4 Patshalar 10 bob
1 Samariyada Axabtın' jetpis ulı bar edi. Sol sebepli Ehu xat jazıp, onı Samariyadag'ı İzreel basshılarına, aqsaqallarg'a ha'm Axabtın' ullarının' ta'rbiyashılarına jiberdi. Onda bılay dep jazılg'an edi:
2 «Mırzan'ızdın' ulları sizler menen birge. Sizlerde sawash arbaları, atlar, qural-jaraqlar bar ha'm sizler qorg'anlı qalada jasaysız. Sonlıqtan bul xat sizlerge jetip barıwdan,
3 o'z hu'kimdarın'ızdın' ullarınan en' jaqsısın ha'm en' ılayıqlısın saylap, onı a'kesinin' taxtına otırg'ızın' ha'm hu'kimdarın'ızdın' u'y-ishi ushın gu'resin'».
4 Biraq olar qattı qorqıp ketip: «Ehug'a eki patsha bas kele almag'anda, bizler qalay bas kele alamız?» – desti.
5 Keyin saray basqarıwshısı, qala ha'kimi, aqsaqallar ha'm Axabtın' ulların ta'rbiyalawshılar Ehug'a mına xabardı jiberdi: «Bizler sizin' qulların'bız, ne buyırsan'ız, sonı isleymiz. Bizler hesh kimdi patsha etip qoymaymız, o'zin'izge ne maqul bolsa, sonı islen'».
6 Ehu olarg'a ekinshi ret mına mazmunda xat jazdı: «Eger sizler men ta'repte bolsan'ız ha'm menin' so'zime boysınsan'ız, onda o'z hu'kimdarın'ızdın' ullarının' basın alıp, erten' usı waqıtta İzreelge, menin' aldıma kelin'ler». Patshanın' jetpis ulı bolıp, olardı qalanın' hu'rmetli adamları ta'rbiyalap atırg'an edi.
7 Xat olarg'a jetip kelgende, olar patshanın' jetpis ulın o'ltirip, basların sebetke saldı ha'm İzreelge, Ehug'a jiberdi.
8 Xabarshı kelip, Ehug'a: «Patshanın' ullarının' basların alıp keldi», – dep bildirgende, Ehu og'an: «Olardı eki u'yinshik etip, qala da'rwazasının' kirer awzına qoyın', azang'a deyin sol jerde tursın», – dedi.
9 Erten'ine azanda Ehu sırtqa shıg'ıp, pu'tkil xalıqqa bılay dedi: «Sizlerdin' ayıbın'ız joq. Hu'kimdarıma qarsı men bas ko'terdim ha'm onı men o'ltirdim. Al mınalardın' ba'rin kim o'ltirdi?
10 Endi bilip qoyın'lar, Jaratqan İyenin' Axabtın' u'y-ishine qarsı aytqan so'zlerinin' birde birewi orınlanbay qalmaydı. Jaratqan İye O'z qulı İliyas arqalı aytqanların ju'zege asırdı».
11 Ehu İzreelde Axabtın' u'y-ishinen qalg'an adamlardın' ha'mmesin, wa'zirlerin, jaqınların, ruwxaniylerin o'ltirdi. Onın' birde bir adamın tiri qaldırmadı.
12 Son'ınan Ehu Samariyag'a qaray jolg'a shıqtı. Jolda shopanlarg'a tiyisli bolg'an Beyt-Eked degen jerden o'tip baratırıp,
13 Yahuda patshası Axaziyanın' tuwısqanların ushırattı. Olardan: «Sizler kimsizler?» – dep soradı. Olar: «Bizler Axaziyanın' tuwısqanlarımız. Patshanın' ha'm xanbiyke İzabeldin' ullarınan xabar alıwg'a baratırmız», – dedi.
14 Ehu adamlarına: «Bulardı tiriley uslap alın'lar», – dedi. Olardı tiriley uslap alıp, Beyt-Eked suw saqlag'ıshının' janında qılıshtan o'tkizdi. Olar qırıq eki adam edi. Olardan birde biri aman qalmadı.
15 Ehu sol jerden ketkennen son', o'zin ku'tip alıwg'a kiyatırg'an Rexab ulı İonadabtı ushırattı ha'm onın' menen sa'lemlesip atırıp: – Menin' sag'an degen niyetim qalıs bolg'anı sıyaqlı, senin' de mag'an degen niyetin' qalıs pa? – dedi. İonadab og'an: – Awa, – dedi. Ehu: – Onda qolın'dı ber, – dedi. İonadab qolın sozdı. Ehu onı arbasına mingizip:
16 Menin' menen birge ju'r ha'm menin' Jaratqan İye ushın qanshelli jan ku'ydiretug'ınımdı ko'r, – dedi de, onı arbasına mingizip alıp ketti.
17 Son'ınan Ehu Samariyag'a bardı ha'm Jaratqan İyenin' İliyas arqalı aytqan so'zleri boyınsha Axabtın' Samariyada qalg'an barlıq adamların tu'p-tamırı menen joq qıldı.
