Daniel 4 bob
1 Men, Nabuxodonosor o'z u'yimde – sarayımda tınısh, ra'ha'tlenip jasap atırg'an edim.
2 Biraq bir ku'ni tu'nde qorqınıshlı tu's ko'rdim. To'segimde jatqanımda, bul tu's ha'm ayanlar meni qattı qorqınıshqa saldı.
3 Tu'simdi mag'an jorıp beriwi ushın Babilonnın' barlıq danıshpanların aldıma alıp keliwdi buyırdım.
4 Aldıma kelgen palkerlerge, porxanlarg'a, danıshpanlarg'a ha'm boljawshılarg'a tu'simdi aytıp berdim, biraq olar onı jorıy almadı.
5 Aqırında atı menin' qudayımnın' atı menen atalg'an Belteshassar degen muxaddes qudaylardın' ruwxı menen tolg'an Daniel aldıma keldi. Men og'an tu'simdi aytıp berip, bılay dedim:
6 – Ha'y, Belteshassar, danıshpanlardın' basshısı, sende muxaddes qudaylardın' ruwxı bar ekenin ha'm ha'r bir sırdı asha alatug'ının'dı bilemen. Ko'rgen tu'simdi tın'lap, mag'an jorıp ber.
7 To'segimde jatıp, ko'rgen ayanlarda du'nyanın' ortasında o'sip turg'an ju'da' u'lken bir terekti ko'rdim.
8 Terek o'sip barıp, ku'shke toldı ha'm onın' ushı aspang'a jetti. Bul terekti du'nyanın' to'rt ta'repinen ko'riwge bolatug'ın edi.
9 Onın' japıraqları sulıw ha'm pu'tkil du'nyanı ta'miyinleytug'ın mol miywesi bar edi. Jabayı haywanlar onın' sayasında pana tawıp, ko'ktegi quslar shaqalarına uya salıp, jer ju'zindegi barlıq tiri janlar onnan azıqlanatug'ın edi.
10 To'segimde jatıp, ko'rip atırg'an ayanda, aspannan muxaddes bir gu'zetshi tu'sip keldi.
11 Ol ba'lent dawıs penen bılay dedi: «Terekti kesip, shaqaların shawıp taslan'lar, japıraqların u'zip, miywelerin shashıp taslan'lar. Sayasındag'ı haywanlardı quwın'lar, shaqalarındag'ı quslardı ushırıp jiberin'ler.
12 Biraq terektin' tu'biri menen tamırlarına tiymen'ler, onı temir ha'm qola menen shınjırlap, jabayı sho'plerdin' arasında qaldırın'lar. Ol aspannan tu'sken shıqqa shomılsın, jabayı haywanlar menen jasap, nesiybesin dala sho'plerinen terip jesin.
13 Onnan adamzat ju'regi alıp taslanıp, haywan ju'regi berilsin. Ol jeti mu'ddet haywanday bolıp jasasın.
14 Bul hu'kimdi gu'zetshiler, qarardı muxaddesler shıg'ardı. Solay etip, ha'r bir tiri jan Quday Taalanın' adamzat patshalıg'ının' Hu'kimdarı ekenin bilsin. Ol patshalıqtı qa'legen adamına berer, ha'tteki, qarapayım adamdı taxtqa otırg'ızar».
15 Men, patsha Nabuxodonosor usınday tu's ko'rdim. Endi sen, Belteshassar mag'an onı jorıp ber, sebebi patshalıg'ımdag'ı danıshpanlardın' hesh biri tu'simdi jorıp bere almadı. Al bul senin' qolın'nan keledi, o'ytkeni sende muxaddes qudaylardın' ruwxı bar.
16 Keyin Daniel, yag'nıy Belteshassar bir neshe waqıt o'zine kele almay turdı, oyları onı qorqınıshqa salg'an edi. Sonda patsha og'an: – Belteshassar, tu'sim de, onın' jorılıwı da seni qorqınıshqa salmasın, – dedi. Sonda Belteshassar bılay dep juwap berdi: – Mırzam, bul tu's sizdi jek ko'retug'ınlardın', onın' jorılıwı dushpanların'ızdın' basına tu'ssin!
17 Siz usha bası aspang'a tiyip turg'an biyik ha'm ku'shli bir terekti ko'rdin'iz. Bul terek sonshelli u'lken bolg'anlıqtan, onı du'nyanın' to'rt ta'repinen ko'riwge bolatug'ın edi.
18 Onın' japıraqları ju'da' sulıw, pu'tkil du'nyanı ta'miyinleytug'ın mol miyweleri bar edi. Onın' sayasında jabayı haywanlar jasap, ko'ktegi quslar shaqalarına uya salg'an edi.
19 Patsham, bul terek siz bolasız. Siz ullı ha'm ku'shli boldın'ız. Ullılıg'ın' ko'klerge jetip, hu'kimdarlıg'ın' pu'tkil jer ju'zine jayıldı.
