Ezra 6 bob

Dariydin' buyrıg'ı(1-12),İbadatxananın' bag'ıshlanıwı(13-18),Qutqarılıw bayramının' nıshanlanıwı(19-22).

¹ Bunnan son', patsha Dariydin' buyrıg'ı boyınsha, Babilondag'ı hu'jjetler saqlanatug'ın arxivte izlew isleri alıp barıldı.

² Arxiv Midiya wa'layatının' paytaxtı Axmeta qorg'an qalasında bolıp, ol jerden bir orama hu'jjet tabıldı. Onda bılay dep jazılg'an edi: «Este saqlaw ushın:

³ patsha Kirdin' hu'kimdarlıg'ının' birinshi jılında Qudaydın' Erusalimdegi İbadatxanası haqqında Kir mınaday pa'rman shıg'ardı: „İbadatxana qurbanlıq usınılatug'ın orında, burıng'ı tiykarı u'stine qayta qurılsın. Onın' biyikligi alpıs shıg'anaq, eni de alpıs shıg'anaq bolsın.

⁴ Diywalları u'sh qatar u'lken taslardan ha'm bir qatar ag'ashtan qurılsın. Al ketetug'ın qa'rejetler bolsa, patsha qaznasınan to'lensin.

⁵ Bunnan tısqarı, Qudaydın' İbadatxanasının' altın ha'm gu'mis ıdısları, yag'nıy Nabuxodonosordın' Erusalimdegi İbadatxanadan Babilong'a alıp kelgen ıdısları da qaytarıp berilsin. Olar Erusalimdegi İbadatxanag'a, o'z ornına alıp barılıp, Qudaydın' İbadatxanasına qoyılsın“».

⁶ Sonda patsha Dariy mına xattı jolladı: «Solay etip, da'ryanın' arg'ı ta'repindegi u'lkenin' ha'kimi Tattenay, Shetar-Boznay ha'm olardın' joldasları, yag'nıy da'ryanın' arg'ı ta'repinde jasawshı ha'meldarlar! Ol jerge jaqınlaspan'lar.

⁷ Qudaydın' İbadatxanasındag'ı islerge aralaspan'lar. Yahuda ha'kimi ha'm yahudiylerdin' aqsaqalları Qudaydın' İbadatxanasın burıng'ı ornına qayta tiklesin.

⁸ Bunnan tısqarı, Qudaydın' İbadatxanasının' qurılısı ushın yahudiy aqsaqallarına ja'rdem retinde neler islewin'iz kerekligi tuwralı sizlerge mınalardı buyıraman: bul adamlardın' jumsaytug'ın qa'rejetleri tolıq patsha qaznasınan to'lenetug'ın bolg'anlıqtan, jumıs toqtap qalmawı ushın, da'ryanın' arg'ı ta'repinen jıynalatug'ın salıqlardan tez olarg'a berin'ler.

⁹ Erusalimdegi ruwxaniyler talap etken ha'mme na'rse: aspannın' Qudayına arnap jandırılatug'ın qurbanlıqlar ushın baspaqlar, qoshqarlar, toqlılar, ja'ne de, biyday, duz, sharap ha'm za'ytu'n mayı ha'r ku'ni irkinishsiz berilsin.

¹⁰ Solay etip, olar aspannın' Qudayına unaytug'ın qurbanlıqlar bersin, patsha ha'm onın' ullarının' o'miri ushın duwa etsin.

¹¹ Tag'ı da mınanı buyıraman: eger kim de kim bul pa'rmandı o'zgertse, onda sol adamnın' u'yinen bir bo'rene alıp shıg'ılıp, sol adam bo'renenin' ushına ildirip o'ltirilsin, al u'yi qarabaqanag'a aylandırılsın.

¹² O'z atın sol jerde ornatqan Quday bul pa'rmandı o'zgertiwge yamasa Qudaydın' Erusalimdegi İbadatxanasın joq qılıwg'a urıng'an ha'r bir patshanı yaki xalıqtı joq qılsın. Men, Dariy usı buyrıqtı berdim. Buyrıg'ım tolıq orınlansın».

¹³ Sonda da'ryanın' arg'ı ta'repindegi u'lkenin' ha'kimi Tattenay, Shetar-Boznay ha'm olardın' joldasları patsha Dariydin' buyrıg'ın tolıq orınladı.

¹⁴ Yahudiy aqsaqalları qurılıstı dawam etti ha'm payg'ambarlar Xaggay menen İddo ulı Zexariyanın' payg'ambarshılıq so'zlerinen jiger alıp, olardın' isleri tabıslı boldı. Olar İzraildın' Qudayının' buyrıg'ı ha'm Persiya patshaları Kir, Dariy ha'm Artakserkstin' pa'rmanı boyınsha İbadatxananı qurıp pitkerdi.

¹⁵ İbadatxananın' qurılısı patsha Dariydin' hu'kimdarlıg'ının' altınshı jılında, Adar ayının' u'shinshi ku'ni* tamamlandı.

¹⁶ İzraillılar: ruwxaniyler, lebiyliler ha'm su'rginnen qaytqanlardın' ha'mmesi Qudaydın' İbadatxanasının' bag'ıshlanıwın quwanısh penen bayramladı.

¹⁷ Olar Qudaydın' İbadatxanasının' bag'ıshlanıwına arnap ju'z baspaq, eki ju'z qoshqar ha'm to'rt ju'z toqlı shaldı, al İzrail urıwlarının' sanı boyınsha on eki tekeni pu'tkil İzrail xalqının' gu'naları ushın gu'na qurbanlıg'ı retinde qurbanlıqqa berdi.

¹⁸ Son'ınan Muwsanın' kitabında jazılg'anınday, ruwxaniylerdi toparları ha'm lebiylilerdi shaqapları boyınsha Erusalimdegi Qudaydın' İbadatxanasındag'ı xızmetke qoydı.

¹⁹ Birinshi aydın' on to'rtinshi ku'ni* su'rginnen qaytqanlar Qutqarılıw bayramın nıshanladı.

²⁰ Sebebi ruwxaniyler menen lebiyliler o'zlerin pa'klew ra'siminen o'tkergen bolıp, olardın' ha'mmesi pa'k edi. Lebiyliler su'rginnen qaytqanlardın' ha'mmesi ushın, ruwxaniy tuwısqanları ushın ha'm o'zleri ushın Qutqarılıw bayramının' qurbanlıg'ın shaldı.

²¹ Su'rginnen qaytqan İzrail xalqı ha'm İzraildın' Qudayı Jaratqan İyege sıyınıw ushın, o'zlerin a'tiraptag'ı xalıqlardın' napa'kliklerinen saqlag'an adamlardın' ha'mmesi qurbanlıq go'shinen jedi.

²² Olar jeti ku'n quwanısh penen Ashıtqısız nan bayramın bayramladı. Sebebi Jaratqan İye olardı quwanıshqa bo'ledi ha'm İzraildın' Qudayı bolg'an Qudaydın' İbadatxanasının' qurılısına ja'rdem beriw ushın Assiriya patshasının' ju'regin jibitti.