18 Ehu pu'tkil xalıqtı jıynap, olarg'a bılay dedi: «Axab Baalg'a az xızmet etti, al men og'an ko'birek xızmet etejaqpan.
19 Baaldın' barlıq payg'ambarların, ruwxaniylerin ha'm og'an tabınatug'ınlardın' ha'mmesin menin' aldıma shaqırın'lar, hesh kim kelmey qalmasın. Sebebi Baalg'a arnap ullı bir qurbanlıq berejaqpan. Kim de kim kelmey qalsa, ol o'ltiriledi». Ehu bul jerde Baalg'a tabınatug'ınlardı joq qılıw ushın hiyle isletken edi.
20 Son'ınan Ehu: «Baalg'a arnap saltanatlı jıynalıs qılın'», – dedi. Jıyın ja'riyalandı.
21 Ehu pu'tkil İzrailg'a xabarshılar jiberdi ha'm Baalg'a tabınatug'ınlardın' ha'mmesi keldi, birde bir adam kelmey qalmadı. Olar Baaldın' butxanasına kirdi, butxana awzına deyin lıqqa toldı.
22 Ehu muxaddes kiyimlerdi qorg'aytug'ın adamg'a: «Baalg'a tabınatug'ınlardın' ha'mmesine kiyim a'kelip ber», – dedi. Ol olarg'a kiyim a'kelip berdi.
23 Ehu Rexab ulı İonadab penen Baaldın' butxanasına kirip, Baalg'a tabınatug'ınlarg'a: «A'tirapın'ızg'a jaqsılap qaran', aran'ızda Jaratqan İyege sıyınatug'ınlardan hesh kim bolmasın, bul jerde tek Baalg'a tabınatug'ınlar bolsın», – dedi.
24 Son'ınan Ehu ha'm İonadab jandırılatug'ın qurbanlıqtı ha'm basqa qurbanlıqlardı beriwdi basladı. Ehu butxananın' sırtına seksen adamdı qoyıp, olarg'a bılay dep eskertken edi: «Qolın'ızg'a bergen adamlardan birewi qashıp ketse, janın'ız benen to'leysiz».
25 Jandırılatug'ın qurbanlıq beriw juwmaqlang'anda, Ehu saqshılarg'a ha'm a'skerbasılarg'a: «İshke kirip, olardı o'ltirin', birde birewi qashıp ketpesin», – dedi. Olar ha'mmeni qılıshtan o'tkizip, denelerin sırtqa ılaqtırdı. Keyin Baaldın' butxanasının' ishki bo'lmesine kirdi.
26 Butxanadan Baalg'a arnalg'an kiyeli taslardı alıp shıg'ıp, olardı o'rtep jiberdi.
27 Olar Baalg'a arnalg'an kiyeli tastı da, Baaldın' butxanasın da buzıp tasladı. Xalıq ol jerdi ha'zirgi ku'nge shekem ha'jetxana retinde paydalanıp kelmekte.
28 Solay etip, Ehu İzraildag'ı Baalg'a tabınıwshılıqtı joq qıldı.
29 Degen menen, ol Nabat ulı Yarobamnın' İzraildı baslag'an gu'nalarınan, yag'nıy Beyt-El ha'm Dandag'ı altın tanalarg'a tabınıwdan bas keshpedi.
30 Jaratqan İye Ehug'a: «Menin' na'zerimde tuwrı bolg'an islerdi islegenin', Axabtın' u'y-ishine Menin' ju'regimde bolg'an ha'mme na'rseni islegenin' ushın, senin' na'silin' to'rtinshi a'wladqa deyin İzrail taxtında otıradı», – dedi.
31 Biraq Ehu İzraildın' Qudayı Jaratqan İyenin' nızamı boyınsha ju'riwge shın ju'rekten ha'reket etpedi. Ol İzraildı gu'nag'a baslag'an Yarobamnın' gu'nalarınan waz keshpedi.
32 Sol ku'nleri Jaratqan İye İzrail jerlerin bo'leklep, qısqarta basladı. Aram patshası Xazael barlıq İzrail aymaqlarında izraillılardı jen'ip bardı.
33 Ol İordan da'ryasının' shıg'ısındag'ı Gad, Ruben ha'm Menashshe urıwlarına tiyisli bolg'an pu'tkil Gilad jerin, Arnon sayının' boyındag'ı Aroerden Giladqa ha'm Bashang'a deyingi jerlerdi basıp aldı.
34 Ehudın' qalg'an isleri ha'm ol islegen barlıq isler, onın' erlikleri İzrail patshalarının' jılnama kitabında jazılg'an.
35 Ehu o'lip, ata-babalarına qosıldı ha'm onı Samariyada jerledi. Onın' ornına ulı Ehoaxaz patsha boldı.
36 Ehu Samariyada İzrail u'stinen jigirma segiz jıl patshalıq etken edi.
