Shıg'ıw 13 bob
1 Bunnan son', Jaratqan İye Muwsag'a bılay dedi:
2 – Barlıq birinshi tuwılg'anlardı Mag'an bag'ıshlan'lar. İzrail hayallarının' da, mallarının' da qarınnan birinshi shıqqanları Meniki, – dedi.
3 Muwsa xalıqqa bılay dedi: – Mısırdan, o'zlerin'iz qul bolg'an elden shıqqan bu'gingi ku'ndi este saqlan'lar. O'ytkeni Jaratqan İye qu'diretli qolı menen sizlerdi ol jerden alıp shıqtı. Ashıtqı salıng'an hesh na'rse jemen'ler.
4 Bu'gin Abib ayında bul jerden shıg'ıp baratırsızlar
5 Jaratqan İye sizlerdi qanan, xet, amor, xiw ha'm ebus xalıqlarının' jerlerine, ata-babaların'ızg'a beremen dep ant ishken, su't ha'm pal aqqan elge aparg'anda, usı ayda mına ra'simdi o'tkizin'ler:
6 eti ku'n ashıtqısız nan jep, jetinshi ku'ni Jaratqan İyege arnap bayram qılın'lar.
7 Sol jeti ku'n ishinde tek ashıtqısız nan jen'ler. O'zin'izde de, jasap atırg'an pu'tkil jerin'izde de ashıtqı salıng'an nan yamasa ashıtqı bolmasın.
8 Sol ku'ni balaların'ızg'a: «Mısırdan shıqqanımızda, Jaratqan İye bizler ushın islegen isleri sebepli bulardı islep atırmız», – dep tu'sindirin'ler.
9 Bul ra'sim qolın'ızda bir belgi, man'layın'ızda saqlanatug'ın yadnama bolsın. Usılayınsha, Jaratqan İyenin' nızamı awzın'ızda bolsın. Sebebi Jaratqan İye sizlerdi ku'shli qolı menen Mısırdan alıp shıqtı.
10 Sizler de ha'r jılı belgilengen waqıtta bul qag'ıydanı orınlan'lar.
11 Jaratqan İye sizlerge ha'm ata-babaların'ızg'a ant ishkenindey, sizlerdi Qanan jerine aparıp, sizlerge sol jerdi bergende,
12 qarınnan birinshi shıqqanlardın' ha'mmesin Jaratqan İyege bag'ıshlan'lar. Malların'ızdın' birinshi tuwılg'an barlıq erkek to'lleri Jaratqan İyege tiyisli.
13 Eshektin' ha'r bir birinshi tuwılg'an to'linin' ornına bir qozı berip, satıp alın'lar. Eger olay etpesen'iz, gu'rrenin' moynın u'zin'. Barlıq tun'g'ısh ulların'ızdın' qunın o'tewin'iz tiyis.
14 Keleshekte ulların'ız sizlerden: «Bunın' ma'nisi qanday?» – dep sorasa, olarg'a bılay dep juwap berin'ler: «Jaratqan İye bizlerdi qu'diretli qolı menen Mısırdan, bizler qul bolg'an elden alıp shıqtı.
15 Faraon bizlerdi jibermey, qaysarlıq ko'rsetkende, Jaratqan İye Mısırda adamlardın' ha'm mallardın' barlıq tun'g'ıshların o'ltirdi. Sonlıqtan mallardın' tun'g'ısh to'llerin Jaratqan İyege qurbanlıqqa beremiz, al tun'g'ısh ullarımız ushın qun to'leymiz».
16 Bul ra'sim qolın'ızda bir belgi, esin'izde saqlanatug'ın yadnama bolsın. Sebebi Jaratqan İye sizlerdi qu'diretli qolı menen Mısırdan alıp shıqtı.
17 Faraon izraillılardı jibergende, Quday: xalıq urısqa duwshar bolatug'ının bilgende o'kinip, Mısırg'a qaytıp ketpesin, dep filist xalqının' jeri arqalı o'tetug'ın jol qısqaraq bolsa da, olardı ol jer arqalı alıp ju'rmedi.
18 Quday xalıqtı Qamıs ten'izine sho'l jolı menen aylandırıp apardı. İzraillılar Mısırdan qarıw-jaraq penen shıqqan edi.
19 Muwsa Yusuptin' su'yeklerin de o'zi menen birge alıp shıqqan edi. O'ytkeni Yusup izraillılarg'a ant ishtirip: «Quday sizlerge so'zsiz na'zer saladı. Sonda su'yeklerimdi bul jerden alıp ketin'ler», – dep na'siyatlap ketken edi.
20 İzraillılar Sukkottan shıg'ıp, sho'l shetindegi Etamg'a ornalastı.
21 Olardın' ku'ni-tu'ni jol ju'riwi ushın, Jaratqan İye ku'ndiz minara sıyaqlı bult bolıp jol ko'rsetip, tu'nde minara sıyaqlı ot bolıp jollarına jarıq tu'sirip, olardı baslap ju'rdi.
22 Ku'ndiz bult, tu'nde ot xalıqtın' aldınan bir dem de uzaqlamadı.
