Shıg'ıw 3 bob
1 Muwsa qa'yin atası, Midyan ruwxaniyi İtronın' qoyların bag'atug'ın edi. Bir ku'ni ol su'riwdi sho'ldin' tu'pkirine jayıp ju'rip, Qudaydın' tawı Xorebke kelip qaldı.
2 Sonda Jaratqan İyenin' perishtesi og'an shen'gel putası arasında janıp turg'an ottın' jalını ishinde ko'rindi. Muwsa putanın' janıp turg'anın, biraq janıp joq bolıp ketpegenin ko'rdi.
3 Muwsa: «Barıp, bul tan' qalarlıq na'rseni ko'reyin. Puta nege janıp, joq bolıp ketpey tur eken?» – dep oyladı.
4 Jaratqan İye Muwsanın' qaraw ushın jaqınlap kiyatırg'anın ko'rgende, putanın' ishinen: – Muwsa, Muwsa! – dep shaqırdı. – La'bba'y! – dep juwap berdi ol.
5 Quday og'an: – Bunnan artıq jaqınlaspa. Ayaq kiyimin'di shesh, sebebi sen turg'an jer – muxaddes.
6 Men senin' a'ken'nin' Qudayıman, İbrayımnın' Qudayı, Isaqtın' Qudayı ha'm Yaqıptın' Qudayıman, – dedi. Muwsa Qudayg'a qarawg'a qorqqanlıqtan, ju'zin japtı.
7 Sonda Jaratqan İye Muwsag'a bılay dedi: – Men xalqımnın' Mısırda ja'bir shegip atırg'anın ko'rdim ha'm qul jumsawshıları sebepli dad salıp atırg'anın esittim. Men olardın' azap shegip atırg'anın da bilemen.
8 Sonlıqtan Men olardı mısırlılardın' qolınan qutqarıw ushın keldim. Olardı sol elden shıg'arıp, ken' ha'm o'nimdar bolg'an jerge, su't ha'm pal ag'ıp turg'an elge – qanan, xet, amor, periz, xiw ha'm ebus xalıqlarının' jerlerine aparaman.
9 Mine, izraillılardın' dadı Mag'an jetip keldi ha'm mısırlılardın' olardı qalay ezip atırg'anın O'zim de ko'rdim.
10 Endi Men seni xalqım bolg'an izraillılardı Mısırdan alıp shıg'ıw ushın, faraong'a jiberemen.
11 Biraq Muwsa Qudayg'a: – Faraong'a barıp, izraillılardı Mısırdan alıp shıg'atug'ınday, men kim bolıppan, – dep juwap berdi.
12 Al Quday og'an: – Men senin' menen birge bolaman. Seni Menin' jibergenimnin' belgisi mınaw boladı: xalıqtı Mısırdan alıp shıqqanın'nan son', usı tawda Mag'an sıyınasızlar, – dedi.
13 Sonda Muwsa Og'an: – Men İzrail xalqına barıp: «Meni sizlerge ata-babaların'ızdın' Qudayı jiberdi», – desem, olar mennen: «Onın' atı kim?» – dep sorasa, men olarg'a ne deymen? – dedi.
14 Quday Muwsag'a: – Men ma'n'gige bar Bolıwshıman. Sen izraillılarg'a: «Meni sizlerge ma'n'gige bar Bolıwshı jiberdi», – dep ayt, – dedi.
15 Quday Muwsag'a ja'ne bılay dedi: – Sen izraillılarg'a tag'ı: «Meni sizlerge ata-babaların'ızdın' Qudayı bolg'an Jaratqan İye: İbrayımnın' Qudayı, Isaqtın' Qudayı ha'm Yaqıptın' Qudayı bolg'an ma'n'gige bar Bolıwshı jiberdi», – dep ayt. Menin' atım ma'n'gige usı boladı. A'wladtan-a'wladqa Menin' atımdı usılay shaqırsın.
16 Sen bar da, İzrail aqsaqalların jıynap, olarg'a bılay de: «Ata-babaların'ız İbrayımnın', Isaqtın' ha'm Yaqıptın' Qudayı bolg'an ma'n'gige bar Bolıwshı mag'an ko'rinip, mınalardı ayttı: „Mısırda sizlerge neler islenip atırg'anın ko'rip, sizlerge na'zerimdi tu'sirdim.
17 Sizlerdi Mısırdag'ı eziwshilikten qutqarıp, qanan, xet, amor, periz, xiw ha'm ebus xalıqlarının' jerlerine, su't ha'm pal aqqan jerge aparıwdı sheshtim“».
18 İzraildın' aqsaqalları sag'an qulaq asadı. Sen olar menen birge Mısır patshasına barıp, og'an bılay den'ler: «Evreylerdin' Qudayı Jaratqan İye bizlerge ko'rindi. Endi sho'lde u'sh ku'nlik jol ju'rip barıp, Qudayımız Jaratqan İyege qurbanlıq beriwge ruxsat ber».
19 Biraq Men bilemen, ku'shli bir qol ma'jbu'rlemegenshe, Mısır patshası ketiwin'izge ruxsat bermeydi.
20 Sonlıqtan Men qolımdı sozaman ha'm olardın' arasında ka'ramatlar islep, Mısırdı jazalayman. Sonnan keyin, ol sizlerdi azat qıladı.
21 Xalıqtı mısırlılarg'a unamlı qılıp ko'rsetemen. Sizler ketken waqtın'ızda, qurı qol ketpeysiz.
22 Ha'r bir hayal mısırlı qon'sılarınan ha'm olardın' u'yinde jasaytug'ın mısırlı hayaldan gu'mis ha'm altın bezeniw buyımların, kiyimkenshekler sorap aladı. Ul-qızların'ızdı olar menen bezendiresizler ha'm sol ta'rizde mısırlılardı tonap ketesizler.
