2 Jılnama 29 bob
1 Xizkiya jigirma bes jasında patsha bolıp, Erusalimde jigirma tog'ız jıl patshalıq etti. Onın' anasının' atı Abiya* bolıp, ol Zexariyanın' qızı edi.
2 Ol da atası Dawıtqa uqsap, Jaratqan İyenin' na'zerinde tuwrı bolg'an islerdi isledi.
3 Xizkiya o'z patshalıg'ının' birinshi jılının' birinshi ayında Jaratqan İyenin' İbadatxanasının' qapıların ashıp, olardı du'zettirdi.
4 Son'ınan ruwxaniyler menen lebiylilerdi shaqırtıp, İbadatxananın' shıg'ıs ta'repindegi maydang'a jıynadı ha'm
5 olarg'a bılay dedi: «Lebiyliler, meni tın'lan'lar! O'zlerin'izdi tazalanıw ra'siminen o'tkerip, pa'klenin'ler, atababaların'ızdın' Qudayı Jaratqan İyenin' İbadatxanasın da pa'klen'ler! Haram na'rselerdi bul Muxaddes orınnan shıg'arıp taslan'lar!
6 Atababalarımız opasızlıq qılıp, Qudayımız Jaratqan İyenin' na'zerinde jaman bolg'an islerdi isledi ha'm Onı ta'rk etti. Olar Jaratqan İyenin' qonısınan ju'z burıp, Og'an arqasın qarattı.
7 Olar İbadatxana aywanının' qapıların jawıp taslap, shıraların da o'shirip qoydı. İzraildın' Qudayının' Muxaddes ornında tu'tetkiler de tu'tetpey, jandırılatug'ın qurbanlıqlardı da usınbay qoydı.
8 Sol sebepli, Yahuda menen Erusalim Jaratqan İyenin' g'a'zebine ushıradı. O'z ko'zlerin'iz benen ko'rgenin'izdey, Jaratqan İyenin' olarg'a islegenleri basqalardı qorqıtıp, hu'reylerin ushırdı.
9 Qaran'lar, sonlıqtan a'kelerimiz qılıshtan qaza taptı, ul-qızlarımız benen hayallarımız tutqında ju'r.
10 Endi men bizlerge degen lawlag'an g'a'zebinen qaytıwı ushın, İzraildın' Qudayı Jaratqan İye menen kelisim du'ziwdi qa'leymen.
11 Balalarım, biypa'rwa bolman'lar! Sebebi Jaratqan İye sizlerdi O'zinin' aldında turıp xızmet etiwin'iz ha'm qurbanlıqlar jag'ıwın'ız ushın tan'lap alg'an edi».
12 Sonda mına lebiyliler xızmetti basladı: Qohat urpag'ınan: Amasay ulı Maxat, Azariya ulı İoel; Merariy urpag'ınan: Abdiy ulı Kish, Ehallelel ulı Azariya; Gershon urpag'ınan: Zimma ulı İoax, İoax ulı Eden;
13 Elisafan urpag'ınan: Shimriy ha'm Eiel; Asaf urpag'ınan: Zexariya ha'm Mattaniya;
14 Heman urpag'ınan: Exiel ha'm Shimey; Edutun urpag'ınan: Shemaya ha'm Uzziel.
15 Bul lebiyliler tuwısqanların jıynap alıp, pa'kleniw ra'siminen o'tti. Son'ınan patshanın' buyrıg'ı boyınsha, Jaratqan İyenin' so'zine muwapıq, Onın' İbadatxanasın pa'klewge keldi.
16 Ruwxaniyler Jaratqan İyenin' İbadatxanasın pa'klew ushın ishke kirip, onnan tapqan haram na'rselerdin' ba'rin ha'wlige shıg'ardı. Lebiyliler olardı alıp, Kidron sayına aparıp tasladı.
17 Olar birinshi aydın' birinshi ku'ni pa'klewdi baslap, sol aydın' segizinshi ku'ni İbadatxana aywanına jetti. Olar ja'ne segiz ku'n İbadatxananın' o'zin pa'kledi ha'm birinshi aydın' on altınshı ku'ni pa'klew isin juwmaqladı.
18 Son'ınan patsha Xizkiyag'a barıp: «Bizler Jaratqan İyenin' İbadatxanasın, jandırılatug'ın qurbanlıqlar beriletug'ın orındı ha'm og'an tiyisli ha'mme na'rselerdi, usınılg'an nanlar qoyılatug'ın stoldı ha'm og'an tiyisli barlıq na'rselerdi tolıq pa'kledik.
19 Axaz patshanın' o'z hu'kimdarlıg'ı waqtında Qudayg'a biyopalıq etip, shıg'arıp taslag'an na'rselerin tayarlap, pa'kledik. Olar ha'zir Jaratqan İyenin' qurbanlıq ornının' janında tur», – dedi.
20 Erten'ine patsha Xizkiya erte turıp, qala ha'kimlerin jıynadı ha'm olardı ertip, Jaratqan İyenin' İbadatxanasına jol aldı.
