1 Patshalar 17 bob

Dawıttın' Goliyattı o'ltiriwi(1-58).

¹ Filistler urısıw ushın a'skerlerin toplap, Yahudanın' Soxo qalasına jıynaldı. Olar Soxo menen Azeqa qalası aralıg'ındag'ı EfesDammim degen jerge orda qurdı.

² Shaul menen izraillılar da toplandı. Olar Ela oypatlıg'ına orda qurıp, filistlerge qarsı sawashqa tayarlandı.

³ Filistler bir to'beshikti, al izraillılar ekinshi to'beshikti iyeledi. Olardın' ortasında oypatlıq bar edi.

⁴ 4Filistler sapınan gatlı Goliyat degen ku'shli bir jawınger ortag'a shıqtı. Onın' boyı altı shıg'anaq ha'm bir qarıs edi.

⁵ Ol basına qoladan islengen duwlıg'a, u'stine qoladan islengen sawıt kiyip alg'an bolıp, sawıtının' awırlıg'ı shama menen bes mın' shekel edi.

⁶ Onın' ayaqları qola dizeqap penen qaplanıp, jawırınına qola semser asqan edi.

⁷ Semserinin' sabı toqıw u'skenesinin' qadasınday, al semserinin' ushındag'ı temirdin' awırlıg'ı altı ju'z shekel edi. Goliyattın' u'lken qalqanın no'keri onın' aldında ko'terip ju'retug'ın edi.

⁸ Goliyat turıp, sapta turg'an izraillılarg'a bılay dep baqırdı: «Sizler nege sawash maydanına shıqtın'ız? Men filistpen, al sizler Shauldın' qulları emessizler me? Mag'an qarsı shıg'ıw ushın aran'ızdan birin tan'lan'.

⁹ Eger ol menin' menen urısıp, meni o'ltire alsa, onda bizler sizlerdin' qulların'ız bolamız. Eger men u'stin kelip, onı o'ltire alsam, onda sizler bizlerge qul bolıp, bizlerge xızmet qılasızlar».

¹⁰ Son'ınan filist so'zin dawam etip: «Bu'gin men İzrail a'skerlerinin' shermendesin shıg'araman. Menin' menen alısatug'ın bir adamdı aldıma shıg'arın'», – dedi.

¹¹ Filisttin' bul so'zlerin esitip, Shaul da, izraillılar da qattı qorqıp, qa'weterge tu'sti.

¹² Dawıt Yahudanın' Beytlehem qalasınan bolg'an efratlı İshay degen adamnın' ulı edi. İshaydın' segiz ulı bar edi. Shauldın' patshalıg'ı da'wirinde İshay qartayıp qalg'an bolıp, adamlar arasında en' jası u'lkeni edi.

¹³ İshaydın' u'lken u'sh ulı Shaul menen birge sawashqa ketken edi. Sawashqa ketken ullarının' en' u'lkeninin' atı Eliab, ekinshisinin' atı Abinadab, u'shinshisinin' atı Shamma edi.

¹⁴ Dawıt en' genje ulı edi. U'lken u'sh ulı Shauldın' janında edi.

¹⁵ Al Dawıt bolsa, a'kesinin' su'riwin bag'ıw ushın, Shauldın' janınan Beytlehemge qaytıp kelgen edi.

¹⁶ Filist Goliyat qırıq ku'n dawamında azanlı-kesh ortag'a shıg'ıp, urısıwg'a shaqırdı.

¹⁷ Bir ku'ni İshay ulı Dawıtqa bılay dedi: «Mına quwırılg'an bir efa biyday menen on sho'rek nandı al da, olardı tezirek ordag'a, ag'aların'a aparıp ber.

¹⁸ Al mına on bo'lek irimtikti bolsa, olardın' mın'basısına ber. Ag'aların'nın' hal-jag'dayın bil ha'm olardın' jaqsı ekenin bildiretug'ın qanday da bir belgi alıp kel.

¹⁹ Ag'aların', Shaul ha'm basqa barlıq izraillılar menen birge Ela oypatlıg'ında filistlerge qarsı urısıp atır».

²⁰ Erten'ine Dawıt azanda erte turdı. Su'riwdi bir shopang'a qaldırıp, İshaydın' buyrıg'ı boyınsha azıq-awqatlardı aldı da, jolg'a shıqtı. Ol ordag'a jetip barg'anda, a'skerler sap tartıp, su'ren salıwı menen sawashqa shıg'ıp atırg'an edi.

