Jaratılıs 48 bob
1 Bunnan bir qansha waqıt o'tkennen son', Yusupke: «A'ken' awırıp atır», – degen xabar jetkende, ol ulları Menashshe menen Efrayımdı ertip, a'kesine ketti.
2 Yaqıpqa: «Ulın'ız Yusup keldi», – dep xabarlag'anda, İzrail ku'shin jıynap, to'seginde turıp otırdı.
3 Yaqıp Yusupke: – Qu'direti ku'shli Quday Qanan jerindegi Luzda mag'an ko'rindi ha'm meni jarılqap,
4 mag'an: «Men seni o'sip-o'ndirip, ko'beytemen. Urpag'ın'nan ko'plegen xalıqlar jarataman. Bul jerdi sennen keyingi urpaqların'a ma'n'gige menshik etip beremen», – degen edi.
5 Men Mısırg'a kelmesimnen aldın, senin' bul jerde tuwılg'an eki ulın' Efrayım menen Menashshe endi meniki bolıp esaplanadı. Olar men ushın Ruben ha'm Shimon menen ten'dey+.
6 Olardan keyin tuwılatug'ın balaların' o'zin'diki boladı. Olarg'a Efrayım ha'm Menashshe arqalı miyras o'tedi.
7 Men Paddannan qaytıp kiyatırg'anımda, Qanan elinde, Efratag'a jetiwge az qalg'anda, Rahila qaytıs bolıp, men onnan ayırılıp qaldım. Onı Efratag'a, yag'nıy Beytlehemge baratug'ın jol boyına jerledim, – dedi.
8 İzrail Yusuptin' ulların ko'rip: – Bular kimler? – dep soradı.
9 Yusup a'kesine: – Bular – Qudaydın' mag'an Mısırda bergen ulları, – dedi. Sonda İzrail og'an: – Olardı mag'an jaqınlat, olarg'a pa'tiyamdı bereyin, – dedi.
10 Qartayg'anlıqtan, İzraildın' ko'zleri a'zzilep, jaqsı ko'rmeytug'ın edi. Yusup ulların a'kesine jaqınlatqanda, a'kesi olardı su'yip, qushaqladı.
11 Son'ınan İzrail Yusupke: – Men senin' diydarın'dı ko'riwden u'mitimdi u'zgen edim, biraq, minekey, Quday mag'an senin' perzentlerin'di de ko'rsetti, – dedi.
12 Yusup a'kesinin' dizesinde otırg'an ulların shetke aldı da, man'layı jerge tiygenshe iyilip, a'kesine ta'jim etti.
13 Son'ınan Yusup Efrayımdı on' jag'ına alıp, İzraildın' shep qolına tuwrılap, al Menashsheni shep jag'ına alıp, İzraildın' on' qolına tuwrılap turg'ızdı.
14 Biraq İzrail qolların ayqastırıp, tun'g'ısh ul Menashshe bolıwına qaramastan, on' qolın kishi ul Efrayımnın' basına, al shep qolın tun'g'ısh ul Menashshenin' basına qoydı.
15 Keyin Yusupke pa'tiyasın berip bılay dedi: – Atalarım İbrayım menen Isaqtın' xızmet etken Qudayı, usı ku'nge deyin, o'mirim boyı menin' shopanım bolg'an Quday,
16 meni barlıq jamanlıqlardan saqlap kelgen perishte bul o'spirimlerdi jarılqasın! Menin' atım ha'm atalarım İbrayım menen Isaqtın' atları olar arqalı dawam etsin. Olar jer betinde esap-sansız bolıp ko'beysin.
17 A'kesinin' on' qolın Efrayımnın' basına qoyg'anı Yusupke unamadı. Sonlıqtan ol a'kesinin' qolın Efrayımnın' basınan alıp, Menashshenin' basına qoymaqshı boldı.
18 Yusup a'kesine: – A'ke, olay emes, tun'g'ısh ul Menashshe boladı, on' qolın'dı onın' basına qoy, – dedi.
19 Biraq a'kesi kelisim bermey: – Bilemen, ulım, bilemen. Menashsheden da ullı bir xalıq shıg'adı. Biraq onın' inisi onnan da ullıraq bolıp, urpaqlarınan ko'p xalıqlar kelip shıg'adı, – dedi.
20 Sol ku'ni İzrail olarg'a pa'tiyasın berip, bılay dedi: – İzraillılar pa'tiya bergende: «Quday seni Efrayım ha'm Menashshedey qılsın!» – dep sizlerdin' atın'ız benen pa'tiya beretug'ın boladı. Usılayınsha Yaqıp Efrayımdı Menashsheden joqarı qoydı.
21 Son' İzrail Yusupke: – Menin' o'limim jaqınlastı. Quday sizler menen birge bolıp, sizlerdi ata-babaların'ızdın' jerine qaytaradı.
22 Sag'an tuwısqanların'nan bir pay artıq etip, taw etegindegi jerdi de beremen. Onı men qılısh ha'm sadag'ım menen amor xalqınan tartıp alg'an edim, – dedi.
