Sanlar 11 bob
1 Sol waqıtları xalıq qattı nalıy basladı. Jaratqan İye bunı esitip, g'a'zeplendi ha'm olarg'a ot jiberip, ordanın' shetlerin jag'ıp joq qılıp jiberdi.
2 Sonda xalıq Muwsag'a jalbarındı. Muwsa Jaratqan İyege duwa etkende, ot so'ndi.
3 Jaratqan İyenin' jibergen otı olardın' arasında jang'anı ushın, sol jer Tabera dep ataldı.
4 İzrail xalqının' arasındag'ı basqa milletlerden toplang'an ta'rtipsiz adamlar na'psiqawlıqqa berile basladı. İzraillılar da olarg'a qosılıp, bılay dep zarlay basladı: «Qa'ne endi, jewge go'sh bolg'anda ma edi!
5 Mısırda teginge jegen balıq, qıyar, g'arbız, ko'k piyaz, domalaq piyaz ha'm sarımsaqlar ele yadımızda.
6 Endi bolsa, din'kemiz qurıg'an. Mına mannadan basqa jeytug'ın hesh na'rse ko'rgenimiz joq».
7 Manna kinza tuqımınday bolıp, ren'i aqshıl sarı edi.
8 Xalıq dalag'a shıg'ıp, onı jıynap alatug'ın edi ha'm onı digirmang'a tartıp yamasa kelige tu'yetug'ın edi. Onı qazanda qaynatıp, gu'lshe nan pisiretug'ın edi. Bunın' da'mi za'ytu'n mayı qosılg'an nang'a uqsas edi.
9 Tu'nde ordag'a shıq tu'skende, manna da birge jawatug'ın edi.
10 Muwsa xalıqtın', ha'r bir tiyredegi adamlardın' o'z shatırlarının' aldında turıp, dad salıp atırg'anın esitti. Jaratqan İye bug'an qattı g'a'zeplendi. Muwsa da bug'an qapa bolg'an edi.
11 Sonda Muwsa Jaratqan İyege bılay dedi: – Qulın'a ne ushın bunday jamanlıqtı rawa ko'rdin'? Ne ushın O'z miyrimin'di mennen ayap, bul xalıqtın' ju'gin mag'an ju'kledin'?
12 Pu'tkil bul xalıqqa ju'kli bolg'an men be edim? Olardı men tuwg'an ba edim? Bolmasa, ne sebepten Sen mag'an: «Bala bag'ıwshının' emiziwli balanı alıp ju'rgenindey, olardı ata-babalarına beremen dep ant ishken jerge qolların'da ko'terip alıp bar», – dep aytıp atırsan'?
13 Bul xalıq mag'an: «Bizlerge jeytug'ın go'sh ber», – dep qoymay atır. Olardın' barlıg'ına beretug'ın go'shti qay jerden alaman?
14 Bul xalıqtın' barlıg'ın bir o'zim jetelep alıp ju're almayman, sebebi olar men ushın awır ju'k boladı.
15 Eger mag'an usılay islemekshi bolsan', onda meni o'ltir. Eger de Senin' miyrimin'e erisken bolsam, onda basıma tu'sken bul awırmanlıqtı ko'rmeyin.
16 Jaratqan İye Muwsag'a bılay dedi: – Mag'an İzrail aqsaqallarınan jetpis adamdı jıynap ber. Olar o'zin' basshı ha'm qadag'alawshı dep ta'n alg'anların'nan bolsın. Olardı Ushırasıw shatırına alıp kelip, o'zin'nin' qasın'a turg'ız.
17 Men to'men tu'sip, senin' menen so'ylesemen. Senin' u'stin'degi Ruwxtan alıp, olarg'a da beremen. Xalıqtın' ju'gin tek g'ana sen ko'termewin' ushın, olar sag'an ja'rdem beredi.
18 Xalıqqa bılay dep ayt: «Erten'gi ku'n ushın o'zlerin'izdi pa'klen', go'sh jeysizler. Sizlerdin': „Qa'ne endi, jewge go'sh bolg'anda ma edi, Mısırda bolg'an waqtımızda jaqsı edi“, – dep nalıp, dad salg'anın'ızdı Jaratqan İye esitti. Endi go'sh jewin'iz ushın, Jaratqan İye sizlerge go'sh beredi.
