Ayan 22 bob
1 Sonda perishte mag'an kristall sıyaqlı jıltırag'an o'mir suwının' da'ryasın ko'rsetti. Bul da'rya Qudaydın' ha'm Qozının' taxtınan shıg'ıp,
2 qalanın' ken' ko'shesinin' ortası boylap ag'ıp tur edi. Da'ryanın' eki ta'repinde ha'r ayda on eki tu'rli miywe berip turatug'ın o'mir teregi bar edi. Terektin' japıraqları bolsa, milletlerdin' shıpa alıwı ushın arnalg'an edi.
3 Endi hesh qanday g'arg'ıs bolmaydı. Qudaydın' ha'm Qozının' taxtı qalanın' ishinde boladı. Al xızmetshileri Og'an xızmet etedi.
4 Olar Qudaydın' ju'zin ko'redi, man'laylarına Onın' atı jazıladı.
5 Endi tu'n bolmaydı. Ya shıra jaqtısının', ya quyash jaqtısının' keregi bolmaydı. Sebebi Quday İyemizdin' O'zi olarg'a jaqtı boladı ha'm olar ma'n'gige patshalıq etedi.
6 Son'ınan perishte mag'an bılay dedi: – Bul so'zler – isenimli ha'm haqıyqat. O'z payg'ambarlarına Ruwxın bergen Quday İyemiz jaqın arada bolıwı tiyis waqıyalardı xızmetshilerine bildiriw ushın, O'z perishtesin jiberdi.
7 «Mine, Men jıldam kelemen! Bul kitaptın' payg'ambarshılıq so'zlerin orınlaytug'ın adam qanday baxıtlı!» – deydi İyemiz İysa.
8 Men – usılardı esitken ha'm ko'rgen Yuxanman. Bulardı esitip ha'm ko'rgenimde, usılardı mag'an ko'rsetken perishtege tabınıw ushın, onın' ayaqlarına jıg'ıldım.
9 Biraq ol mag'an: – Bunday qıla go'rme! Men de sen, payg'ambar bolg'an tuwısqanların' ha'm bul kitaptın' so'zlerin orınlaytug'ınlar sıyaqlı, Qudaydın' xızmetshisimen. Qudayg'a tabın, – dedi.
10 Son'ınan ol mag'an bılay dedi: – Bul kitaptın' payg'ambarshılıq so'zlerin mo'rlep taslama. O'ytkeni waqıt jaqın qaldı.
11 Jamanlıq qılatug'ın adam ja'ne de jamanlıq qılıwdı dawam etsin. Haram bolg'an adam haram isin dawam etsin. Haq bolg'an adam ja'ne de haq isler isley bersin. Muxaddes bolg'an adam muxaddes bolıp qalsın.
12 İyemiz İysa bılay deydi: «Mine, Men jıldam kelemen! Beretug'ın sıyım O'zim menen birge. Ha'r bir adamg'a islerine qaray qaytaraman.
13 Men – Alfa ha'm Omegaman, birinshi ha'm son'g'ıman, bası ha'm aqırıman.
14 O'mir tereginen jewge huqıq alıw ushın ha'm qalag'a da'rwaza arqalı kiriw ushın kiyimlerin juwg'anlar qanday baxıtlı!
15 ytler – sıyqırshılar, neke hadallıg'ın buzıwshılar, adam o'ltiriwshiler, butqa tabınıwshılar, o'tirikti jaqsı ko'rip, jalg'an islerdi islewshilerdin' ha'mmesi sırtta qaladı.
16 Men, İysa, iseniwshi ja'ma'a'tlerdegi sizlerge bul gu'walıqtı jetkizsin dep, O'z perishtemdi jiberdim. Men – Dawıttın' tiykarı ha'm urpag'ı, jaqtı tan' juldızıman».
17 Muxaddes Ruwx ha'm kelin: «Kel!» deydi. Esitken ha'r bir adam: «Kel!» desin. Sho'llegen adam kelsin, qa'legen adam o'mir suwınan esheyin alsın.
18 Bul kitaptag'ı payg'ambarshılıq so'zlerin esitken ha'r bir adamdı eskertip atırman: eger kim de kim bul so'zlerge bir na'rse qossa, Quday da onı bul kitaplarda jazılg'an ba'lelerge duwshar etedi.
19 Eger kim de kim bul payg'ambarshılıq kitabının' so'zlerinen bir na'rse alıp taslasa, Quday da onı bul kitapta jazılg'an o'mir tereginen ha'm muxaddes qaladan u'lessiz qaldıradı.
20 Bulardı gu'walıq etip aytqan İyemiz: «Awa, Men jıldam kelemen», – deydi. Awmiyin! Kele go'r, İyem İysa!
21 İyemiz İysanın' miyrimi ha'mmen'izge yar bolsın! Awmiyin.
