Nexemiya 2 bob
1 Patsha Artakserkstin' hu'kimdarlıg'ının' jigirmalanshı jılı, Nisan ayı edi. Men patshanın' aldına a'kelingen sharaptı og'an usındım. Burın hesh qashan patsha meni tu'skin awhalda ko'rgen joq edi.
2 Sonlıqtan patsha mag'an: – Nege qapa ko'rinesen'? Bilemen, kesel emessen'. Ju'regin'de bir da'rtin' bar ma deymen? – dedi. Men qattı qorqıp kettim.
3 Sonda da patshag'a: – Taqsır, o'mirin'iz uzaq bolsın! Ata-babalarımız jerlengen qala qan'ırap, da'rwazaları o'rtelgen bolsa, men qalay qapa bolmayın? – dedim.
4 Patsha mag'an: – Ne tileysen'? – dedi. Sonda men ishimnen aspannın' Qudayına duwa ettim,
5 keyin patshag'a bılay dedim: – Taqsır, eger maqul dep tapsan'ız ha'm mendey qulın'ızg'a kewlin'iz tolg'an bolsa, onda meni Yahudag'a, ata-babalarım jerlengen qalag'a jibersen'iz. Men bul qalanı qayta qurmaqshıman.
6 Sonda xanbiyke de patshanın' janında otırg'an edi. Patsha mennen: – Saparın' qansha waqıtqa sozıladı, qashan qaytıp kelesen'? – dep soradı. Patsha meni jiberiwge ırazı boldı. Son'ınan men waqıttı belgilep ayttım.
7 Men patshag'a ja'ne bılay dedim: – Taqsır, eger sizge maqul bolsa, Yahudag'a jetip barg'anımsha, o'z jerlerinen o'tiwime ruxsat beriwi ushın, da'ryanın' arg'ı jag'ının' ha'kimlerine xat jazıp berilsin.
8 Ja'ne de, patsha tog'aylarının' bajbanı Asafqa da xat jazdırıp bersen'iz. Ol mag'an Qudaydın' İbadatxanası janındag'ı qorg'annın' da'rwazaların, qala diywalların soqtırıwım ha'm o'zime u'y saldırıwım ushın kerek bolatug'ın ag'ashlardı bersin. Qudaydın' miyrimli qolı menin' u'stimde bolg'anlıg'ı sebepli, patsha sorag'anımnın' ha'mmesin berdi.
9 Patsha menin' menen birge bir neshe a'skerbasılar ha'm atlılar jibergen edi. Men da'ryanın' arg'ı jag'ının' ha'kimlerine kelip, olarg'a patshanın' xatların berdim.
10 Xoronlı Sanballat ha'm ammon xalqınan bolg'an xızmetshi Tobiya İzrail xalqının' iygiligi ushın g'amxorlıq etiwge bir adamnın' kelgenin esitkende, qattı g'a'zeplendi.
11 Men Erusalimge kelip, ol jerde u'sh ku'n boldım.
12 Men Erusalim ushın isleytug'ın islerimdi Qudayımnın' ju'regime salg'anın hesh kimge aytpadım. Tu'nde turıp, janımdag'ı adamlardan bir neshewin ertip, jolg'a shıqtım. Janıma o'zim minip ju'rgen janıwardan basqa hesh qanday janıwar alg'an joq edim.
13 u'nde Oypatlıq da'rwazası arqalı shıg'ıp, Aydarha bulag'ına, ol jerden Tezek da'rwazasına bardım. Men wayran etilgen Erusalim diywalların ha'm onın' jag'ıp jiberilgen da'rwazaların ko'zden keshirdim.
14 Son'ınan Bulaq da'rwazasına ha'm Patsha hawızına bardım. Biraq astımdag'ı janıwarım o'tiwge jol taba almadı.
15 Sonlıqtan tu'nde say boylap ko'terilip, diywaldı ko'zden keshirdim. Aqırında, keri aylanıp, Oypatlıq da'rwazası arqalı izge qayttım.
16 Hu'kimet basshıları menin' qay jerge barıp, ne islep ju'rgenimdi bilmedi. Sebebi men yahudiylerge de, ruwxaniylerge de, aqsu'yeklerge de, basshılarg'a da, usı iske qatnası bar basqa jumıs alıp barıwshılarg'a da ele hesh na'rse aytpag'an edim.
17 Son'ınan men olarg'a: «Qanday apatshılıqqa ushırag'anımızdı ko'rip tursız ba? Erusalim bosap qalg'an, al onın' da'rwazaları bolsa, jandırıp jiberilgen. Ju'rin'ler, Erusalimnin' diywalların qayta tikleyik. Bunnan bılay ayaq astı bolıwg'a shek qoyayıq», – dedim.
18 Men olarg'a Qudaydın' miyrimli qolının' menin' u'stimde ekenin ha'm patshanın' o'zime aytqan so'zlerin aytıp berdim. Sonda olar: «Qurılıstı baslaymız», – dedi ha'm qayırlı iske bar ku'shin jumsawg'a tayar turdı.
19 Biraq xoronlı Sanballat, ammon xalqınan bolg'an xızmetshi Tobiya ha'm arab xalqınan bolg'an Geshem bulardı esitkende, u'stimizden ku'ldi ha'm: – Ne islep atırsız o'zi? Yamasa patshag'a qarsı bas ko'terip atırsızlar ma? – dep bizlerdi kemsitip so'yledi.
20 Sonda men olarg'a: – Aspannın' Qudayı isimizdi sa'tli qıladı, al Onın' qulları bolg'an bizler qurılıstı baslaymız. Sizlerdin' Erusalimde u'lesin'iz de, haqın'ız da, tariyxıy deregin'iz de joq, – dep juwap berdim.
