım Rahilanın' mag'an eki ul tuwıp bergenin bilesiz.
28 Birewinen ayırıldım. Onı bir haywan tilkimtilkim etip taslag'an, sonnan beri onı qaytıp ko'rmedim.
29 Eger sizler bunı da alıp ketsen'iz ha'm ol bir ba'lege jolıqsa, onda sizler menin' g'arrı basımdı sol qayg'ı menen o'liler ma'kanına jiberesizler», – dedi.
30 Endi men sizin' qulın'ız bolg'an a'kemizge qaytıp barg'anımda, onın' janınan artıq ko'retug'ın ulı qasımızda bolmasa,
31 ol ulının' joq ekenin ko'rip, o'lip qaladı. Sonda sizin' qulın'ız bolg'an bizler qulın'ız bolg'an a'kemizdin' g'arrı basın sol qayg'ı menen o'liler ma'kanına jiberemiz.
32 Sizin' qulın'ız bolg'an men bul bala ushın basım menen juwap beremen dep, a'keme: «Eger onı sag'an qaytarıp alıp kelmesem, onda men bir o'mir senin' aldın'da ayıpker bolayın», – dedim.
33 Sonlıqtan endi balanın' ornına sizge men qul bolıp qalayın. Al bala tuwısqanları menen birlikte qayta bersin.
34 Sebebi bala janımda bolmasa, a'keme qalay qaytıp baraman? Men a'kemnin' basına tu'setug'ın baxıtsızlıqqa shıday almayman.