21 Olar patshalıq, Muxaddes orın ha'm Yahuda xalqı ushın gu'naların o'tew qurbanlıg'ı etip jeti bug'a, jeti qoshqar, jeti toqlı ha'm jeti teke alıp keldi. Patsha Xaron urpaqlarınan bolg'an ruwxaniylerge bulardı Jaratqan İyenin' qurbanlıq ornı u'stinde qurbanlıqqa beriwdi buyırdı.
22 Ruwxaniyler da'slep toqlılardı soyıp, qanın qurbanlıq orıng'a septi. Son'ınan qoshqarlardı soyıp, qanın qurbanlıq orıng'a septi, keyin qozılardı soyıp, qanın qurbanlıq orıng'a septi.
23 Aqırında, gu'na qurbanlıg'ı ushın berilgen tekelerdi patsha menen pu'tkil ja'miyettin' aldına alıp keldi. Olar tekelerdin' u'stine qolların qoydı.
24 Keyin ruwxaniyler tekelerdi soyıp, qanın pu'tkil İzrail xalqının' gu'nalardan tazalanıwı ushın, gu'nanın' qunı retinde qurbanlıq orıng'a septi. Sebebi patsha jandırılatug'ın qurbanlıqlar ha'm gu'na qurbanlıqları pu'tkil İzrail xalqı ushın berilsin, dep buyırg'an edi.
25 Son'ınan patsha Dawıttın', onın' wa'liyi Gadtın' ha'm payg'ambarı Natannın' ko'rsetpesine muwapıq, lebiylilerge kimbal, arfa ha'm lira berip, olardı Jaratqan İyenin' İbadatxanasına ornalastırdı. Usılay islewdi Jaratqan İye O'z payg'ambarları arqalı buyırg'an edi.
26 Lebiyliler Dawıttın' saz a'sbapları menen, ruwxaniyler ka'rnaylar menen o'z orınların iyeledi.
27 Xizkiya jandırılatug'ın qurbanlıqtı qurbanlıq orında usınıwdı buyırdı. Qurbanlıqlar jandırıla baslag'anda, ka'rnaylarg'a ha'm İzrail patshası Dawıttın' saz a'sbaplarına qosılıp, Jaratqan İyege arnap qosıqlar aytıla basladı.
28 Qurbanlıq jandırılıp bolıng'ansha, pu'tkil jıynalg'anlar ta'jim etip, qosıqshılar qosıq aytıp, ka'rnayshılar ka'rnayların shertip turdı.
29 Qurbanlıq beriw tamam bolg'anda, patsha ha'm onın' janındag'ılar dizelerin bu'gip, sıyındı.
30 Patsha Xizkiya ha'm onın' xızmetshileri lebiylilerge Dawıttın' ha'm wa'liy Asaftın' so'zleri menen Jaratqan İyege alg'ıs-maqtaw aytıwdı buyırdı. Olar quwanısh penen alg'ıs-maqtaw ayttı, sıyındı ha'm ta'jim etti.
31 Keyin Xizkiya: «Mine, sizler o'zlerin'izdi Jaratqan İyege bag'ıshladın'lar. Endi jaqınıraq kelip, Jaratqan İyenin' İbadatxanasına qurbanlıqlar ha'm minnetdarshılıq qurbanlıqların alıp kelin'ler», – dedi. Sonda jıynalg'anlar qurbanlıqlar ha'm minnetdarshılıq qurbanlıqların berdi. Ayırım qa'lewshiler bolsa, jandırılatug'ın qurbanlıqlar alıp keldi.
32 Xalıq alıp kelgen jandırılatug'ın qurbanlıqlardın' ulıwma sanı mınaday boldı: jetpis bug'a, ju'z qoshqar, eki ju'z toqlı. Bulardın' ha'mmesi Jaratqan İyege arnap jandırıw ushın alıp kelingen edi.
33 Basqa muxaddes qurbanlıqlar ushın da altı ju'z bas iri mal, u'sh mın' bas mayda mal da alıp kelindi.
34 Biraq ruwxaniyler dım az bolg'anlıqtan, jandırılatug'ın qurbanlıqlardın' terisin sılıp u'lgere almay atırg'an edi. Sol sebepli is tamam bolg'ansha ha'm basqa ruwxaniyler pa'kleniw ra'siminen o'tip bolg'ansha, lebiyli tuwısqanları olarg'a ja'rdem berdi. Sebebi lebiyliler pa'kleniw ra'simine ruwxaniylerge qarag'anda itibarlıraq edi.
35 Tatıwlıq qurbanlıqlarının' mayı ha'm jandırılatug'ın qurbanlıqlar ha'm onın' menen beriletug'ın ishimlik sadaqaları mol boldı. Usılayınsha Jaratqan İyenin' İbadatxanasının' xızmeti qayta tiklendi.
36 Xizkiya ha'm pu'tkil xalıq Qudaydın' xalıq ushın islegen islerine quwandı. Sebebi bul is qısqa waqıt ishinde ju'z berdi.