²¹ İzraillılar menen filistler bir-birine qarama-qarsı bolıp sapqa dizilgen edi.

²² Dawıt aparg'an zatların ju'klerdi qarawıllaytug'ın adamg'a qaldırıp, sapqa qaray juwırıp ketti. Ol tuwısqanlarının' janına barıp, olar menen sa'lemlesti.

²³ Dawıt tuwısqanları menen so'ylesip turg'anda, gatlı filist jawıngeri Goliyat o'z sapınan ortag'a shıg'ıp, burıng'ı so'zlerin ta'kirarlap baqıra basladı. Dawıt bunı esitti.

²⁴ İzraillılar Goliyattı ko'rgende qattı qorqıp, onnan qasha basladı.

²⁵ İzraillılar bir-birine: «İzraildı masqaralaw ushın ortag'a shıg'ıp turg'an mına adamdı ko'rip tursızlar ma? Onı o'ltirgen adamg'a patshamız u'lken baylıq sıylap, qızın da bermekshi. Ha'tte, onın' a'kesinin' xojalıg'ın da İzrailda salıq to'lewden azat qılmaqshı», – dedi.

²⁶ 6Dawıt janındag'ılarg'a: «Bul filistti o'ltirip, İzraildı shermendelikten qutqarg'an adamg'a ne beriledi? Tiri Qudaydın' a'skerlerin masqaralaytug'ınday, bul su'nnetsiz filist kim bolıptı?» – dedi.

²⁷ Adamlar burıng'ı so'zlerdi qaytalap, Goliyattı o'ltirgen adamg'a neler beriletug'ının aytıp berdi.

²⁸ Dawıttın' a'skerler menen so'yleskenin esitkende, u'lken a'jag'ası Eliabtın' ashıwı keldi. Ol Dawıtqa: – Bul jerge nege keldin'? Sho'ldegi azg'antay qoyımızdı kimge taslap kettin'? Senin' qanshelli menmen ha'm qanshelli jaman niyetli ekenin'di bilemen. Sen tek urıstı tamashalaw ushın kelgensen', – dedi.

²⁹ Dawıt og'an: – Men ne qıldım? Sorawg'a da bolmay ma? – dedi.

³⁰ Ol a'jag'asının' qasınan ketip, basqa adamlardan da sol na'rselerdi soradı. Olar da burıng'ıday juwaptı berdi.

³¹ Dawıttın' so'zlerin esitkenler onı Shaulg'a jetkizdi. Shaul Dawıttı shaqırttı.

³² Dawıt Shaulg'a: – Mına filist sebepli hesh kimnin' ruwxı tu'spesin. Qulın'ız bolg'an men barıp, onın' menen alısaman, – dedi.

³³ Shaul og'an: – Sen bul filistke qarsı shıg'ıp, onın' menen alısa almaysan'. Sebebi sen ele jassan', al ol bolsa, jaslıg'ınan jawınger adam, – dedi.

³⁴ Biraq Dawıt Shaulg'a bılay dedi: – Qulın'ız bolg'an men a'kemnin' su'riwin bag'aman. Arıslan yamasa ayıw kelip, su'riwden bir qozını alıp qashsa,

³⁵ izinen quwıp, og'an hu'jim qılaman ha'm qozını awzınan alıp qalaman. Eger arıslan yamasa ayıw mag'an taslansa, onın' jalınan uslap alıp, urıp o'ltiremen.

³⁶ Qulın'ız bolg'an men arıslandı da, ayıwdı da o'ltirgenmen. Mına su'nnetsiz filisttin' basına da sol ku'n tuwadı. Sebebi ol tiri Qudaydın' a'skerlerin masqaraladı.

³⁷ Meni arıslannın' ha'm ayıwdın' pa'njesinen qutqarg'an Jaratqan İye bul filisttin' qolınan da qutqaradı. Sonda Shaul Dawıtqa: – Meyli bar, Jaratqan İye sag'an yar bolsın! – dedi.

³⁸ Shaul o'zinin' sawash kiyimlerin Dawıtqa berdi. Basına qola duwlıg'a, u'stine sawıt kiygizdi.

³⁹ Dawıt patshanın' sawash kiyimlerinin' u'stinen qılıshın da asınıp ju'rmekshi boldı. Biraq ol bularg'a u'yrenbegenlikten, Shaulg'a: «Men bul kiyimler menen ju're almayman, sebebi u'yrenbegenmen», – dedi de, olardı sheship tasladı.