19 Go'shti tek g'ana bir ku'n, eki ku'n, bes ku'n, on ku'n yamasa jigirma ku'n emes,
20 al bir ay dawamında alqımın'ızg'a kelgenshe, kewlin'iz aynıg'ansha jeysizler. Sebebi sizler aran'ızda bolıp atırg'an Jaratqan İyeden ju'z burdın'lar. Onın' aldında Mısırdan ne ushın shıg'ıp kettik, dep nalıp, jıladın'lar».
21 Sonda Muwsa: – Qasımdag'ı bul xalıq altı ju'z mın' er adamnan ibarat. Al Sen: «Bul xalıqqa bir ay dawamında jewi ushın go'sh beremen», – dep atırsan'.
22 Barlıq qoy-eshki, sıyırlar soyılsa da, ten'izdegi barlıq balıqlar awlansa da, olarg'a jeter me eken? – dedi.
23 Jaratqan İye og'an: – Menin' qolım kelte me? Sag'an aytqanlarım orınlanatug'ının yamasa orınlanbaytug'ının o'z ko'zin' menen ko'resen', – dedi.
24 Sonnan keyin, Muwsa sırtqa shıg'ıp, Jaratqan İyenin' o'zine aytqanların xalıqqa jetkerdi. Xalıqtın' jetpis aqsaqalın jıynap, Muxaddes shatırdın' do'geregine jaylastırdı.
25 Sonda Jaratqan İye bult ishinde tu'sip, Muwsa menen so'ylesti ha'm Muwsanın' u'stindegi Ruwxtan alıp, jetpis aqsaqalg'a berdi. Olar Ruwxtı alg'an waqıtta, o'zgeshe awhalg'a tu'sti. Biraq bunnan son', bul jag'day basqa ta'kirarlanbadı.
26 Saylang'an jetpis aqsaqaldın' ishinde bolg'an Eldad penen Medad degen eki adam ordada qalıp, Muxaddes shatırg'a kelmey qalg'an edi. Biraq Ruwx olardın' u'stine tu'sip kelip, olar da ordada o'zgeshe awhalg'a tu'se baslag'an edi.
27 Bunı ko'rgen bir jas bala Muwsag'a juwırıp kelip: «Eldad penen Medad ordada o'zgeshe awhalg'a tu'sip qaldı», – dep xabar jetkerdi.
28 Jas waqtınan Muwsag'a ja'rdemshi bolıp kiyatırg'an Nun ulı Eshua: – Mırzam Muwsa, olardı tıyıp qoy! – dedi.
29 Biraq Muwsa: – Sen menin' ushın qızg'anıp atırsan' ba? Qa'ne endi, Jaratqan İyenin' pu'tkil xalqı payg'ambar bolsa, Jaratqan İye olardın' u'stine O'z Ruwxın jiberse edi! – dedi.
30 Sonnan son', Muwsa menen İzraildın' aqsaqalları ordag'a qaytıp keldi.
31 Jaratqan İye dawıl jiberdi. Dawıl ten'iz ta'repten bo'denelerdi ushırıp a'kelip, ordanın' ha'r ta'repine u'yip tasladı. Bo'deneler ordadan bir ku'nlik jol uzaqlıqqa deyin, jerden eki shıg'anaq biyiklikke tu'sip, ushıp ju'rgen edi.
32 Sol ku'ni xalıq ku'ni menen, tu'ni menen ha'm erten'ine keshke deyin bo'dene jıynadı. Olardın' hesh biri on xomerden az jıynamadı. Bo'denelerdi keptiriw ushın, olardı shatırlarının' do'geregine jayıp qoydı.
33 Biraq xalıq go'shti ele awzına alıp, jewge u'lgermey-aq, Jaratqan İye g'a'zeplenip, olardı ku'shli bir oba menen jazaladı.
34 Sonlıqtan sol jer Kibrot-Hattaawa atı berildi. O'ytkeni ol jerge na'psin tıya almag'an adamlar jerlengen edi.
35 Xalıq Kibrot-Hattaawadan Xaserotqa ko'ship, sol jerde qaldı.