20 Siz aspannan tu'sip kiyatırg'an muxaddes gu'zetshini de ko'rdin'iz. Ol: «Terekti kesip, joq qılın'lar. Biraq onın' tu'biri ha'm tamırlarına tiymen'ler, olardı temir ha'm qola menen shınjırlap, jabayı sho'plerdin' arasına qaldırın'lar. Jeti mu'ddet dawamında ol aspannan tu'sken shıqqa shomılıp, jabayı haywanlar menen birge jasasın», – dedi.
21 Patshamız, tu'stin' jorılıwı ha'm Quday Taalanın' taqsırım bolg'an sizge shıg'arg'an qararı mınaday:
22 siz adamlar ja'miyetinen shıg'arılıp, jabayı haywanlardın' arasında jasaysız. Quday Taalanın' adamzat patshalıg'ının' jalg'ız Hu'kimdarı ekenin ha'm Ol taxttı qa'legen adamına beretug'ının tu'singenin'izshe jeti mu'ddet dawamında malg'a uqsap ot jep, aspannan tu'sken shıqqa shomılasız.
23 Degen menen, terektin' tu'biri ha'm tamırları qaldırılsın! – degen buyrıq mınanı an'latadı: Barlıq hu'kimdarlıqtın' aspandag'ı Qudayg'a tiyisli ekenin tu'singenin'izden keyin, patshalıg'ın'ız qayta tiklenedi.
24 Sonlıqtan taqsır, sizden o'tinemen, ma'sla'ha'timdi alın'ız: gu'naların'ızdan bas tartıp, tuwrı islerdi islen', ayıp islerin'izden bas keship, jarlılarg'a rehim qılın'. Sonda sizin' tabıslı o'mirin'iz dawam etedi.
25 Bulardın' ha'mmesi patsha Nabuxodonosordın' basına tu'sti.
26 Aradan on eki ay o'tkennen son', ol Babilondag'ı sarayının' tam basına shıg'ıp ju'rdi.
27 Sonda ol qalag'a qarap: «O'z qu'diretim menen qurdırg'an patsha qalası bolg'an ullı Babilong'a qaran'lar! Bunı o'z ku'shim ha'm ullı qu'diretim menen qurdım», – dedi.
28 Ol bul so'zlerdi aytıp u'lgermesten-aq aspannan bir dawıs keldi: «Ha'y, patsha Nabuxodonosor, so'zime qulaq sal! Ha'zirden baslap, sen taxtın'nan tu'sirildin'.
29 Sen adamlar ja'miyetinen aydalıp, jabayı haywanlar menen jasaysan'. Quday Taala – adamzat patshalıg'ının' jalg'ız Hu'kimdarı ekenin ha'm Ol taxttı qa'legen adamına beretug'ının tu'sinip jetpegenin'she, jeti mu'ddet dawamında malg'a uqsap ot jep ju'resen'».
30 Nabuxodonosorg'a aytılg'an bul so'zler sol waqıtta orınlandı. Ol adamlar ja'miyetinen aydaldı ha'm mal sıyaqlı ot jep, aspannan tu'sken shıqqa shomıldı. Shashları bu'rkittin' qanatlarının' uzınlıg'ınday, tırnaqları bolsa qustın' tırnaqlarınday bolıp o'sip ketti.
31 Belgilengen mu'ddet tamamlang'anda, men, Nabuxodonosor ko'zlerimdi ko'kke tiktim ha'm sol waqıtta o'zime keldim. Quday Taalag'a alg'ıs-maqtawlar ayttım, ma'n'gi o'mir su'riwshini alg'ıslap, ullıladım: Onın' hu'kimdarlıg'ı – ma'n'gi hu'kimdarlıq, Onın' patshalıg'ı a'wladtan-a'wladqa dawam eter.
32 u'nyada jasap atırg'anlar Onın' aldında hesh na'rse emes, Ol aspandag'ı ku'shlerdin' ha'm du'nyada jasap atırg'anlardın' u'stinen, O'zinin' qa'legen hu'kimin shıg'arar. Hesh kim Onı toqtata almas, Og'an «Ne qılıp atırsan'?» – dep hesh kim ayta almas.
33 Es-aqılım qaytıp kelgen waqıttın' o'zinde, menin' patshalıq ma'rtebem, abırayım ha'm saltanatım qayta tiklendi. Ken'esgo'ylerim ha'm aqsu'yeklerim meni izlep keldi. Men qaytadan taxtqa otırdım, ullılıg'ım bolsa, aldıng'ısınan da asıp ketti.
34 Endi men, Nabuxodonosor Aspannın' Patshasına alg'ıs-maqtaw aytaman, Onı alg'ıslap, ullılayman. O'ytkeni Onın' barlıq isleri haqıyqat ha'm jolları a'dil. Ta'kabbirlerdin' ko'kiregin basıwg'a Onın' ku'shi jetedi.