⁴⁰ Dawıt tayag'ın qolına alıp, saydan bes sıypaq tas terip aldı. Olardı shopan qorjınına salg'annan son', saqpanın aldı da, filist Goliyatqa qaray ju'rdi.

⁴¹ Filist te, onın' aldında qalqanın ko'terip ju'rgen no'keri de Dawıtqa qaray ju'rdi.

⁴² Goliyat Dawıtqa bastan-ayaq qarap shıg'ıp, onı mensinbedi. Sebebi Dawıt qızıl ju'zli, sımbatlı jas jigit edi.

⁴³ – Mag'an tayaq penen shıg'atug'ınday, men ne sag'an iyt pe edim? – dep, Goliyat o'z qudaylarının' atı menen Dawıttı na'letledi.

⁴⁴ Son'ınan: – Berman kel, denen'di aspandag'ı quslar menen qır daladag'ı haywanlarg'a jem qılayın, – ded.

⁴⁵ Dawıt og'an bılay dedi: – Sen mag'an qılısh, nayza ha'm semser menen qarsı shıg'ıp tursan'. Al men sen masqaralag'an İzrail a'skerlerinin' Qudayı, A'lemnin' Jaratqan İyesinin' atı menen sag'an qarsı shıg'ıp turman.

⁴⁶ Bu'gin Jaratqan İye seni mag'an ta'slim etedi. Seni o'ltirip, basın'dı denen'nen juda qılaman. Bu'gin filist a'skerlerinin' o'liklerin ko'ktegi quslar menen jerdegi haywanlarg'a jemtik qılaman. Sonda pu'tkil jer ju'zi İzrailda Quday bar ekenin bilip aladı.

⁴⁷ Bul jerdegilerdin' ha'mmesi Jaratqan İyenin' qılısh ha'm nayza menen qutqarmaytug'ının bilip aladı. Sebebi bul urısta Jaratqan İyenin' O'zi urısadı. Ol sizlerdi bizlerge ta'slim etedi.

⁴⁸ Goliyat taslanbaqshı bolıp, Dawıtqa qaray ju'rdi. Dawıt ta onın' menen alısıw ushın, filistler sapına qaray tez juwırıp ketti.

⁴⁹ Dawıt qolın qorjınına tıg'ıp, bir tastı aldı da, saqpanına salıp, atıp jiberdi. Tas filisttin' qaq man'layın tesip kirdi. Filist et-betinen jerge jıg'ıldı.

⁵⁰ Solay etip, Dawıt filist Goliyattı saqpan ha'm tas penen jen'di. Qolında qılıshı bolmasa da, onı o'ltirip, jerge qulattı.

⁵¹ Son'ınan Dawıt juwırıp barıp, filisttin' u'stine minip turdı. Onın' semserin qınınan suwırıp aldı da, onı o'ltirip, basın kesip aldı. O'zlerinin' batırı bolg'an Goliyattın' o'lgenin ko'rgen filistler qasha basladı.

⁵² İzrail ha'm Yahuda a'skerleri tura ko'terilip, filistlerdi Gattın' kirer awzına ha'm Ekron da'rwazalarına shekem quwıp bardı. Shaarayımnan Gat ha'm Ekron qalalarına baratug'ın jolda filistlerdin' o'likleri jayrap jattı.

⁵³ Filistlerdi quwıp bolıp qaytıp kelgen izraillılar filistlerdin' ordasın talan-taraj etti.

⁵⁴ Dawıt filist Goliyattın' basın alıp, Erusalimge a'keldi, al onın' qural-jaraqların o'z shatırına qoydı.

⁵⁵ Shaul Dawıttın' Goliyat penen alısıwg'a shıqqanın ko'rgende, sa'rka'rda Abnerden: «Abner, mına jas jigit kimnin' balası?» – dep sorag'an edi. Al Abner patshag'a: «Aldın'ızda ant iship aytaman: patsham, men bilmeymen», – dep juwap bergen edi.

⁵⁶ Sonda patsha og'an: «Bul jigittin' kimnin' ulı ekenin bil», – dep buyırg'an edi.

⁵⁷ Dawıt Goliyattı o'ltirip, ordag'a qaytıp keliwden-aq, Abner onı ertip, Shaulg'a apardı. Goliyattın' kesilgen basın Dawıt ele qolına uslap ju'rgen edi.

⁵⁸ Shaul Dawıttan: – Kimnin' ulısan'? – dep soradı. Dawıt og'an: – Beytlehemli qulın'ız İshaydın' ulıman, – dep juwap berdi.